4
Ê-li-pha Doi: Mangai Ta-Atoq Ùh Glàm Nan Xa
1 Ê-li-pha mangai Têman tèo hlài Jop:
2 “Tàng nhèn capoch tùang ca ìh, hìaq broq xa cleq ca ìh ùh?
Mahaq cabô ma nui àt ca capoch?
3 Jò nèh ìh khoi hnài parông bàc ngai,
ìh khoi broq ca tì ìuq loh ca dêh.
4 Bàu ìh capoch khoi jah payòng mangai loq tacro,
wa khoi broq cajap mangai i cucràng tabat.
5 Mahaq manàiq bìac ranàc trùh ca ìh, èh ìh ùh nui chìuq;
haq mùt ta ìh, èh ìh loh ca manhài manoh.
6 Ìh loq crè ca Boc Plình, gleq ùh cajap manoh lùi?
Ìh hèm haboq hlài beq! I ca jò leq mangai ùh broq tôiq ma 'bìq hù hnhung? I ca mangai leq lem jang 'bìq jêh đac?
7 “Ìh hèm haboq hlài beq! I ca jò leq mangai ùh broq tôiq ma 'bìq hù hnhung?
I ca mangai leq lem jang 'bìq jêh đac?
8 Bìac au khoi hnoq, mangai leq baxrùq bìac ngang dù,
rai 'noh trong manhài, èh gat yŏc hlài bìac aih raq.
9 Hihèm da Boc Plình broq ca wì cachìt,
can nòih Boc Plình broq ca wì hech hoch.
10 Bàu baco hlari ca-ùm wa bàu da baco hlari xòc ta rôm phai hatenh;
hanenh da baco con hlari khoi 'bìq tagoh.
11 Baco hlari dêh cachìt taiq ùh i ca dahwèq caq,
'bài con baco hlari loh ca pac lac.
12 “I mòiq nà bàu hlèp cadoc 'ràng trùh ca au,
don au tàng bàu bahech aih.
13 Jò con mangai cùi dìq jaq hnia damang,
au manhài jò i bìac mahno.
14 Can crè yùq ramòt glàm mùt ta au,
broq ca caxènh da au 'bìq tarìt da'rù.
15 Èh i mòiq toq yiang lam pagat ti ngìa au,
broq xàc ta chac au rèu, au loh hidrŏc.
16 Yiang aih yòng jang aih, au ùh canao ca haq;
yiang aih ŏi jang ngìa au. Nòi hatenh hatot au tàng bàu haq capoch:
17 ‘Enh ngìa ca Boc Plình, i mangai leq ta-atoq ùh?
Enh ngìa ca Haq ma khoi broq loh plình wa crŏng taneh, i ca mangai leq lem hreo ùh?
18 Boc Plình ùh lùi dèh 'bài hapŏng Haq;
Haq hadai doi 'bài 'bình plình da Haq i lôi.
19 Ùh dùh dèh ca con mangai ŏi ta hnem xam taneh nhin,
khoi broq loh xam blo taneh,
jah 'bìq hech đac xùang tìah ca con 'mài damang.
20 Enh jò daxroq trùh daxèq, wì 'bìq hù hech;
wì cachìt hloi hloi, ùh i cabô loq.
21 Tàng caxi càt traiq da wì 'bìq lêh đac,
wì haq jah cachìt èh ùh i can khôn rabiaq.’