1 Ro miyae mbemba yeufike huwate mai jemaat nolone ro mbai me u beko hele mokouboke, naekole miyae bele uwa mbainye honowote. Nebei u mekai na beko hele, Allahre oroiboi ro miyae nolone omokoyei ma, 2 nebeibe mayae namman ukaei kaeube! Na hele mai baka ranne honole mayae kena beko u beko kombe, nane merau nebei me u mokouboke ro mai jemaat u nolo u kaisa hukennehimbe enduwende. 3 Naendae wanen horo nda hee reyae mai u nolo u kainye enekeibe, nebeibe mai naeise u bene helen sele nekaise. Reyae mangkele mbainye nekande wanen nebei rore me nokanale. 4 Mayae Tuhan Yesusle Ro yae jemaat riya mokombombe hee reyae kelewamale are u bene nekenaisimbe nane merau aei Tuhan Yesusle elae hubanensimbe yane, 5 nebei rore beko hubannele naeise walobo yunde kinyennebombe. Nebei mekai yaere naei bekore kena haehae kole haraunge elaere beko yembonde, nane merau Yesus Wali Ondofolo bensonde mende hee nare hole molonnebonde.

6 Mai jemaatna uware kaeube u mekai foi ban sele. Ragi kaei-kaei yae tepung kaban mokoiboyeunge ohuleiboyele wanen mae, u mekai beko mokole ro mbai mokonnebonde mai jemaat kabanbe beko yembonde. 7-8 U mekai beko ro miyae mai jemaat nolora hukennehimbe, ragi male womombe wanen. Nendahina Yahudi ro miyae Mesir kanira aibaleke heena Allah ukeumi naei ragi nemene imaera hekelenaikonde nane merau bena fa-fare ohoise domba kelu honate yae imae romaufe na ha yae rilembonde. Nebei domba wanen mae Wali Ondofolo aei aerene haiboke. Nebeinya, men, Neyae mokouboke aerene eyae Yesusle einye aka baeke aeise naeise u bene yolo-yolo nekenaimele bele Wali Ondofolole na hele wali nibire hakomale bele yae rei mai komale. Mayae bekore benate me u omokoijae, nane merau u mekai beko omokoijae.

9 Moise wokandena homo moloukokale einye mare a usaei ukamale, yoko kaeimaere koyate ro miyae bele homo mbainye oroyeijae. 10 Nda kani kelana wali beko nibine orate ro miyae nanemene nebei a ma haraungebokale ban. Nebei ro miyae nda me u mokate: yoko kaeimae koyate, ro miyae naei rambunde kena haehae koyate ame-ame yae yarate, hoime bahere ei moloyaimi. Nda kani kelane nekaubene, nebei ro miyae nolone orombe hele. 11 Nebeibe raei mekai nda a mare haraungebokale wamale, ro miyae Wali Ondofolole eisa mai aka baeke yeubokere elelebe nebeibe yoko kaeimae kole, ro miyae naei rambunde kena haehae koyele, hoime bahere ei moloumi, ro miyae hiwa naeise a beko faeu beko huwele, keu bu mali kole, ame-ame bele, nebei u mekai bele ro miyae mangkele homo mbainye oroijae, nane merau raman mbainye aneijae.

12 Jemaat moinya ro miyae na walire hului koloremile naeise raei baka ranne ban, nebeibe jemaat nolona ro miyae na walire hului kolommile naeise mai baka ranne honole. 13 Jemaat moinye ro miyaere Allah yae me emminononde. Nebeibe Allahle homofaene nda mekai molaikoke, “Ro miyae u mekai bekore mokate yore mai u nolo u kaisa hukemmile!”* 5:13 Ulangan 17:7, 19:19