10
Waiq Xìn Chuaq Jêh Đac Mangai Ngang Dù
1 Chuaq ôi! Gleq Ìh yòng ŏi hangai?
Gleq Ìh cadoc Dađeh jò nhèn glàm bìac xa nan?
2 Mangai dù tiaq dèh manoh dù axan mangai pabônh.
Broq ca wì haq 'bìq hlech manet ta bìac dù cla wì haq khoi 'nac.
3 Ma jah 'màng aih mangai dù catèh wa padèch manoh loq ham enh da wì haq,
mangai ham ca cùng hang èh waiq hanip Boc Plình wa jù lê Haq.
4 Mangai dù toq catèh dađeh, ùh chaq Boc Plình,
ŏi ta rìm bìac da manoh haq hèm: “Ùh i ca Boc Plình.”
5 Bìac broq da haq xôq jah padrŏng can,
bìac hadrah da Chuaq dìq jaq ha'nhèq ca haq,
haq hèm ùh trùh, haq do lê dìq ca mangai ma tagit ca haq.
6 Haq hèm ta manoh, doi: “Ùh i bìac cleq broq ca au tadroq;
ta dìq ca 'nhòng da au, au ùh jò leq glàm bìac nan xa.”
7 Hacùng haq bình halùih bìac waiq hanip, amòng 'nùt wa hacam;
bìac ngan dù ŏi enh ca'nàm rapet haq.
8 Haq gòm rap rìm plài;
Enh nòi hlèp haq jêh đac mangai ùh broq tôiq cleq,
mat haq rinh ngan wì mangai ìuq hamoq.
9 Haq mot hlèp tìah ca baco hlari gòm rap nòi còp hmu,
đòiq rùp mangai ìuq hamoq dùng 'mùt dèh ta hlàm.
10 Mangai ùh nèn 'bìq padit,
cro, wa clìh mùt ta tì wì dêh padren.
11 Haq hèm ta manoh, doi: “Boc Plình khoi hèt.
Boc Plình khoi ŏi hangai, ùh jò leq jah ngan hnoq.”
12 Chuaq ôi, xìn Ìh yòng beq. Boc Plình ôi! Xìn Ìh hnhu tì beq.
Xìn Ìh paq hèt ca mangai 'bìq padit padiang.
13 Gleq mangai dù ma jù lê Boc Plình?
Taiq haq hèm ta manoh, doi:
“Boc Plình ùh jò leq hadrah bìac aih!”
14 Ìh khoi hnoq; Ìh khoi achìh đòiq ta tì Ìh dìq ca bìac nan xa wa bìac mango đòiq tabroq hlài. Mahaq mangai ìuq hamoq am dađeh ca Ìh; Ìh hloi hloi jùp đò mangai lac.
15 Xìn Ìh goh đac cŏng tì mangai dù,
ti chaq bìac dù da mangai dù trùh jò leq pi hnoq hòm.
16 Chuaq, Haq Bùa hloi hloi,
rìm Diac khoi 'bìq raliang đac khoi ca taneh Diac da Haq.
17 Chuaq ôi, Ìh khoi tamàng bàu waiq dang da mangai habùat,
đòiq wì haq jah cajap manoh; joq 'nàng Ìh cachình don tamàng wì haq.
18 Đòiq hadrah ta-atoq ca mangai lac wa ca mangai 'bìq padit padiang,
'màng aih mangai crŏng taneh cô pi jah broq bìac yùq crè ca wì haq hòm.