78
Boc Plình 'Nong Jàn Haq
Asap Achìh
1 Ôi jàn da Au, tamàng bàu hnài da Au oq;
cachình don beq, tamàng bàu loh enh hacùng da Au.
2 Au jah hah hacùng hnài bàu rabiaq,
wa paro bàu bòch da wì mangai calah,
3 aih bìac ma bèn khoi jah loq,
jah tàng boc yaq bèn calah nèh khoi ta'mon hlài.
4 Bèn ùh cadoc cleq bìac cô ca con xau bèn,
mahaq anoi hlài ca 'nhòng ma atìq Chuaq đang ca manè padèch,
cwìang itai Haq,
wa rìm bìac halac ma Haq khoi broq.
5 Haq broq wêh jao Haq ca Jacôp
wa tah am ranenh Haq ta Is-ra-ên.
Haq thê boc yaq bèn phai hnài hlài ranenh
ca con xau wì haq,
6 đòiq 'nhòng ma atìq, aih 'bài con xau 'nhòq xa-ông,
jah loq ca ranenh,
khoi èh trùh ca wì haq jah hnài hlài con xau dađeh.
7 Waq ca wì đòiq manoh canòm nòi Boc Plình,
ùh hèt ca bìac Haq khoi broq,
hi dì tiaq bàu thê Haq.
8 Èh wì ùh hìaq tìah ca boc yaq wì,
aih 'nhòng ma dìq jaq cadoq manoh wa tajraq hlài;
mòiq 'nhòng ùh padon manoh enh lùi,
wa ùh wèq dèh bàu enh ngìa ca Boc Plình.
9 Con xau Ep-ra-im tôm tàu ranac panenh,
mahaq cadàu mot ta hì tajêh poh.
10 Wì haq ùh wèq bìac wêh jao da Boc Plình,
ùh enh rìh tiaq sech ranenh.
11 Wì khoi hèt đac rìm bìac ma Chuaq khoi broq
wa bìac halac ma Haq khoi pa'noh ŏi ta'ne wì.
12 Chuaq khoi broq bìac halac enh ngìa ca boc yaq bèn ta diac Aicàp,
nòi đùng tamang Xôan.
13 Chuaq khoi lah diac broq baiq đòiq con jàn Haq jah lam cwa,
wa broq diac yòng tìah ca panàt.
14 Dahì Chuaq 'nong trong ca wì xam yùc;
damang Haq 'nong trong ca wì xam can 'ngah da ùnh.
15 Chuaq pah hmu ta đùng braih càn,
đòiq wì haq jah ôq diac tôm tàu enh jrùq tŏc.
16 Chuaq broq diac jah plôh loh enh crŏng hmu,
diac loh bu dàng diac cròng.
17 'Nhac ca 'màng aih, mahaq wì haq xôq broq tôiq ca Chuaq;
ta đùng braih càn wì haq blàq manoh ca Chuaq Ma Yi Ha'nhèq.
18 Ta manoh wì haq to enh thù Boc Plình,
bòch dahwèq caq ma wì haq enh caq.
19 Wì haq capoch tajraq hlài ca Boc Plình doi:
“Boc Plình jah am caq hiniang ta đùng braih càn ùh?
20 'Nhac ca Haq khoi blai hmu wa diac plôh loh enh crŏng hmu tìah ca diac cròng;
mahaq Haq jah i 'benh wa jam caq ca con jàn Haq ùh?”
21 Jò tàng bàu aih Chuaq dìq jaq nòih,
ùnh plôh tŏc bùh Jacôp, Haq hadai nòih ca Is-ra-ên.
22 Ma jah 'màng aih taiq wì haq ùh canòm ca Boc Plình,
hadai ùh lùi trùh bìac dèch claih da Haq.
23 'Nhac ca 'màng aih Chuaq xôq thê yùc
wa thê 'mang ta plình pèh ca wì haq.
24 Haq ùc 'noh Mana tìah ca mè loh ca wì haq caq,
am dahwèq caq enh plình ca wì haq.
25 Rìm ngai jah caq 'benh da 'bình plình,
Chuaq am dahwèq caq tôm tàu.
26 Chuaq broq cayeo pah mat mahì loh hlôi trùh,
wa creo ca cayeo pah 'ma ca mat mahì loh.
27 Chuaq am mè jam trùh ta wì haq tìah ca blo taneh,
wa chìm pan trùh bàc tìah ca braih diac raxìq.
28 Chuaq am chìm clìh ta'ne nòi traiq,
wa dudan ca nòi wì haq ŏi.
29 'Màng aih wì haq jah caq jam tàu tìa,
ma jah 'màng aih Chuaq khoi am ca wì haq dahwèq caq tiaq wì haq ma loq enh.
30 Mahaq adroi ca wì haq caq tiaq dìq ca can enh,
dahwèq xôq ŏi raq ta hacùng,
31 Boc Plình khoi nòih ca wì haq;
Chuaq jêh đac mangai ma yi tadêh ta wì haq,
wa raliang đac mangai yi lem da Is-ra-ên.
32 'Nhac 'màng aih wì haq xôq broq tôiq,
xôq ùh lùi bìac halac ma Chuaq khoi broq.
33 Taiq 'màng aih Chuaq broq ca hì khê da wì haq hnhung đac bu dàng hòi hihèm,
wa hanam da wì haq lùch ta bìac 'mèq ramòt.
34 Jò Chuaq baxèm jêh đac wì haq, èh wì haq chaq Chuaq,
cađac dèh manoh broq tôiq wa dìq ca manoh chaq Chuaq.
35 Jò aih wì haq hi hmàng Boc Plình raq cato hmu hanình da wì haq.
Boc Plình Ma Yi Ha'nhèq, Haq raq Chuaq Rŏt Dèch Hlài wì haq.
36 Mahaq wì toq yŏc hacùng 'nùt Chuaq,
wa xam rapet wì haq cwàiq amòng ca Chuaq;
37 taiq manoh wì haq ùh cajap ta Chuaq,
hadai ùh wèq bìac wêh jao da Haq.
38 Mahaq nhò manoh xa-ŏch da Chuaq,
Chuaq baxŏng bìac ngang dù da wì haq,
ùh jêh đac wì;
bàc yàng Chuaq ran àt dèh can nòih Haq,
ùh pa'noh dìq ca wì.
39 Ma jah 'màng aih Chuaq hmàng hlài wì haq joq 'nàng con mangai toq chac xech,
bu dàng cayeo hlôi cwa, ùh jò leq wìh hlài.
40 Khoi bàc yàng wì haq yòng blàq Chuaq ta đùng wang wê,
broq mango ca manoh Haq ta nòi đùng braih càn.
41 Rai èh rai bàc yàng wì haq xôq enh thù Boc Plình
wa taleoq ca Chuaq Hadròih da Is-ra-ên.
42 Wì haq ùh hmàng trùh ca cwìang itai da Chuaq,
loq hì ma Chuaq dèch wì haq claih ca mangai ma padit padiang,
43 jò Chuaq khoi pa'noh bìac cwìang itai Haq ta diac Aicàp,
wa bìac halac Haq ta đùng tamang Xôan.
44 Chuaq broq ca diac da mangai Aicàp loh wìa mahem,
'màng aih wì ùh jah ôq.
45 Chuaq thê roi trùh cap wì haq,
wa kìt đùng trùh broq raliang ca wì haq.
46 Chuaq am dahwèq wì haq ca lìp caq,
wa plì long wì haq ca lìp tùc.
47 Chuaq broq raliang wia nho wì haq xam mè preo,
wa long plì pŏc xam mè preo.
48 Chuaq am ngè aban da wì haq ca mè preo,
wa trìu da wì haq ca cađah wa camlet.
49 Chuaq ùc 'noh ùnh can nòih ta wì haq,
can waiq hanip wa bìac 'mèq ranàc,
aih Chuaq thê mòiq lù 'bình plình trùh đòiq jêh đac wì haq.
50 Chuaq đòiq ca can nòih haq tabroq tajêh ca wì,
ùh baxŏng tôiq ca wì haq,
mahaq am wì haq ca can hinìq ramòt.
51 Chuaq jêh đac con ramua da mangai Aicàp,
aih wì mangai ramua tadêh da traiq Ham.
52 Chuaq ajènh dèh jàn Haq loh lam bu dàng ajènh lù trìu,
Haq 'nong wì ta đùng wang wê bu dàng 'nong ngè aban lù trìu.
53 Chuaq 'nong wì haq dìq jaq catèm, wì ùh loq yùq crè cleq,
mahaq diac raxìq glàp đac mangai ma tagit ca wì haq.
54 Chuaq 'ràng wì haq trùh nòi taneh hadròih,
nòi ma tì pah 'ma da Chuaq khoi blah yŏc.
55 Chuaq hnan đac wì jàn 'noiq enh ngìa ca wì haq;
pàih panàih axong đùng taneh da wì haq broq xôxech,
Chuaq am 'bài hadròng hadrech da Is-ra-ên ŏi ta hnem traiq da 'bài jàn aih.
56 Mahaq wì haq khoi xôq thù Chuaq
wa yòng blàq manoh ca Boc Plình Ma Yi Ha'nhèq,
ùh wèq ranenh da Haq.
57 Wì haq wìh manoh broq tiaq boc yaq da wì haq,
wì haq tawìh tìah ca panenh 'bìq tawech.
58 Wì haq broq ca Chuaq nòih xam broq hnem đòiq tadreo kiac dù,
wì broq ca Chuaq loh tagrình taiq dua 'mù ma wì haq cùh waiq.
59 Jò hnoq bìac aih, Boc Plình dìq jaq nòih,
Haq dìq ca manoh git jàn Is-ra-ên;
60 'Màng aih Haq cađac dèh nòi ŏi da Haq ta Silô,
aih hnem traiq cùh waiq Haq tah ta'ne con mangai.
61 Chuaq đòiq ca wì ma tagit ca Haq yŏc Hom Wêh Jao, nòi i tadêh càn da Haq;
aih raq bìac 'ngah 'ngai wa cwìang itai Haq.
62 Haq jao am jàn Haq ca chang gùm,
Chuaq dìq jaq nòih ca xôxech da Haq.
63 Gù radam dìq khoi 'bìq bùh đac xam ùnh,
taiq 'màng aih wì mangai adrùh ùh i ca mangai broq ŏng.
64 'Bài pajàu da Chuaq dìq cachìt ca chang gùm,
mahaq mai da wì haq pi nui crò hmoi.
65 Èh Chuaq rìu enh cùi tìah ca mangai tadêh rìu
enh cùi atìq ca khoi bù.
66 Chuaq cachùt lùi đac mangai ma tagit,
broq ca wì haq hloi hloi 'bìq camaih.
67 Chuaq hadai 'noh đac xinoi da Jôsep,
ùh ràih hadròng hadrech Ep-ra-im,
68 Mahaq Chuaq dèch hadròng hadrech Juđa
wa wang Siôn aih nòi Haq loq waq.
69 Chuaq broq hnem cùh waiq da Haq tìah ca plình ha'nhèq,
tìah ca plì taneh ma Haq khoi broq cajap hloi hloi.
70 Chuaq hadai ràih Đawit broq hapŏng Haq,
Chuaq dèch haq enh cadrong trìu;
71 enh bìac ngan wèq lù trìu,
Chuaq dèch haq ngan wèq hnem Jacôp, jàn da Chuaq,
wa wèq ngan jàn Is-ra-ên, aih xôxech da Haq.
72 'Màng aih, Đawit yŏc dèh manoh joq 'nàng đòiq wèq ngan wì haq, wa taiq dèh can khôn rabiaq Chuaq am đòiq wèq cwìang wì.