4
1 Maijaꞌquë pëa huajë hue̱ꞌñana cacaye ca nëoseꞌe paꞌiji. Ja̱je paꞌina, caꞌrajë deꞌoyerepa ñañuꞌu, mësaru acohuaꞌipi tsoe caraja̱ji cajë ja̱ pëa huajëyere ti̱ꞌañe pamaꞌcohuaꞌini cajë. 2 Ja̱ohuaꞌire huaso coca quëaseꞌeje̱ paꞌye cuiꞌne maire quëahuë. Ja̱je paꞌiquëtaꞌare ja̱ohuaꞌipi Maijaꞌquëre paꞌire paji cuasa ti̱ꞌañe pa̱huë. Ja̱ doꞌire co̱caiye pa̱pi, huaso coca asaseꞌe. 3 Ja̱je paꞌiquëtaꞌare mai paꞌiji cuasasicohuaꞌi cato pëa huajë hue̱ꞌñana cacaja̱ꞌcohuaꞌipi paꞌiyë. Ja̱ ayere Maijaꞌquë ñeje ca nëopi:
Ja̱ doꞌire ja̱ohuaꞌire, yëꞌëpi pë̱i ca nëohuë,
cacaye pa̱jaꞌcohuaꞌi aꞌë, yëꞌë pëa huajë hue̱ꞌñana.
Maijaꞌquë cato iye yeja deꞌhua tëjisi macapi pëa huajë huëopi. 4 Ja̱je paꞌina, yequë hue̱ꞌña toyaseꞌe caji, ñeje siete muꞌse ayere:
Diusu siete muꞌse acona pëa huajëpi, siꞌa coꞌamaña ne tëjini.
5 Toyaseꞌe ti̱jupë ca co̱ji:
Yëꞌë pëa huajë hue̱ꞌñana cacaye pa̱jaꞌcohuaꞌi aꞌë.
6 Ja̱je cani caji, ja̱ yëꞌtaꞌa yecohuaꞌi cacaye paꞌiji, pëa huajë hue̱ꞌñana caquë. Duꞌru macarepa huaso coca asasicohuaꞌi cato, i̱ohuaꞌi deꞌoye i̱te i̱re papi cuasamaꞌpë sehuocaiye pa̱si doꞌire cacaye pa̱huë. 7 Ja̱je paꞌina, Maijaꞌquëpi ti̱jupë yequë caca muꞌse paꞌija̱quë ca nëopi. Iye muꞌse i̱ti muꞌse aꞌë, caquë. Ja̱je paꞌina, Maijaꞌquë maire caji, David tsoe hue̱ꞌña caquë paꞌiseꞌeja̱ꞌa ja̱ toyaseꞌepi caji, ñeje:
Iye muꞌse Maijaꞌquë caye asasicohuaꞌi pani
jëa joñoa nemaꞌpë deꞌoye sehuojë paꞌijë̱ꞌë.
8 Ja̱je paꞌina, Josuépi Israel pa̱ire pëa huajëye i̱sisiquë paꞌito Maijaꞌquë ti̱jupë yequë muꞌse paꞌi ja̱ꞌñere caye pa̱ꞌrapi. 9 Ja̱je paꞌito ja̱ yëꞌtaꞌa paꞌiji, Maijaꞌquë pa̱i cacani pëa huajë jaꞌye. 10 Ja̱je paꞌina, Maijaꞌquë pëa huajë hue̱ꞌñana cacaquë cato coꞌamañare ne tëjini pëa huajësiꞌquë cacaji, Maijaꞌquë coꞌamaña ne tëjini pëa huajëseꞌeje̱ paꞌye. 11 Ja̱je paꞌina, mai tutu yoꞌoye paꞌiji, ja̱ro pëa huajë hue̱ꞌñana cacañuꞌu cajë, tsoe ja̱ꞌnë acohuaꞌi Maijaꞌquëre coca nuñere paꞌë cuasamaꞌpë yoꞌoseꞌena tuiye pa̱ñuꞌu.
12 Maijaꞌquë coca cato paꞌiye aꞌë cuiꞌne tutu quëꞌye aꞌë, siꞌa te̱ꞌña huaꞌti niusico jë̱jësë̱ñe se̱ña maca jë̱jësë̱ñe aꞌë. Ja̱je paꞌyepi pa̱iseꞌe cuasaye cuiꞌne mai joñoa sa̱ꞌnahuërepa cuasayena jo timeñe aꞌë. Ja̱je yoꞌoquë mai cuasayere cuiꞌne mai yoꞌoñuꞌu cuasayere ti̱ña macare pana eto i̱ñoñe aꞌë, joyo cuasayere. 13 Ja̱je paꞌina, peoji, Maijaꞌquë deꞌhuaseꞌepi i̱te catiye. Siꞌaye mai yoꞌoye ti̱ña macare pare paꞌiji, i̱ ña hue̱ꞌñare. Ja̱je paꞌina, i̱na siꞌaohuaꞌi yoꞌoseꞌe i̱ñojaꞌquë aꞌë.
Jesu Api, Maijaꞌquë Huëꞌe Ñacaicohuaꞌi Ëjaërepa
14 Jesu api, Maijaꞌquë mamaquë Maijaꞌquë huëꞌe ñacaicohuaꞌi Ëjaërepa, mai mëñe quëco pajë paꞌiquë. Ja̱ëpi Maijaꞌquë ña hue̱ꞌñare pare cacani paꞌiji. Ja̱je paꞌina, mai i̱te ti̱ꞌañuꞌu cajë yoꞌoyere je̱omaꞌpë o̱cue paꞌi macarepa yoꞌojë pañuꞌu. 15 Maijaꞌquë huëꞌe ñacai Ëjaëre papi mai tutu peoye teaye ñani co̱casipi, mai ai yoꞌoyeje̱ paꞌye siꞌaye neñañe paꞌina, ai yoꞌoquë tëto saisiquëpi. Ja̱je paꞌiquëtaꞌare ja̱ë cato coꞌaye ti yoꞌomaꞌë pajiꞌi. 16 Ja̱je paꞌiye sëte quëcojë tsioja̱ñuꞌu, maire oiquë Diusu ñuꞌi hue̱ꞌñana, i̱pi maire teaye ñani oi co̱caija̱ꞌquëre deꞌoyepi mai ai yoꞌo maca ti̱ꞌaëna.