58
Bàu Waiq Xìn Bìac Ta-atoq
Đawit Achìh
1 Ôi 'bài con calô da mangai, jò pì ùh capoch cleq aih pì joq 'nàng hadrah ta-atoq ùh?
Pì joq 'nàng hadrah ta-atoq ùh?
2 Ùh, ma jah 'màng aih bìac dù khoi ŏi ta manoh pì,
tì pì broq bìac baxa đòiq padit con mangai.
3 Mangai dù khoi dù jò ŏi ta cliac miq haq;
mangai capoch amòng, khoi i manoh loq amòng enh jò 'nang xa-ông 'noh.
4 Nŏc đùc da wì haq tìah ca nŏc đùc da bìh tùa,
wì haq tìah ca bìh khoi clìch don, ùh enh tamàng cleq,
5 Ùh tamàng mangai padô bìh,
'nhac ca mangai aih padô thài dàng leq.
6 Chuaq ôi, xìn tùq padah hanenh ta hacùng wì haq;
Chuaq ôi, xìn goh đac hanenh hapoh da baco hlari bu chuai.
7 Waiq xìn wì haq jah 'nong lam đac tìah ca diac hìu.
Jò haq 'nac panenh penh rang, ngèh enh rang haq 'bìq tagoh đac.
8 Waiq xìn wì haq bu dàng canhuh jah hech đac jò moq lam,
tìah ca mangai cadrì ralàih jò ŏi jiang, con nga ùh lah hnoq mat mahì.
9 'Nhac ca wì ŏi thì loq khoi craq,
Chuaq jah hwit hnan đac
wì haq renh yi hnao ca gŏc tôq enh 'nhèq ca brech breo 'nang cheo.
10 Mangai ta-atoq jah lem bùi jò hnoq bìac tabroq hlài,
haq jah 'nheo jènh dađeh ta mahem mangai dù.
11 Wì doi: “Joq 'nàng mangai ta-atoq jah nhàn baha am dech;
joq 'nàng i Boc Plình,
Haq hadrah crŏng taneh!”