16
यरूशलेमकी तेपा कितुप मीतिवी थोक्ला बुल्वा
1 त कोन्छ्योकला तेपा कितुप यरूशलेमकी मीतिवी थोक्ला बुल्वा तेरुप कोर्ला गलातियाला वोतुप चर्चतिवाकी मीतिवाला ङे क बिन्दुप दोके ख्यिराङ साङ किसा। 2 नरी दिन्जा च्यिककी ङ्यिमा थल्माला ख्यिराङ तेरीकी दाक दाक्पी शम्बुप टङ्गा नेमा टङ्गा चे चेयी दुम्नी ज्योका। तुक क्यासिन ङ वासिमा के बुल्वा दु मोगोशिता। 3 तमा ङ वासिमा ख्यिरा दुम्नी ज्यकुप बुल्वा ति कल्नी ख्यिरा सेमला गलुप मी मिरा च्यिकला यिकी ताङ मुला यरूशलेमला तोङ्गुप्नो। 4 दोजो ती पेला डो गोवु यिन्सिन ङ साङ तिवी मुला राङ यरूशलेमला डोयिनो।
पावलकी खोरो थोक्ला गोङ्बा शुवु
5 ङ माकेडोनियाला गल्नी ते नेसुर ख्यिराङला ठेतुपला वुङ्गुप्नो। 6 ङ ख्यिरा ते वासिमा चेयी पर सेक देतिनो। च्युङ्सिन गुन्बी ल ति ख्यिरा मुला राङ देतुप नो वे। ती ज्युक्ला ति ङ कनी गल्सिनाङ ख्यिरा ङला दाल्जा कि थुप्किवी। 7 दी पाला ङ ख्यिरा ते उकुर च्यिक तिराङ ठेतुपला वुङ्गुप मिन, यिने कोन्छ्योककी नोवाला वोसिन ख्यिरा मुला चेयी पर सेक देतुप नो वे। 8 यिने पेन्तिकोसकी तुछ्येन* १६:८ पेन्तिकोसकी कोर्ला हाक्कोवुला दी थेपकी ग्यपला वोतुप “काले वोतुप छिकतिवा”ला ल्हाप। सेक ति ङ एफिससला राङ देतिनो, 9 च्यिलासिसिन ङे थोक्ला छासे खक्छ्येवु लाका कितुपला गो ग्येर्पु पेनी वे, यिने ङे तेन्दोकला लङ्गुपतिवा साङ बङी वे।
10 दोजो तिमोथी ख्यिरा ते वासिन ख्यिरा ते देतुप पर सेक ति तीला ख्यिरा मुला राङ जोल्हमु क्यानी दे च्यिता। च्यिलासिसिन ती साङ ङ दोके कोन्छ्योककी थोक्ला लाका कितुप मी यिन। 11 तुक क्यानी सी साङ तीला ङ्यिङ्मर माकिता। तीला लोदिमो क्यानी ङे ते वुङ्गुपला दाल्जा क्यानी तोङ। तेपा कितुप अच्युनुपतिवी मुला तिमोथी गिवी सिनी ङ लाम ल्हानी गु देनी वोतो।
12 दाक्पी नुप अपोल्लोसला तेपा कितुप यम्बा अच्युनुपतिवी मुला राङ टिनी ख्यिरा ते ग्युक सिनी ङे बङी सिक्यायिन, यिने ती तन्दा सेक साङ ख्यिरा ते डो माथुप वे। ज्युक्ला च्युङ्सिन ख्यिरा ते डिते यिन्दे।
पावलकी बिन्दुप तिङ्मी टोङ्गु
13 ख्यिराङ च्याङ्से देता, तमा तेपा रम्बु क्यानी ङाडेङ ताङ ङार छ्येवु क्यानी देता। 14 ख्यिराङ काङ कि सिनाङ सेमला ङ्यिङ्ज्ये क्यानी किसा।
15 अच्युनुपतिवा, अखैयाला तेरी सिनाङ गोमाला कोन्छ्योकला तेपा क्यावु स्तिफनासकी खाङ्बी मीतिवा तेरीला याङ ख्यिरा ङो शेकिवी। तिवी कोन्छ्योकला तेपा कितुप मीतिवाला छासे क्यानी दाल्जा किटे क्यासुङ। 16 ख्यिराङ तुका टेमु कितुप मीतिवा ताङ तिवी मुला राङ शब्ज्यी कितुप मी तेरीकी ओङला दे सिनी ङ ख्यिराङला ठाकुरे सिरिन।
17 स्तिफनास ताङ फोर्टुनाटस ताङ अखाइकस ङे ते वासिमा ङ छासे गा क्यायी। च्यिलासिसिन ख्यिराङ मेसिनाङ तिवी ङ्यिराङला लोदिमु जोसुङ। 18 तमा तिवी ख्यिरा सेमला ङाडेङ जोवु दोके ङे सेमला साङ छासे ङाडेङ ङ्येसुङ। तुक क्यानी तुका मीतिवाला ख्यिरा ताङ्देन किसा।
19 एशियाला वोतुप चर्चतिवाकी मीतिवी साङ ख्यिराङला टसी देलेक सिनी ताङ्नी वोतो। तमा अकिलास ताङ प्रिस्काले ताङ तिवी खाङ्बाला वोतुप कोन्छ्योकला तेपा कितुपतिवा तेरीकी साङ ख्यिराङला टसी देलेक सिनी ताङ्नी वोतो। 20 दे वोतुप तेरी तेपा कितुप अच्युनुपतिवी साङ ख्यिराङला टसी देलेक सिनी ताङ्नी वोतो। ख्यिराङ च्यिककी च्यिकला ङ्यिङ्ज्ये ताङ मुला टसी देलेक सिसा।
21 दी टसी देलेक सिक्यावु ति ङ पावलकी लाक्पी राङ टिवु यिनो।
22 सी चोवो येशूला ङ्यिङ्ज्ये मिकिवे, तिवा मोताप सुकुप यिनो। ओ ङ्यिरा चोवो येशू, ङ्यिरा पर्ला फेप!
23 चोवो येशूकी कटिन ति ख्यिरा मुला लुशी।
24 ख्रीष्ट येशू नेमा ख्यिराङ तेरीला ङ ङ्यिङ्ज्ये कितिन। आमिन।