1 Nebeisa malaikat maehae mbai nendo amin raneuboke. Reyae erale mo findelau mbai yakura ruke nda kani kela rande honole a bulu na wauwau hele romaufe rawate kunci ikeunge. 2 Neyae nebei a bulu na wauwau hele raweuboke bele eisa ongkou itukai kabanna wanen mae baleyate. Nebei ongkou wae mokoungeboke yaku bele hu inyukui bele ouben yaeiboke. 3 Na wauwau hele bulura yele ongkou eisa hato yoni-yoni nda kani kela rande baleijate. Nebei yore akaikai rena wanen naeumikoke. 4 Nda yore a herawoumi, “Nda kani kela ranna ke hun hobo, o meleme, o ha beko omokoijae. Nebeibe ro miyae na feline Allahlena meterai u yore mo beko mokonaimile.” 5 Hato yoni-yonire elae ikeumi ro miyaere honate naeise ban, nebeibe oko maehae mbai meuboi auboise konaimile naeise. U nene yae wa akaikai rena nele buhae kunyeiboyele hubanne wanen, hato rena nende hubanainyele. 6 Nebei oko maehae mbai ro miyae herenatere relenainyelebe, nebeibe eherei sului. Neyae herere kena konatebe, nebeibe here nda yo naeisa ahaufe yae wenende.

7 Hato yoni-yoni na ma kuda felare enatere kitaimiboke wanen erewaimi. Nebei hato yoni-yoni na yun ranne rambun ondofolo fokoma emas yae mokaikoke bele wanen nane merau na be yoi ro miyae be wanen, 8 na umaa miyae maengke umaa wanen, na heraa singa heraa wanen. 9 Na nimoko kayaa rambun besi yae mokaiboke wanen. Na noro kulun kereta holo mbai kuda u hale yae yoboiboyate buloo fela nolore ate wanen. 10 Nebei yo reme bele nane merau rena bele, akaikai rena wanen. Na reme einya ro miyae uware buhae mokonaimilere oko maehae mbai yembonde naei elae bele nekate. 11 Nebei yo naei mere mokowoumi ondofolo malaikat mbai na wauwau hele a buluna kiyae. Na ro Ibrani afaeu wae Abadon, Yunani afaeu wae Apolion na mekai, beko mokole kiyae.

12 Bekore benate naei mbai nendo moi woke. Eren, benen bekore benate bee hele menetere.

13 Malaikat mehine mbai nendo amin waku wanen rambun raneuboke. Reyae angkaei borale Allahle bena hili era akau erare felate itukai emas yae mokaiboke huba keli tandukra a kulun relaeinye. 14 Nebei a malaikat amin waku wanen rambun bele mehine mbai nendore weunge, “Efrat wi kaban kelaeunga malaikat keli ikilaimikoke hebate hayeimiko!” 15 Nda malaikat keli nda hukai, ya, oko, ralo yakamane relahi yae mokainyehake, nda kani kelana fo name na ro miyaere honaikondere hayaeimikoke. 16 Reyae boroubokale kuda ranna felayo na helen 200.000.000.

17 Nebeinye ijoko raneufeboke kanale yae kuda yoni-yoni haungate yo bele na nimokore hiron kayaa rambun na bu nda ma: i wanen hasai, ruka nokommon nilam wanen, yangko-yangko belerang wanen. Kuda na yun singa yun wanen, neuwara i bele ongkou bele belerang bele baleimeyate. 18 Nda yo bei yan bei i bele ongkou bele belerang bele kuda yoni-yoni euwara baleimeyate yae ro miyae fo name howaiboke. 19 Kuda yoni-yoni naei elae euwa eisa bele reme eisa bele. Na reme rami wanen, yun bele, na hului akende olumbo halumbo koumile.

20 Yo bei yan bei meungekene herewatera hiwa yo ehereiboi nekewate yo na me hila u hilara nei ehuweiboi mo kate, walobo yoni-yonire namman ei molaimi. Hoime bahe emasra, perakra, perunggura, rukara ora mokaiboke rambun ijokore erei, oboroi, ele mele okoyei yoni-yonire namman ei molaimi. 21 Nane merau ro miyae hoi-soisa, buloo mahi-mahi mokoi-mokoisa, yoko kaeimae koyatera, yokora, nebei yo nei ehuweiboi mo nekate.