41
Đawit Mamùc Taiq i Mangai Git
Đawit Achìh
1 Xôq ramŏt ca mangai leq loq hèm trùh ca mangai pa hamoq,
ta jò nan xa Chuaq jah dŏih dèch haq.
2 Chuaq wèq ngan haq, wèq ngan 'nhòng rìh haq;
ta crŏng taneh haq jah creo: mangai jah xôq ramŏt.
Chuaq ùh 'mùt haq mùt ta ti wì mangai ma git ca haq.
3 Chuaq wèq ban haq jò haq ùh hrŏc cùi ta jùang,
broq brêh ca haq jò glàm bìac hinìq tôq.
4 Mahaq au, Chuaq ôi! Xìn Ìh xa-ŏch ca au,
broq brêh ca au, ma jah 'màng aih au khoi broq tôiq enh ngìa ca Ìh.
5 Wì mangai ma git ca au waiq hanip au rai doi:
“Jò leq haq cachìt, wa xinoi haq cô èh 'bìq jêh đac?”
6 Jò haq trùh hmàih ca au, haq toq capoch bàu 'nùt;
manoh haq gop yŏc bìac dù;
jò haq loh bu khoi ca hnem au, haq khoi capoch 'mèq.
7 Wì mangai git ca au, bahech ca dabau chaq trong ta'blêq ca au,
ngèh enh bìac 'mèq trùh ca au.
8 Wì doi: “Haq khoi glàm hinìq tôq hlàc,
haq ùh nui yòng dèh enh nòi haq cùi.”
9 Hloi xam bua da au ma au lùi canòm,
ma khoi caq pua au,
xôq wìh hlài tajraq hlài ca au.
10 Mahaq Chuaq ôi! Xìn Ìh xa-ŏch ca au,
dèch au yòng đòiq au jah ca'naih hlài ca wì.
11 Au loq au khoi jah lem manoh Chuaq,
taiq Ìh ùh am mangai git ca au 'blêq au.
12 Mahaq au, nhò bìac ta-atoq da au,
'màng aih Chuaq dèch au; Ìh hloi hloi đòiq au enh ngìa ca Ìh.
13 Manè padèch Chuaq, Boc Plình da Is-ra-ên,
Haq rìh enh cô trùh hloi hloi!
Amen! Amen!