18
Binđat Patô Bìac Mangai Ngang Dù
1 Èh 'Binđat mangai Sua, tèo hlài:
2 “Ìh capoch dùnh dàng leq hòm?
Ìh phai hèm ngan beq, khoi èh bèn ta anoi hòm.
3 Gleq ma ngan nhèn tìah ca ngè rôm
wa blùng ŏi jang ngìa ìh?
4 Ìh xah dađeh loh ca hyah taiq ìh nòih;
ma taiq ìh èh plì taneh loh ca pi i ca mangai ŏi,
wa hmu daxìch khoi dèh ca nòi haq ùh?
5 “Joq 'nàng can 'ngah da mangai dù jah pat đac,
pla ùnh haq pi xreo 'ngah hòm.
6 Can 'ngah ta traiq haq loh ca clam,
đen haq jah pat ti cla haq.
7 Cadiang tadêh da haq jah loh ca ìuq,
'bài trong tình pađim da cla haq raq ca'nhùt cla haq.
8 Taiq jènh haq 'mùt cla haq mùt ta hlàm;
haq cadiang lam clìh ta hàm.
9 Rahlàp clìh tùc lùnh jènh haq,
haq 'bìq mùt ta rahoch.
10 Caxi rahoch ŏi hlèp ta taneh gòm haq,
trom ralŏc ŏi hlèp ta trong lam đòiq hi rùp haq.
11 Bìac ramòt ŏi dudan pôn pah broq ca haq yùq crè;
bìac ramòt hnan tiaq haq trùh lùnh jènh.
12 Padren hiwa haq loh ca ìuq taiq haq pangot wa croh ranŏng,
bìac ranàc gòm rap haq.
13 Can hinìq da chac haq broq raliang đac akia haq;
con ramua da can cachìt lŏn hnhung ca caxènh haq.
14 Haq 'bìq dŏt đac loh khoi ca hnem traiq haq,
aih nòi haq jah canòm nhò; khoi èh haq 'bìq 'ràng trùh ca bùa da bìac ramòt.
15 Mangai ùh ŏi pah haq jah ŏi ta traiq haq,
dahwèq ngèq tôq jah rai ta nòi haq ma ŏi.
16 Enh 'neq riah haq croh, enh 'nhèq hamenh haq 'bìq coh loh ca hŏnh.
17 Bìac bahmàng hlài da haq 'bìq hnhung đac khoi ca crŏng taneh,
hiniq haq ùh jah ràu trùh ta crŏng taneh.
18 Haq 'bìq hnan đac loh khoi enh nòi 'ngah mùt ta nòi clam,
wa wì đùa 'noh đac haq loh khoi ca mangai rìh.
19 Haq ùh jah i con xau ta jàn cla haq,
hadai pi i ca cabô rìh ŏi ta nòi haq ma ŏi.
20 'Bài mangai ŏi pah mat mahì mùt jah hamàih ca hì da haq,
wa mangai pah mat mahì loh 'bìq hidròt dìq jaq.
21 Joq 'nàng, aih nòi ŏi da mangai ngang dù,
wa aih nòi da mangai ùh 'nì ca Boc Plình.”