1 तुक क्‍यानी ख्रीष्‍टकी थोक्‍ला चोन्‍खाङला शोरुप ङ ख्‍यिराङला ठाकुरे सिनी गोङ्‍बा शोयी। कोन्‍छ्‌योककी ख्‍यिराङला काङगी थोक्‍ला कताङ वे, ती दोके राङ मिजी क्‍योङ। 2 नरी सेम बोल्‍मु ताङ च्‍यङ्‍च्‍यु सेम्‍बा च्‍युङ्‍नी हम क्‍यानी च्‍यिककी च्‍यिकला ङ्‍यिङ्‍ज्‍ये की। 3 खोकी थु चाङ्‍माकी ख्‍यिराङ तेरीला सेम च्‍यिक राङ जोवु तप्‍की ख्‍यिराङ सेम थिन्‍नी लोदिमु क्‍यानी दे थुपा की। 4 खोकी ख्‍यिराङला कताङ नङ्‍गुप पेला रेवा च्‍यिककी थोक्‍ला कताङ नङ्‍गुप दोके जु साङ च्‍यिक राङ यिन, खोकी थु चाङ्‍मा साङ च्‍यिक राङ यिन। 5 चोवो कोन्‍छ्‌योक ताङ तेपा ताङ बप्‍तिस्‍मा च्‍यिक राङ यिन। 6 दाक्‍पु तेरीकी पपा कोन्‍छ्‌योक ति च्‍यिक राङ यिन। खोकी दाक्‍पु तेरीकी खला ओङ्‍ज्‍येन क्‍या नङ्‍गिवी, तमा खो दाक्‍पु तेरीकी मुला ज्‍युनी दाक्‍पी मिजी नेमा लाका क्‍या नङ्‍गिवी।

7 यिने येशू ख्रीष्‍टकी नोवाला वोतुप ङ्‍येम्‍बा दोके खोकी दाक्‍पु तेरीला कटिन नम्‍बा कुतुक कुतुक नङ्‍नी वे। 8 ती तप्‍की कोन्‍छ्‌योककी सुङला तीकी थोक्‍ला दुक सिनी टि वे,

9 दी खो येर केला तेङ फेपुप तेन्‍दोक ति काङ यिन सिसिन, खो ति गोमाला दी जम्‍बुलिङला पाप्‍नी फेप्‍सुङ सिक्‍यावु यिन। 10 खो मर फेप्‍सिमा तेरी च्‍यालकतिवी खला ग्‍येला कितुपला येलुङ खो देवाच्‍येन सिनाङ मङ केला तेङ फेप्‍सुङ। 11 तमा खोकी मी ललाइला ति लोमा छ्‌ये, ललाइला ति खोरे लुङ्‍तेम्‍बा, ललाइला ति ख्‍याप्‍टाक कितुप मी, ललाइला ति चर्चला गोमा कितुप गेकेन, ललाइला ति खोकी सुङ लोपुप गेकेन जो नाङ्‍सुङ। 12 खोकी तुक क्‍या नङ्‍गुप ति तिवा तेरीकी खोकी लाका ल्‍यामो कितुप जोनी ख्रीष्‍टकी जु यिन्‍दुप चर्च ति येर फर्शी सिनी यिन। 13 तमा दाक्‍पु तेरी कोन्‍छ्‌योककी सेवुला तेपा कितुप ताङ खोला ङो शेवुला च्‍यिक राङ च्‍युङ्‍नी ख्रीष्‍टला छाछिङी वोतुप दोके दाक्‍पु साङ खोकी छाछिङीला लेपुप सेक मङ मङ फरिन डिवी। 14 तुक क्‍यानी दाक्‍पु मीतिवी जिनोक ताङ दुक्‍टा ताङ नम्‍बा कुतुककी येन्‍देन मेटेङ्‍बुला फार छुर युकुप आङातिवा दोके मोडोशी। 15 बोरु ख्‍यिराङ ति च्‍यिककी च्‍यिकला ङ्‍यिङ्‍ज्‍ये क्‍यानी ताम्‍ङे टेङ्‍बु लाप्‍नी तेरी ताम्‍ङेला ख्रीष्‍ट दोके छाछिङी च्‍युङ्‍नी फरिन डो गोकिवी। खो ति गो यिन। 16 ती गो नेसुर दाक्‍पी जुकी तेरी थिन्‍जामतिवा थिनी जु च्‍यिक च्‍युङ्‍गिवी। तमा जुला वोतुप तेरी येन्‍लकतिवी दाक दाक्‍पी लाका ल्‍यामु क्‍यासिमा जु ति मङ रम्‍बु डिवी। तमा च्‍यिककी च्‍यिकला ङ्‍यिङ्‍ज्‍ये कियी ती जु ति खोरुङ राङ फरिन डिवी।

17 ती तप्‍की ङ दी ताम्‍ङे ति चोवो येशूकी मिङला ठाकुरे सिरिन। यहूदी मिन्‍दुप मिरिक यम्‍बाकी मीतिवी तेर्मेकी नासामतिवा तङ्‍नी मिजी क्‍यङ्‍गुप दोके ख्‍यिराङ ति तफेन्‍ला तुका मिजी माक्‍योङ। 18 तिवी सेम क्‍योङ्‍बु गल्‍नी नक्‍तोमी गलुप तप्‍की तिवी कोन्‍छ्‌योककी टेङ्‍बु हाक्‍माकोनी खोकी नङ्‍गुप मिजी ति तिवी माङ्‍ये वे। 19 तिवा ङोछा मेतुप ताङ शम्‍डेन कितुप ताङ देर्पाला ख्‍येल्‍नी सेम नोजु कितुप गल वे।

20 यिने ख्‍यिरा याङ ख्रीष्‍टकी कोर्ला तुकै मालाप वे। 21 ख्‍यिरा याङ येशू ख्रीष्‍टला वोतुप टेङ्‍बुकी कोर्ला लाप्‍नी हाक्‍कोनी वे सिरुप ति ङला छ्‌या वे। 22 तुक क्‍यानी ख्‍यिरा मिजी ङ्‍यिङ्‍बा नेसुर वुङ्‍गुप किताङ नालु ति मज्‍या ङ्‍यिङ्‍बा पिनी क्‍युरुप दोके क्‍यानी क्‍युर। ती मिजी ङ्‍यिङ्‍बा ति जिनोक जोप नासाम दुक्‍टा नेसुर वावु तप्‍की ना डिवी। 23 तमा ख्‍यिरा सेम ति कोन्‍छ्‌योककी थु चाङ्‍मा नेसुर टेङ्‍बु जोनी 24 मज्‍या सम्‍बा कोन्‍दुप दोके ख्‍यिरा मिजी साङ सम्‍बा फोकिवी। ती मिजी सम्‍बा ति कोन्‍छ्‌योक दोके टेङ्‍बु ताङ मोवा वोतुप च्‍युङ्‍गुप यिन।

25 तुक क्‍यानी ख्‍यिराङ जिनोक जोप क्‍युर्नी रङगी मीतिवी मुला ताम्‍ङे टेङ्‍बु लोप। च्‍यिलासिसिन दाक्‍पु तेरी जु च्‍यिककी येन्‍लकतिवा यिन। 26 ख्‍यिराङ ङ्‍यिर्मु लासिनाङ दिक्‍पा ति माकी, ङ्‍यिमा गावु सिनाङ गोमाला के ती ङ्‍यिर्मु ति तोर्शी। 27 डेला ख्‍यिरा नाङ्‍ला लाका कि माज्‍यी। 28 कुन कितुपतिवी साङ तफेन्‍ला कुन मिकिशी। तीकी लाका टेमु क्‍यानी सशी, तमा कतुकारला ख्‍येलुपतिवाला तेर थुप्‍शी। 29 ख्‍यिरा ख नेमा चोताम मालाप, यिने मीला यर्के लोङ्‍गुप ताङ लप गोवु ताम्‍ङे ल्‍यामु तिराङ लोप। तमा ङ्‍येन्‍दुपतिवाला साङ कटिन थोप्‍शी। 30 तमा कोन्‍छ्‌योककी थु चाङ्‍माला सेम्‍दुक मालोङ, ती थु चाङ्‍माकी राङ ख्‍यिराङला दिक्‍पा ने थर ज्‍यितुप तुजे मालेपा सेक्‍ला ख्‍यिराङ खोकी ति यिन सिनी त ग्‍यप्‍नी वे। 31 तेरी सेम मेलोक्‍पा वोतुप ताङ शेताङ कितुप ताङ ङ्‍यिर्मु कितुप ताङ हराङ हुरुङ कितुप ताङ मारे तोङ्‍गुप तेरी परकी दुक्‍टातिवा मुला राङ क्‍युर। 32 बोरु चुक क्‍यानी येशू ख्रीष्‍टकी क्‍या नङ्‍गुप लाका नेसुर कोन्‍छ्‌योककी ख्‍यिरा दिक्‍पा माफ नङ वे, तुक राङ क्‍यानी ख्‍यिरा साङ च्‍यिककी च्‍यिकला सेम बोल्‍मु ताङ च्‍यम्‍बा क्‍यानी माफ बिन।