16
Jop Tèo Dèh 'Bài Bua Ùh Alòng
1 Èh Jop tèo:
2 “Au tàng bàu 'màng aih khoi bàc yàng;
pì dìq dŏng 'bài mangai lam alòng, mahaq ùh alòng cleq.
3 Bàu 'ngwan cô ùh 'nì dìq 'mòh?
Bìac leq parông pì tèo hlài au 'màng aih?
4 Tàng pì glàm bìac ranàc 'màng ca au manàiq, au hadai jah capoch troi pì;
au hadai i dua capoch hloh bàu troi pì, wa ngu ngìu gàu ca pì.
5 Mahaq au jah yŏc hacùng au đòiq parông manoh pì jah dêh,
bàu au alòng jah payeo can jìq pì.
6 “ 'Nhac ca au capoch, can jìq au xôq ùh dìq;
'nhac ca au hatenh, can jìq xôq ùh loh khoi ca au.
7 Mahaq manàiq, Boc Plình broq ca au lep tagah;
Chuaq broq raliang dìq ca cadraq au.
8 Chuaq khoi broq ca akia au 'nhinh 'nhŏn,
chac ragìq da au patô can nan xa da au.
9 Can nòih Chuaq hnan au wa hich au; Haq cadrit hanenh tagit ca au;
mangai ma git ca au paglang mat ngan au
10 Wì hah hacùng halê au, tep tabŏc rai khìn đac au;
wì gop dabau tajraq hlài ca au.
11 Boc Plình khoi jao au ca mangai pòq tôiq lôi;
'Mùt au ta tì mangai ngang dù.
12 Adroi au đang rìh i catèm wa lem bùi, tajòi 'mòi Haq raliang ralàc au;
Haq cadop ranŏng au, hwenh au padah tang ha'nech; Haq đòiq au broq nòi axràm penh panenh.
13 'Bài rang panenh Haq dudan ca au;
Haq penh hlùh plì crŏng au xam manoh ùh xa-ŏch;
Haq ùc đac mat clèm au ta taneh.
14 Haq jêh au loh habau, habau cô ratam ca habau tau,
glàm jêh au tìah ca mangai tanuq dêh.
15 “Au khoi jìp bai briang broq eo caxùnh ti akia;
catùh can catèh mùt ta blo taneh.
16 Hadrò au gòh dùm taiq au hmoi,
canình mat au loh ca gam gôiq,
17 'nhac ca tì au ùh broq bìac ngang dù,
wa bàu au waiq khàn lem hreo.
18 “Ôi taneh, apaq catùh mahem au!
Xìn apaq tàt bìac creo dang da au.
19 Jò cô raq, i Chuaq ŏi ta Diac Plình anoi hlài palem ca au;
wa i mòiq Ngai ŏi ta'ne Boc Plình wa au, ŏi ta nòi ha'nhèq.
20 'Bài bua au palèu halê au,
mahaq au hmoi loh diac mat waiq dang Boc Plình.
21 Ôi! Ngèh enh mangai jah waiq xìn Boc Plình
tìah ca mangai xìn dèh bua!
22 “Ma jah 'màng aih ŏi toq 'biaq hanam hòm hêq,
au jah lam trong ma au pi jah wìh hlài.