1 Khoi ca aih dùnh hì, wop hanam ma piq tình pàng jò plình ma pi mè loh ta taneh, i bàu Chuaq trùh ca Êli doi: “Lam trùh glàm Ahap beq! Èh Au broq ca plình mè hlài.” 2 'Màng aih Êli lam trùh glàm Ahap.

Adrình ca jò aih ta Sa-ma-ri, 'nang i bìac pangot hrah dìq jaq. 3 Ahap thê creo ca Ô-ba-đia, cwan ma wèq dìq ca hnem bùa. Ô-ba-đia mangai dìq ca manoh padèch Chuaq, 4 Jò Jê-sa-bên ma ti jêh dŏng 'bài mangai ma capoch thai Boc Plình, èh Ô-ba-đia lam cadoc đò 100 ngai, mòiq còp haq đòiq 50 ngai. Khoi èh am 'benh wa diac đòiq ban đò wì haq. 5 Ahap doi ca Ô-ba-đia: “Ìh phai lam jàp ca gùng ti ngan cròng diac wa thòng diac, broq braiq bèn chaq jah nhat, èh bèn jah ban đò dèh axêh wa con axêh la, broq 'màng aih bèn ùh hìaq jêh đac dèh ngè aban.” 6 'Màng aih wì haq axong dabau lam rìm nòi. Ahap lam mòiq trong, Ô-ba-đia lam trong ma 'noiq.

7 Ô-ba-đia 'nang lam ti trong, èh Êli loh glàm haq. Ô-ba-đia canao ca Êli, bla-op dađeh ta taneh rai bòch: “Ìh i joq Êli chuaq au ùh?”

8 Êli tèo: “Joq au Êli. Lam beq doi ca craq ìh: Êli 'nang ŏi ta cô.”

9 Ô-ba-đia tèo: “Au ma i đeh ca tôiq cleq, ìh ma thê au mùt ta tì Ahap waq ca haq jêh đac au 'mòh? 10 Au patô Chuaq Boc Plình ma rìh yôt da ìh đòiq pachac, ùh i ca nòi leq taneh Diac leq, craq au ma ùh thê mangai ti chaq ìh. Jò wì hi doi ìh ùh i ŏi ta aih, èh craq au thê nòi aih loq taneh Diac aih ep pachac wì haq ùh i glàm ìh. 11 Mahaq manàiq cô ìh doi ca au: Lam beq doi ca craq ìh: ‘Êli 'nang ŏi ta cô.’ 12 Èh au yùq, jò au bu loh lam, Yiang da Chuaq 'ràng ìh lam ta nòi 'noiq, nòi au ùh 'nì. Khoi èh au trùh doi ca Ahap; Ahap trùh, mahaq pi hnoq ìh, èh Ahap jêh đac au, 'nhac ca au hapŏng ìh, wa au loq padèch Chuaq enh jò ŏi 'yoh. 13 Wì ma ùh i anoi ca ìh loq au khoi broq 'màng leq jò Jê-sa-bên ma jêh đac 'bài mangai capoch thai Chuaq 'mòh? Au khoi 'ràng cadoc 100 ngai, 'bài mangai capoch thai Chuaq, mòiq còp au cadoc đòiq 50 ngai, khoi èh 'ràng 'benh wa diac ban wì haq. 14 Èh, manàiq cô ìh doi ca au: Lam beq, doi ca craq ìh, ‘Êli 'nang ŏi ta cô.’ Broq 'màng aih haq joq 'nàng jêh cađac au.”

15 Mahaq Êli tèo: “Chuaq ma wèq dìq ca 'bình plình rìh yôt, enh ngìa Haq au yòng doi: Hì cô raq au glàm Ahap craq da ìh.”

16 'Màng aih Ô-ba-đia lam doi ca bùa Ahap. Ahap lam đòiq glàm Êli. 17 Jò Ahap bu hnoq Êli, Ahap bòch haq: “Ìh mangai ma broq manhài ca jàn Is-ra-ên, joq ùh?”

18 Êli tèo: “Ùh xài au broq manhài ca jàn Is-ra-ên, mahaq cla ìh wa mangai da hnem baq ìh, ma jah 'màng aih ìh wa baq ìh khoi cađac bàu thê da Chuaq hi lam tiaq 'bài kiac Ba-an. 19 Manàiq cô ìh tagop dŏng dìq ca jàn Is-ra-ên trùh đòiq glàm au ta wang Catmên, xam 450 ngai pajàu da Ba-an wa 400 pajàu da A-sê-ra, 'bài mangai Jê-sa-bên ma ban.”

20 'Màng aih Ahap thê mangai lam jàp ta jàn Is-ra-ên tagop hlài 'bài pajàu trùh ta wang Catmên. 21 Êli thia haten ca jàn rai doi: “Gleq ma ra'ngòt manoh? Tàng Chuaq Haq Boc Plình, èh phai tiaq Haq beq, mahaq tàng Ba-an, aih Boc Plình, lam tiaq haq beq!”

Mahaq jàn hatenh, ùh tèo.

22 Khoi èh Êli doi hòm ca jàn: “Au mòiq ngai mangai capoch thai Chuaq ŏi xrong hlài, mahaq ŏi jang cô i 450 ngai 'bài pajàu da Ba-an. 23 Manàiq cô phai am ca nhèn baiq toq 'bo calô, hi khoi đòiq ca wì haq ràih adroi mòiq toq, xah 'bo aih loh tang ha'nech đòiq enh 'nhèq ca long ùnh, mahaq ùh jah bùh ùnh. Au xah 'bo ma tau đòiq jam aih enh 'nhèq ca long ùnh, mahaq ùh bùh ùnh. 24 Khoi èh pì creo dang hiniq can kiac da pì. Au creo dang dèh hiniq Chuaq da au. Ma leq ma tèo bàu xam ùnh, èh Haq Boc Plình.”

Dìq dŏng ca jàn ma i mat ta aih doi: “Broq 'màng aih joq troq.”

25 Jò aih Êli doi ca 'bài pajàu kiac Ba-an: “Pì ràih ca dađeh mòiq toq 'bo, khoi èh xah jam haq beq! Ma jah 'màng aih pì bàc, khoi èh dang creo ca hiniq can kiac da pì, mahaq ùh jah bùh ùnh.”

26 'Màng aih wì haq rùp mòiq toq 'bo ma khoi jah 'ràng jang aih, xah jam haq, hi khoi dang creo dèh ca kiac Ba-an enh daxroq trùh 'ne hì.

Wì haq waiq 'màng cô: “Waiq kiac Ba-an xìn tèo hlài bàu nhèn!” Mahaq ùh i tàng bàu kiac cleq, hadai ùh i ca kiac leq tèo. Wì haq aplôh dudan dèh ca'bŏng tadreo wì haq ma khoi broq.

27 Trùh 'ne hì, Êli halê wì haq, doi: “Waiq ma dêh tam toq 'biaq hòm beq! Ma jah 'màng aih Ba-an aih can kiac, broq braiq haq 'nang hèm bìac crài, loq haq khoi jiang lam ta nòi 'noiq, nòi hangai, loq haq 'nang cùi, ep padrìu haq yòng.” 28 Tàng 'màng aih, wì haq cachech bàu yi dêh tam hòm, èh wì haq tiaq troi ranenh wì haq ma khoi hmaq broq: wì haq yŏc jaoq wa chang gùm xah dađeh loh mahem. 29 Loi 'ne hì, wì haq xôq ŏi capoch dèh bàu lìq làn. 'Màng aih trùh jò dèch am ngè tadreo jò chìu, mahaq xôq ùh i ca bàu leq tèo hlài, hadai ùh i ca cabô leq tamàng trùh.

30 Khoi ca aih Êli doi dìq ca jàn: “Trùh ma haten ca au beq!” Jàn lam haten ca haq. Adroi dŏng Haq broq hlài ca'bŏng tadreo da Chuaq ma khoi 'bìq plah raliang. 31 Êli yŏc 12 hmu tiaq dèh sôq da 'bài hadròng hadrech con calô Jacôp, aih 'bài mangai ma bàu Chuaq i doi: “Is-ra-ên aih hiniq ìh.” 32 Êli yŏc 'bài cato hmu aih broq hlài mòiq toq ca'bŏng tadreo ca hiniq Chuaq, hi khoi chìa mòiq trong mùang dudan ca'bŏng tadreo, dàng wàu đòiq ùc 14 lìt diac. 33 Khoi ca aih haq tah long ùnh ta ca'bŏng tadreo, èh haq xah 'bo aih loh tang ha'nech, tah enh 'nhèq ca long ùnh, hi gêh, haq doi: “Gôch bình pôn thùng diac beq, khoi èh 'ràng ùc ta ngè tadreo wa ta long ùnh.”

34 Haq doi ca wì: “Broq tam yàng ma baiq beq!” Wì broq tam yàng ma baiq.

Haq doi hòm: “Broq tam yàng ma piq.” Wì broq tam yàng ma piq. 35 Trùh 'mòi diac loh dudan ca'bŏng tadreo, èh broq bình hloi ti trong mùang.

36 Trùh jò dèch am ngè tadreo jò chìu, Êli, mangai capoch thai Boc Plình, trùh haten. Haq waiq khàn, doi: “Waiq Chuaq Boc Plình da Ap-ra-ham, Isac wa Is-ra-ên, hì cô xìn Ìh am ca phù cròng loq, Ìh Boc Plình da Is-ra-ên. Au cô hapŏng Ìh. Au khoi broq bìac 'màng cô, aih nhò Ìh doi am ca au. 37 Waiq Chuaq xìn Ìh rùp bàu au đòiq jàn cô loq ca Ìh Chuaq Boc Plình jah broq ca manoh jàn cô tawìh hlài.”

38 Wop jò aih ùnh da Chuaq mahno loh bùh hreo dŏng ngè tadreo bùh, long ùnh, hmu, blo taneh, èh broq xŏt ca diac ta mùang.

39 Jò dìq ca jàn hnoq 'màng aih, wì haq bla-op dèh hadrò ta taneh rai doi: “Chuaq, joq 'nàng Boc Plình, Chuaq, joq 'nàng Boc Plình!”

40 Êli doi ca wì haq: “Rùp dŏng 'bài pajàu kiac Ba-an beq! Ùh jah đòiq claih mòiq ngai leq.” Wì haq rùp dìq 'bài pajàu aih. Êli 'ràng wì haq loh ta thòng diac Kisôn, hi khoi jêh dŏng wì ta aih.

41 Hi khoi Êli doi ca Ahap: “Ìh khòh caq ôq beq, ma jah 'màng aih au i tàng atêh mè dêh dìq jaq.” 42 'Màng aih bùa Ahap tŏc caq ôq. Êli tŏc ta bôi wang Catmên. Ta aih haq hacùn cràng bla-op dađeh hadrò ta taneh.

43 Êli doi ca hapŏng: “Lam beq! Ngan 'nah pah mat mahì loh.”

Mangai aih lam ngan pah mat mahì loh, khoi èh tawìh hlài doi: “Au ùh i hnoq cleq.”

Êli doi: “Lam beq! Broq 'màng aih tapèh yàng.”

44 Yàng ma tapèh mangai aih doi: “Tau, au hnoq mòiq cato yùc toq capiang tì 'nang tŏc enh diac raxìq.”

Êli doi: “Trùh doi ca Ahap: ‘Ìh phai padon tŏc axêh loh ma renh beq, đòiq ìh ùh hìaq 'bìq mè padràng.’ ”

45 Ùh hìaq dùnh dàng leq, yùc gam loh chê jàp ta plình, i cayeo dêh, mè càn ta-ùc loh. Ahap dahôiq tŏc ta xê cadàu trùh Jê-rê-ên. 46 Tì da Chuaq ŏi ti Êli. Haq càt dèh caxi ca'nam, cadàu adroi ca xê Ahap trùh mùt ta phôq Jê-rê-ên.