3
Chuaq Jêxu Ha'nhèq Yi Hnao ca Môise
1 'Màng aih ôi oh daq hadròih, mangai ma i phàn ta bìac creo da Boc Plình, pì phai hèm haboq ngan Chuaq Jêxu Crich, Haq Mangai sùq đô wa Pajàu Ha'nhèq da bèn ma bèn lùi canòm. 2 Haq khoi wèq dèh bàu broq tiaq bìac Boc Plình khoi pajaq ca Haq, tìah ca Môise khoi wèq dèh bàu broq tiaq rìm trong ŏi ta hnem Boc Plình. 3 Ma jah 'màng aih Chuaq Jêxu khoi jah padèch ha'nhèq yi hnao ca Môise, tìah ca wì ma padèch mangai ma broq hnem, yi hnao ca padèch hnem. 4 Ma jah 'màng aih, ùh i ca hnem leq ma wìa đeh tàng mangai ùh broq, mahaq Haq ma khoi broq loh rìm bìac, aih Boc Plình. 5 “Môise mangai khoi wèq bàu broq rìm bìac ta hnem Boc Plình,”✡ 3:5 SJ 12:7. tìah ca mangai patìh đòiq pa'noh bìac mahno ta dang ngìa èh; 6 Mahaq Chuaq Jêxu Crich wèq dèh bàu tìah ca Con Calô wèq cwìang hnem Boc Plình. Hnem Boc Plình, aih bèn, tàng bèn wèq cajap dèh manoh lùi canòm wa bùi manoh ta bìac ngèh gòm trùh lùch.
7 'Màng aih, tìah ca Yiang Hadròih doi:
“Hì cô tàng pì tàng bàu Haq,
8 èh apaq cadoq manoh tìah
ca boc yaq pì calah nèh khoi leoq Boc Plình
ta hì baxa thù ta đùng braih càn,
9 aih nòi boc yaq pì khoi hnoq bìac Au broq trom 40 hanam,
Mahaq xôq ŏi thù Au đòiq 'nhro manoh Au.
10 Taiq 'màng aih, Au nòih ca 'bài mangai 'nhòng aih,
Au doi: ‘Manoh wì hloi hloi hèm lac trong,
Ùh 'nì ca trong da Au.’
11 Cô bàu pachac jò nòih Au doi:
‘Wì haq ùh jah mùt nòi padài da Au.’ ”✡ 3:11 BCP 95:7–11.
12 Ôi oh daq, phai ngan kenh, đòiq ùh i mòiq ngai leq ta pì i manoh ngang dù, ùh lùi, èh cađac Boc Plình, Haq ma rìh hloi hloi. 13 Mahaq rìm hì pì ep pariaq dabau jò ŏi doi “Hì cô” waq ca ŏi ta pì ùh i ca mangai leq 'bìq tôiq lôi padô 'nùt, èh cadoq manoh. 14 Ma jah 'màng aih bèn khoi jah pajùm phàn ti Chuaq Jêxu Crich, tàng bèn wèq cajap dèh manoh lùi baxèm da bèn trùh lùch. 15 Tìah ca Sech Hadròih khoi achìh:
“Hì cô tàng pì tàng bàu Haq,
Èh apaq cadoq manoh tìah
ca boc yaq pì khoi leoq Boc Plình ta đùng braih càn.”✡ 3:15 BCP 95:7,8.
16 Cabô ta wì ma khoi tàng bàu Boc Plình khoi èh xôq ŏi leoq Haq? Aih ma ùh xài dìq dŏng mangai khoi nhò Môise ajèn loh enh Aicàp 'mòh? 17 Boc Plình khoi nòih ca cabô trom 40 hanam? Ma ùh xài nòih ca 'bài mangai ma broq tôiq nòi braih càn, hi khoi wì haq khoi cachìt hloi ta aih 'mòh? 18 Haq pachac ca cabô, doi: Wì ùh jah mùt nòi padài da Au, aih ma ùh xài ca 'bài mangai ma ùh dì tiaq 'mòh? 19 'Màng aih bèn hnoq dài wì haq ma ùh jah mùt ta aih, taiq manoh wì haq ùh lùi.