1 Saa yi, biakpi niinwuna kamɛ ta setokopĩ ku sikpile lee oso. 2 Diekye di obe nwu kamɛ yi, biatikanko kayi ka mmle sisuku kpile, biakyɔɔ kafɔɔ situmi se nikole ni sɛka di kɔfɛɛfɔ kamɛ ɔka atoko. Nnwɔɔ ninle ninwuna le nikɔbla ni ɔkpɛ di batii ba niesĩ nunua alɛ blɔkyɔɔ ni Yaa atoko kamɛ nɛ. 3 Nwaako bamuu loo nkpo buate fɛ mma nɛ. Buasiɛ nkpa di suoto sina loo akɔnsɔkleesaa suoto, buabla asaa ya di suoto sina loo ku disibu loo lamiɛ nii. Di obe wɔ di nkpa loo letembi ditakyi ni ku batii ba ninsi ni nkpa be mmle nwu okle oso yi, nse diesiɛko alɛ Yaa kananfi awo kafɔɔ kootoko fɛ batii bule fiɛ. 4 Kafɔɔ obe wɔ di Yaa nyaami ɔnya mpɔ ni oso, di lɛbɔmbɔ nɔɔ le akpe ɛɛta wo ni kafɔɔ lemuɔ ni oso yi, 5 obe wɔ buaakpi ni niinwuna kamɛ ta setokopĩ loo oso, eekplesa wo ɛɛwako nkpa kamɛ ku Kristo. Yaa sibualɛ oso buɔwɛ didiki le mmle. 6 Di onwii loo ɔbla ku Kristo Yesu, Yaa lɛsɛnkɛsa wo eekyeko bakpi kamɛ alɛ, bualeko nwɔ sɛka di osi. 7 Yaa labla nle mmle alɛ ɔɔyɔ antuo batii ba babalofo ni kaayi kamaa alɛ, sibualɛ se eele wo ni nnaa kaloo di lɛbɔmbɔ le eediki eetuo wo ni di Kristo Yesu kamɛ.

8 Diekye Yaa niele wo sibualɛ eediki wo diefe ni di ofũ onu kamɛ. Diele awo bamu niɛbla lɛsalɛsaa, kafɔɔ Yaa lɛkyɛsaa dile. 9 Nkpo okle kafɔɔ ninanle awo bamu ɔkpɛ ɔbla kuonwii nɛ. Nkpo oso, kuonwii dilaafuo ɔkanta. 10 Yaa omu niɛbla wo ku nnɛɛ nɔɔ diefe ni di Yesu Kristo suoto alɛ, buabla onwii ku nnwɔɔ alɛ buabla sɛkpɛ biene se eelolaa ɛɛtɛ wo alɛ buabla ni ninkpa be mmle kamɛ.

11 Binyuma bilɛ, diele Yuda batii nielofo ye. Yuda batii nwu niebudi ni asɔkɔsɔkɔ ntufa ye alɛ, kale ka batii ninambudi ni asɔkɔsɔkɔ. Kafɔɔ lɛsɔkɔsɔkɔ obudi ɔsaabla wɔ mmle yi, suoto sina lɛsaa ko dile. Batii ko nin-yɔ nnɛɛ lɛma mambla. 12 Binyuma bilɛ di obe nwu nkpo kamɛ, minko Kristo ntɛɛ lakyo, bafɔɔ kafɔɔ biale biata Yuda kale batii. Bitasiɛ di ɔlaa wɔ di Yaa labuɛ aatɛ ni batii nɔɔ ku kanya ka aanii ni ku mma kamɛ. Biasiɛ kaayi ka mmle kamɛ di osuku onyu kuonwii ditawɛ ye diata ni lɛsalɛsaa, Yaa kafɔɔ ditawɛ ye. 13 Kafɔɔ nunua, aye ba niawɛ ni fanfa di Kristo Yesu nfũ, ta kukpi ko aakpi ni diisi lee oso, bitookpukuti biɛtɛɛtɛɛ nwɔ.

14 Diekye Kristo omu ntɔɔwako wo atoko ɔkyɛ ole di obe wɔ atɔɔyɔ Yuda batii ku mba ninanle ni Yuda batii ɛɛbla ni batii banwii. Aayɔ suoto nɔɔ sina aadiki kalɔ ka niasiɛ ma ni nintɛɛ fɛ oyiyiɛ. 15 Eediki Yuda batii kufiofa ku ɔsaabla lɛma nwu nkpo alɛ, aasiisa nnle nnyɔ batii ba mmle nwu nkpo ambla ma kale fɔle batii banwii, diefe ni di suoto nɔɔ, alɛ atoko ɔkyɛ ole kasiɛ ma nintɛɛ. 16 Kristo kukpi di kowoso suoto niɛkpanaa kalɔ ka niasiɛ ni di nnle nnyɔ nwu nkpo ntɛɛ, eelolaa ma ɛɛbla ma onwii eekplesa ma ɛɛwako Yaa nfũ. 17 Nioso di Kristo lawa abayie atoko ɔkyɛ ole ɔlaa biene nwu nkpo lɛkya aata aye ba niawɛ ni fanfanfa di Yaa nfũ ku awo ba niatɛɛtɛɛ nwɔ ni nɛ. 18 Diefe ni di Kristo suoto ni di akyuu loo nwu nkpo anyɔ, dile ni Yuda batii ku mba ninanle ni Yuda batii, buɔwɛ Ninwuna Klekle ninwii nwu nkpo lɛkpaa wo diɛwako Teete anu nɛ.

19 Nkpo oso aye ba ninanle ni Yuda batii yi, biesinle bafɔɔ, ee osuku bakyɛntɛ ba nikɔwaalɛ manfe nii. Kafɔɔ nunua yi, minko Yaa batii yi, bitookple kale kanwii batii, ku Yaa kafaabi. 20 Aye kafɔɔ beetofo ye beetika di lɛsɔse le suoto di batɔkyɛntɛ nwu nkpo ku Yaa ɔlaa babuɛtɛtɛ letofo nii, ni di Kristo Yesu omu nle leyokɔ kleetɛ nɛ. 21 Nnwɔɔ ninle otii wɔ niemufũ leyo nwu nkpo beetofo bɛɛkyasa ni akle nɛ. Ni ɛɛta ni diɛbamuɔ diekple Olekatakɔ klekle diɛta Saate nɛ. 22 Di obe wɔ biɛbla ni onwii ku Kristo oso, ni bɛɛyɔ ye kafɔɔ beetofo leyo nwu nkpo ku batii bule bamuu alɛ buakple nfũ di Yaa kafe ni Niinwuna nɔɔ suoto ansiɛ nii.