35
Ê-li-hu Lech Jop
1 Ê-li-hu capoch hòm 'màng cô:
2 “Ìh xoh dađeh troq jò ìh doi:
‘Au ta-atoq yi hnao ca Boc Plình?’
3 Ìh bòch Chuaq: Au jah broq lem 'màng leq?
I lòiq cleq hòm tàng au rìh can rìh ta-atoq?
4 “Au jah tèo hlài ìh
wa 'bài bua ìh.
5 Ngoi mat ngan 'bài lòp plình beq;
ngan yùc ajoq yi ha'nhèq ca ìh!
6 Tàng ìh broq tôiq, i broq troq cleq ca Boc Plình ùh?
Tàng ìh broq bìac ùh troq bàc tam, ìh jah broq cleq ca Haq?
7 Tàng ìh ta-atoq, ìh am ca Haq cah cleq?
Haq nhàn yŏc bìac cleq enh tì ìh?
8 Bìac ngang dù da ìh, aih toq broq 'mèq ca con mangai;
bìac ta-atoq da ìh broq, aih toq jùp đò con mangai.
9 “Taiq bìac padit padiang, dài wì creo dang,
taiq tì mangai i cwìang padit wì, dài wì creo thê dèch.
10 Mahaq ùh i ca cabô bòch: Boc Plình ma broq loh au ŏi ta leq?
Haq broq ca wì lem bùi calêu ta jò damang,
11 Chuaq am ca nhèn bìac 'nì loq yi hnao ca ngè rôm ta crŏng taneh,
wa rabiaq yi hnao ca 'bài chìm pan ta plình.
12 Con mangai creo cachech, mahaq Haq ùh tèo,
taiq wì haq loq catèh wa ngang dù.
13 Bàu waiq khàn dech 'ngwan, Boc Plình ùh tamàng;
Chuaq I Cwìang Itai Dìq Dŏng ùh blèch ngan.
14 Ùh dùh dèh jò ìh doi ìh ùh hnoq Haq, bìac kìan khoi 'ràng trùh jang ngìa Haq, ìh gòm Haq hadrah!
15 Manàiq, ìh doi Haq ùh tèo hlài xam can nòih ca mangai broq tôiq,
taiq Haq ùh ràu trùh tôiq lôi con mangai,
16 mahaq Jop hloh bàu capoch bàc bàu lìq làn,
wa capoch tam bàc bàu ùh i hiniq cleq.”