16
Chuaq Aih Xôq Ramŏt ca Mangai Leq Canòm ca Haq
Đawit Achìh
1 Boc Plình ôi, xìn Ìh wèq ngan au,
ma jah 'màng aih au canòm hanình ca Ìh.
2 Au khoi doi ca Chuaq: “Ìh raq Chuaq da au;
enh gùng ca Ìh au ùh i bìac lem cleq.”
3 Mahaq 'bài mangai hadròih ta crŏng taneh,
au padèch hiniq wì haq, đòiq bìac lem bùi da au nòi wì haq.
4 Bìac manoh mango rai bàc da wì aih taiq khoi tiaq can kiac,
au ùh dèch am bìac tadreo ca kiac da wì haq,
hacùng au ùh padèch hiniq wì haq.
5 Chuaq raq xôxech wa doi chrŏng da au;
Haq wèq ban cùng hang da au.
6 Chuaq khoi acang am ca au nòi taneh dìq jaq jìang,
xôxech da au joq 'nàng lem lình.
7 Au manè pôi Chuaq, Haq hloi hloi pariaq au;
joq 'màng aih, jò damang manoh au xôq pariaq cla au.
8 Au hloi hloi đòiq Chuaq ŏi enh ngìa ca au,
Haq ŏi pah 'ma au, au ùh hìaq i jò leq 'bìq tadroq manoh.
9 'Màng aih manoh au lem bùi,
wa dìq ca mahua yiang au bùi;
chac au jah ŏi catèm.
10 Ma jah 'màng aih Ìh ùh cađac mahua yiang au loh ŏi hloi ta ralùng hanang,
wa hadai ùh đòiq Mangai Hadròih da Ìh 'bìq om hech ta ralùng hanang.
11 Ìh jah am ca au jah loq trong da can rìh;
enh ngìa Ìh i can bùi bình halùih; ta tì pah 'ma ca Ìh,
i can lem bùi hloi hloi.