33
Bàu Manè Pôi Chuaq, Haq Broq Loh Crŏng Taneh
1 Ôi mangai wèq dèh bàu, calêu lem bùi ca Chuaq beq.
Calêu padèch hiniq Haq, aih bìac tajì ca mangai lem jang.
2 Yŏc ranac cràu rawêh calêu manè pôi Chuaq beq,
calêu padèch hiniq Haq xam broc 10 hadrang caxi.
3 Calêu ca Haq mòiq 'bŏi calêu ma neo!
Rawêh nhŏc ma dìq jaq rangot oq, èh 'noh bàu dêh calêu manè lem bùi.
4 Ma jah 'màng aih bàu Chuaq aih lem jang wa troq,
rìm bìac broq da Haq dìq wèq dèh bàu.
5 Chuaq loq waq ca bìac ta-atoq wa lem jang;
crŏng taneh bình halùih ca can xa-ŏch xam manoh loq waq da Haq.
6 Nhò Bàu Chuaq, dìq ca plình khoi jah broq gêh,
wa nhò hihèm da hacùng Chuaq,
mat mahì, mat khê wa dìq ca halŏng khoi broq loh.
7 Chuaq tagop diac raxìq ŏi tang 'ngùc,
Haq đòiq diac ŏi tang nòi jrùq.
8 Dìq ca crŏng taneh phai loq iu Chuaq beq,
dìq ca con mangai phai yŏc manoh hamàih loq yùq crè ca Haq beq.
9 Ma jah 'màng aih nhò mòiq bàu capoch da Haq rìm bìac khoi jah i;
nhò mòiq bàu thê da Haq, rìm bìac khoi jah yòng cajap.
10 Chuaq raliang đac bìac pađim dù da mangai 'bài Diac 'noiq
wa broq manhài bìac hèm broq da 'bài jàn.
11 Bàu hnài tanap da Chuaq jah yòng cajap hloi hloi;
bìac broq da manoh Haq jah ŏi hloi hloi ta rìm 'nhòng.
12 Xôq ramŏt ca mangai leq jah Chuaq broq Boc Plình ca dađeh;
tamoi leq jah Haq ràih broq xôxech, aih dìq jaq xôq ramŏt.
13 Enh plình Chuaq jah hnoq rìm
ngai ta crŏng taneh.
14 Enh nòi Haq ŏi, Haq jah ngan wèq dìq
ca con mangai crŏng taneh.
15 Cla Chuaq raq ma am manoh ca con mangai,
'màng aih Haq ngan hnoq rìm bìac broq da wì.
16 Bùa jah dèch claih ùh xài taiq haq i lù lình bàc;
mòiq ngai lình dêh ùh xài jah claih nhò padren dêh da haq.
17 Canòm ca axêh xoh dađeh jah ta'blêq, aih ngèh enh dech 'ngwan;
'nhac ca haq dêh xôq ùh jah dèch dŏih xam can dêh da haq.
18 Ngan cô, mat da Chuaq ngan hnoq mangai loq yùq crè ca Haq,
wa mangai loq canòm can xa-ŏch xam manoh loq waq da Haq,
19 đòiq dèch mahua yiang wì haq claih ca can cachìt
wa wèq chac hamac wì haq claih ca bìac pangot hrah.
20 Mahua yiang da nhèn gòm canòm Chuaq,
Haq raq ma wèq ban nhèn wa broq khìan ca nhèn.
21 Taiq ŏi ti Haq manoh nhèn jah lem bùi,
ma jah 'màng aih nhèn lùi canòm ca hiniq hadròih da Haq.
22 Waiq Chuaq xìn can xa-ŏch xam manoh loq waq da Chuaq ŏi ti nhèn,
tiaq ca bìac ngèh enh da nhèn ŏi nòi Ìh.