3
Jê-rê-mi Chìuq Bìac Jìq Xa Da Is-ra-ên
1 Au cô mangai khoi lah jìq xa
enh 'neq ca long roi da can nòih Haq.
2 Haq khoi hnan đac au, thê au lam ta nòi clam clôiq,
ùh lam ta nòi i can 'ngah.
3 Joq 'nàng Chuaq khoi yŏc tì tajraq hlài ca au
bàc yàng xèq ca hì.
4 Haq khoi broq ca chac au loh ca ragìq ragôm wa croh crenh,
wa khoi goh đac caxènh au.
5 Chuaq khoi tàt au,
khoi clêh au xam bìac pagau pagùa wa bìac nan xa.
6 Haq cađac au ta nòi clam clôiq
tìah ca mangai cachìt khoi dùnh.
7 Haq broq pagia tap dudan ca au đòiq au ùh jah loh enh gùng.
Haq khoi broq caxi mem càt au loh ca trap.
8 'Nhac ca au cachech cajiah creo dang,
Haq bàng don ùh tamàng bàu au waiq khàn.
9 Trong au loh Haq yŏc hmu tàt đac,
trong au lam Haq broq loh ca tawech.
10 Haq tìah ca higàu ti rinh ngan au,
tìah ca baco cadoc dađeh gòm au.
11 Haq broq au lac trong lam,
khoi hit au loh tang ha'nech, cađac au ŏi mòiq ngai.
12 Haq 'nat panenh khoi yŏc au
đòiq broq nòi panenh Haq troq.
13 Haq yŏc rang enh cachùi
penh mùt ta manoh au.
14 Au khoi wìa mangai đòiq ca jàn au jah do;
wì calêu palèu au xèq ca hì.
15 Haq khoi ùc ta manoh au bìac pagau pagùa.
Haq khoi rùp au ep ôq pagiang xang.
16 Haq yŏc hmu raga goh hanenh au,
wa ep au cùp gàu ta blo taneh.
17 Mahua yiang au khoi hangai ca can catèm,
pi hmàng trùh bìac lem bùi, aih 'màng leq.
18 Au hèm ta manoh doi: “Jò lem jìang da au khoi dìq,
manoh ngèh gòm da au nòi Chuaq hadai pi i hòm.”
Ngèh Gòm Can Xa-ŏch Da Boc Plình
19 Xìn Ìh hmàng hlài bìac jìq xalep, bìac lam lìq lam làn,
bìac pagau pagùa, wa pagiang xang da au.
20 Joq 'nàng mahua yiang au hmàng dìq ca
bìac aih wa loh ca hŏnh.
21 Mahaq au hmàng trùh bìac cô,
èh bìac aih broq ca au jah i nòi ngèh gòm.
22 Joq 'nàng can xa-ŏch xam manoh loq waq da Chuaq ùh jò leq xŏt;
taiq 'màng aih can xa-ŏch da Haq ùh jò leq xŏt dìq.
23 Rìm daxroq dìq neo;
can loq wèq dèh bàu da Chuaq dìq jaq càn caiq.
24 Mahua yiang au doi: “Ta Chuaq aih cùng hang da au,
taiq 'màng aih au khòh dìq ca manoh canòm lùi Haq.”
25 Chuaq dìq jaq lem ca mangai leq loq gòm canòm Haq,
aih mangai hloi hloi chaq Haq.
26 Dìq jaq lem ca mangai leq ŏi hatenh gòm canòm
ca bìac dèch claih enh Chuaq.
27 Dìq jaq lem ca mangai leq chìuq bac long ech
enh jò ŏi 'yoh.
28 Đòiq haq ha'ngui hatenh mòiq ngai beq
ma jah 'màng aih Chuaq khoi thê haq bac long ech aih.
29 Đòiq haq bla-op hacùng ta taneh beq,
broq 'màng aih loq ŏi jah bìac ngèh gòm.
30 Đòiq haq am hadrò ca wì tep beq,
broq 'màng aih đòiq nhàn yŏc ca dađeh bìac camaih.
31 Taiq Chuaq ùh cađac hloi
mòiq ngai leq.
32 Tàng Haq loq broq ca bèn mango, Haq xôq loq waq,
Haq loq waq tiaq can xa-ŏch xam manoh loq waq bàc da Haq.
33 Ma jah 'màng aih Haq ùh loq enh baxa con mangai,
hadai ùh enh broq mango manoh ca con mangai;
34 jôiq enh 'neq ca jènh,
dìq ca mangai ŏi ta tù ta Taneh Diac,
35 Đòiq gùt 'bàt bìac ta-atoq da con mangai
enh ngìa ca Chuaq ma dìq jaq càn caiq ha'nhèq.
36 Tàng broq tawech bàu joq 'nàng jò bìac hadrah da con mangai,
aih bìac Chuaq ùh loq enh 'mòh?
37 Mangai leq jah thê mòiq bìac leq trùh 'mòh,
tàng ùh xài Chuaq thê bìac aih?
38 Ma ùh xài enh hacùng Chuaq ma dìq jaq ha'nhèq
jah loh bìac xôq ramŏt wa bìac ranàc 'mòh?
39 Gleq con mangai loq mamùc jò 'bìq baxa
taiq bìac tôiq lôi cla haq broq?
40 Bèn khòh ngan hlài ma geo dèh trong lam,
èh wìh hlài ta Chuaq beq!
41 Dèch tì ta Plình,
tawìh manoh ta Boc Plình, rai doi:
42 Nhèn khoi broq tôiq wa khoi tablàq ca Ìh,
Ìh 'nhòq baxŏng tôiq ca nhèn.
43 Ìh khoi glom Dađeh xam can nòih, èh ti axan nhèn,
Ìh jêh nhèn ùh toq xìt manoh loq xa-ŏch.
44 Ìh khoi cadoc dađeh ta yùc dìq jaq habàu,
waq ca bàu waiq khàn da nhèn ùh jah cwa.
45 Ìh khoi broq ca nhèn loh tìah ca cràc wa dahwèq pi wìa waq,
enh ngìa ca rìm jàn.
46 Dìq ca jàn ma tagit ca nhèn hah hacùng
tajraq hlài ca nhèn.
47 Bìac ralŏc wa bìac yùq crè loh ca nhèn,
bìac jêh đac wa raliang piang.
48 Mat au khoi loh diac cròng,
taiq bìac cachìt khoi ùc 'noh ta jàn au.
49 Mat au loh diac ùh xŏt,
hoch tiaq hadrò ùh loq dìq.
50 Trùh jò leq Chuaq
enh Plình cachình mat ngan hnoq.
51 Mat au broq ca mahua yiang au loq jìq
taiq khoi ngan hnoq bìac camaih khoi trùh ca dìq dŏng con cadrì ta phôq au.
52 Dìq ca mangai tagit au
ti axan au tìah ca axan chìm.
53 Wì haq khoi tàt au ta hàm jrùq, đòiq jêh đac,
èh khoi đàp au xam hmu.
54 Diac làp ca gàu au;
au hèm ta manoh doi: “Au cô khoi hêq!”
55 Chuaq ôi! Enh hàm dìq jaq jrùq aih,
au creo dang hiniq Ìh.
56 Ìh khoi tàng bàu au: “Xìn paq bàng don
jò tàng bàu au dang creo xìn bìac jùp đò.”
57 Ìh khoi trùh haten ca au
jò au dang creo, Ìh doi: “Apaq yùq!”
58 Chuaq ôi! Ìh khoi palem bìac troq da au,
Ìh khoi dèch au jah claih.
59 Chuaq ôi! Ìh khoi hnoq bìac ùh troq wì broq ca au,
xìn Ìh hadrah bìac ta-atoq da au.
60 Ìh khoi hnoq ro bìac tabroq chao da wì haq,
wa rìm bìac padô alùan đòiq tajraq hlài ca au.
61 Chuaq ôi! Ìh khoi tàng bàu palèu da wì haq,
wa rìm bìac padô alùan đòiq tajraq hlài ca au.
62 Hacùng bàu wa manoh hatình
ca dabau tajraq hlài ca au xèq ca hì.
63 Ìh hnoq ùh kè ca jò ha'ngui loq jò yòng,
au wìa mangai đòiq wì haq calêu halê wa do pagôq.
64 Chuaq ôi, Ìh jah ca'naih hlài rìm
bìac da tì wì haq khoi broq loh.
65 Ìh jah am ca wì haq loh manoh cadoq,
bìac waiq hanip da Ìh jah ŏi ta wì haq.
66 Ìh jah loh nòih, hnan tiaq wì haq,
wa jêh đac wì haq khoi ca enh ca'nàm plình da Chuaq!