30
Chuaq Rùp Bàu Dèch Dŏih Enh Nòi Broq Hapŏng Dìch
1 I bàu da Chuaq anoi 'noh ca Jê-rê-mi, doi: 2 “Chuaq, Boc Plình da Is-ra-ên anoi 'noh 'màng cô: ‘Achìh hlài rìm bàu Au khoi anoi 'noh ca ìh 'mùt ta sech beq.’ 3 Chuaq anoi 'noh: ‘Cô, 'bài hì trùh, jò Au jah ha'naoq hlài jàn Au, aih jàn Is-ra-ên wa jàn Juđa.’ Chuaq anoi 'noh: ‘Au jah 'ràng wì haq hlài ta taneh ma Au khoi am ca boc yaq wì haq; wì haq jah yŏc taneh aih broq xôxech.’ ”
4 Cô bàu Chuaq khoi anoi 'noh ca Is-ra-ên wa Juđa: 5 “Chuaq anoi 'noh 'màng cô:
“ ‘Au khoi tàng bàu tarìt,
ùh xài bàu catèm.
6 Ti bòch thù beq,
i joq gu calô jah xa-ông ùh?
Gleq Au hnoq 'bài gu calô yŏc dèh tì bèq cliac tìah ca gu cadrì padon xa-ông?
Gleq hadrò wì haq loh dŏng ca bah?
7 Nan xa, hì aih joq càn,
trùh 'mòi ùh i ca hì leq tìah ca hì aih.
Aih jò ranàc da Jacôp!
Mahaq haq jah dèch claih khoi ca bìac aih.’
8 “Chuaq ma wèq dìq ca 'bình plình anoi 'noh doi:
‘Ta hì aih, Au jah goh đac long ech khoi enh ranŏng wì;
caxi ma càt wì jah catech,
jàn diac 'noiq ùh jah rùp wì broq hapŏng dìch patìh hòm;
9 Mahaq wì haq jah patìh bìac Chuaq Boc Plình wì haq,
wa Đawit bùa
ma Au dèch am ca wì haq.’
10 “Chuaq doi: ‘Ô Jacôp, hapŏng Au,
paq crè, hadai paq yùq cleq!
Ma jah 'màng aih, cô,
Au jah dŏih claih ìh wa xinoi ìh enh nòi hangai,
enh nòi taneh ìh broq hapŏng.
Jacôp jah wìh hlài catèm,
ùh i cabô broq ca haq crè.’
11 Chuaq anoi 'noh doi:
‘Ma jah 'màng aih i Au ŏi ti ìh đòiq dŏih claih ìh.
Au jêh đac dìq dŏng 'bài Diac ma Au khoi broq ca ìh pac lac ta aih,
mahaq ìh, Au ùh jêh đac,
mahaq Au baxa ìh tiaq trong ta-atoq,
ùh đòiq ìh claih ca bìac baxa.’
12 “Chuaq anoi 'noh 'màng cô:
“ ‘Habau ìh ùh jah brêh, taiq teo habau hlàc hrìn.
13 Ùh i cabô waiq khàn am ca ìh,
đòiq ìh jah brêh;
ìh ùh i ca jreo broq brêh.
14 Dìq ca mangai loq waq ca ìh khoi hèt ca ìh;
wì ùh ti chaq ìh taiq Au khoi jêh ìh tìah mangai tagit clàc ìh,
baxa ìh tìah ca mangai ngang dù baxa,
taiq bìac ngang dù ìh bình baoq,
tôiq lôi ìh hlòm bàc.
15 Gleq ìh ma cachech dèh ca habau?
Ma jah 'màng aih bìac ma jìq da ìh ùh jah brêh.
Aih taiq nen bìac ngang dù ìh bình baoq,
tôiq lôi ìh hlòm bàc,
ma Au khoi broq ca ìh bìac aih.
16 “ ‘Taiq 'màng aih, rìm mangai ma lŏn ìh jah 'bìq lŏn;
rìm mangai ma tagit ca ìh,
dìq 'bìq rùp 'nong lam khoi dèh ca Diac;
'bài mangai tacaq ca ìh jah 'bìq tacaq,
mangai ma tablah ca ìh,
Au hadai broq ca haq jah 'bìq tablah.’
17 Chuaq anoi 'noh doi:
‘Au jah broq dêh ca ìh,
wa broq brêh ca habau ìh,
taiq wì haq khoi doi ìh mangai khoi 'bìq cađac,’
wì doi: ‘Aih Siôn, pi i ca cabô blèch ngan!’
Chuaq Ha'naoq Hlài Jacôp
18 “Chuaq anoi 'noh 'màng cô:
“ ‘Cô, Au jah ha'naoq hlài hnem traiq Jacôp.
Au jah xa-ŏch ca nòi ŏi haq;
phôq cô jah broq hlài ta go nòi haq 'bìq raliang,
wa hnem bùa jah broq hlài ta nòi troq.
19 Bìac manè pôi
wa bàu lem bùi jah loh enh wì haq.
Au broq wì haq jah bàc tam,
èh wì pi hìaq yi 'biaq;
Au hadai broq ca wì haq jah padèch,
pi hìaq hamoq.
20 Con caiq wì haq jah tìah troi hì adroi nèh;
wì haq jah yòng hagao jang ngìa Au,
wa Au baxa mangai leq ma padit wì haq.
21 Wì haq jah i mangai broq gàu dađeh
jah loh enh cla wì haq.
Au 'ràng mangai aih thia haten Au,
èh haq jah thia haten ca Au.
Ma jah 'màng aih i cabô khoi tamùa cachìt thia haten ca Au?’
Chuaq anoi 'noh 'màng aih.
22 ‘ 'Màng aih, pì jah broq jàn Au,
Au jah broq Boc Plình pì.’ ”
23 Cô, bahùt da Chuaq!
Can nòih xrông Haq khoi plôh loh,
aih bahùt càn jah trùh ti gàu mangai ngang dù.
24 Can nòih da Chuaq pi wìh hlài trùh jò Haq khoi broq
wa khoi gêh ca trong ma tình ta manoh Haq.
Ta 'bài hì pulùch,
pì jah loq ca bìac aih.