21
Manè Pôi Boc Plình Khoi Dŏih Dèch
Đawit Achìh
1 Waiq Chuaq, nhò padren dêh da Ìh ma bùa jah lem bùi,
nhò bìac dèch claih Ìh ma bùa jah manè bùi ta manoh.
2 Ìh khoi am ca haq rìm bìac haq ma ngèh enh.
Ìh hadai ùh hangah ca bìac haq ma dang xìn Ìh.
3 Ma jah 'màng aih Ìh dìh yŏc haq xam xôq ramŏt;
Ìh pacôi ca haq cadoh bùa broq xam wang.
4 Haq xìn Ìh can rìh, Ìh khoi am ca haq.
Ìh am tam ca haq jah rìh halình dùnh.
5 Nhò bìac dèch claih da Ìh, haq jah 'bang tìang caiq càn.
Ìh caxùnh ca haq can rahù ranhòm.
6 Joq 'nàng Ìh am ca haq hloi hloi jah xôq ramŏt,
enh ngìa ca Ìh haq jah i bìac lem bùi.
7 Ma jah 'màng aih bùa canòm nhò ca Chuaq;
nhò can xa-ŏch xam manoh loq waq da Chuaq ma Yi Ha'nhèq,
haq ùh jò leq 'bìq dalàc.
8 Tì da Ìh jah rùp dìq ca wì ma tajraq hlài ca Ìh,
wa tì pah 'ma da Ìh jah wèq cwìang dìq ca wì ma git ca Ìh.
9 Jò can nòih da Chuaq loh,
Ìh jah broq ca wì haq cheo tìah ca tanùh ùnh;
ta can nòih Ìh, Ìh jah lŏn wì haq,
ùnh jah cheo đac wì haq.
10 Ìh jah jêh đac con xau wì haq khoi ca crŏng taneh
wa palùch đac xinoi wì haq enh xinoi con mangai.
11 'Nhac ca wì haq hatình ca dabau broq pađim 'mèq tajraq hlài ca Ìh,
èh bìac ngang dù aih ùh jò leq jah broq gêh.
12 Ma jah 'màng aih Ìh jah broq ca wì wìh crŏng cadàu mot
taiq panenh ìh khoi hyot 'nac ta hadrò wì haq.
13 Chuaq ôi, Ìh jah padèch ha'nhèq xam padren dêh da Ìh;
Nhèn jah calêu manè Ìh taiq can cwìang itai da Ìh.