1 ङ ख्‍यिराङला ताम्‍ङे च्‍यिक सिरिन। ख्‍यिरा पर्ला शम्‍डेन कितुपतिवा वे सिरुप ति ङे थोसुङ। तुका शम्‍डेन कितुप लाका याङ कोन्‍छ्‍योकला ङो माशेवु मीतिवी पर्ला साङ मेङ्‍गिवी। ख्‍यिरा पर्ला ललाइकी खोरो उरु आमाला साङ पेर्मीला ज्‍याक्‍नोक सिनोक। 2 ती हाक्‍कोसिनाङ ख्‍यिराङ अम्‍बारङ्‍शिङ किवी? काङ ख्‍यिरा याङ तीकी थोक्‍ला सेम्‍दुक कि गोवु मिन रो? तुका लाका मेलोक्‍पा कितुप मीला ख्‍यिरा पर नेमा तेन तोङ गोवु ति यिन्‍जा। 3 ङ ख्‍यिरा मु नेसुर थाक्‍रिङ्‍बु वोसिनाङ ङे सेम ति ख्‍यिरा मुला राङ वे। ती तप्‍की ङ ख्‍यिरा पर्ला मेसिनाङ वोतुप दोके क्‍यानी तुका लाका मेलोवा कितुप मीला ङे ठिम क्‍यायिन। 4 ख्‍यिराङ दाक्‍पी चोवो येशूकी मिङला जोम्‍बुप पेला ङे सेम साङ ख्‍यिरा पर्ला राङ गिवी। तमा दाक्‍पी चोवो येशूकी ओङ साङ ते गिवी। 5 ती पेला तुका लाका मेलोक्‍पा कितुप मी ति शैतानला चेक ते! तुक क्‍यासिन तीकी जु ति नाडोशी, यिने तीकी सेम ति चोवो फेपुप तुजेला र्‍होक्‍शी। 6 ख्‍यिराङ अम्‍बारङ्‍शिङ कितुप ति ल्‍यामु मिन। खमीर चेयी लुक्‍नी टम्‍दोक ङ्‍येसिन तेरी टम्‍दोक ति बोकिवी सिरुप ति ख्‍यिराङला छ्‍या मे? 7 तुक क्‍यानी ख्‍यिरा गोमाला क्‍यावु दिक्‍पातिवा ति टम्‍दोक नाङ्‍ला लुकुप खमीर यिन। ती तप्‍की ख्‍यिरा खमीर ङ्‍यिङ्‍बा दोके वोतुप शम्‍डेन कितुप मीला तेन्‍नी तोङ! तमा ख्‍यिराङ खमीर मालुकुप टम्‍दोक दोके टेङ्‍बु डिवी। गोमाला यहूदीतिवा मिश्र लुङ्‍बा नेसुर थरुप पेला लुक रुक सेनी जिन्‍बा ताङ्‍सुङ। ती दोके क्‍यानी चोवो येशू ख्रीष्‍ट ति यहूदीतिवा थरुप तुछ्‍येनला सेतुप लुक रुक च्‍युङ्‍नी दाक्‍पुला दिक्‍पा ने थर ज्‍यितुपला टुङ्‍सुङ। 8 तुक क्‍यानी दाक्पी दुक्‍टा ताङ सेम नक्‍पातिवा यिन्‍दुप खमीर ङ्‍यिङ्‍बा लुकुप शुब्‍ज्‍याङ सोनी मिन, खोनक्‍पु मेतुप ताङ टेङ्‍बुकी खमीर मालुकुप शुब्‍ज्‍याङ सोनी यहूदी थरुप तुछ्‍येन तेन्‍दुप।

9 गोमाला साङ ङे ख्‍यिराङला शम्‍डेन कितुपतिवी दला माशुक सिनी यिकी टिनी तङ्‍गुप यिन। 10 तीकी तेन्‍दोक ति दी जम्‍बुलिङकी शम्‍डेन कितुपतिवा ताङ देर्पा कितुपतिवा ताङ कुन कितुपतिवा ताङ कुला छ्‍यो तोङ्‍गुपतिवी मुला नाम्‍साङ तम्‍जी माजो सिक्‍यावु ति मिन। मिसियाङ ख्‍यिराङ दी जम्‍बुलिङ नेमा पाङ्‍ला थेन्‍नी डो गोकिवी। 11 चुका मी तीकी ङ कोन्‍छ्‍योकला तेपा कितुप मी यिन सिवी, यिने शम्‍डेन कितुप ताङ देर्पा कितुप ताङ कुला छ्‍यो तोङ्‍गुप ताङ मीला ङ्‍यिर्मु कितुप ताङ छ्‍याङ्‍गेले कितुप याङ्‍ना कुन किवी सिसिन, तुका मीतिवी मुला तम्‍जी माजो, तिवी मुला देनी समा साङ मासा। 12 च्‍यिलासिसिन कोन्‍छ्‍योकला तेपा मिकिवु मीतिवाला ठिम कितुप ति ङला काङ ख्‍येप्‍साङ वे रो? काङ चर्चकी तेपा कितुप मीतिवाला ख्‍यिरा राङ ठिम तोङ मोगोवी रो? 13 तेपा मिकिवु मीतिवाला ठिम क्‍या नङ्‍गुप ति कोन्‍छ्‍योक यिन। तुक क्‍यानी कोन्‍छ्‍योककी सुङला साङ टि वे, “काङ ख्‍यिरा पर्ला वोतुप मी दुक्‍टातिवाला तेन्‍नी तोङ!”* ५:१३ व्यवस्था १७:७