142
Suŋuuŋ to ŋeer tau ighita ighe i zigani mon
Mbouŋ to David
Mbouŋ tane iŋarui saawe tau David iyooŋ ila maet puura loolo
1 Yau nataŋ rarai Yoova toman aliŋag tiina.
Taŋiiz tsiau iŋaruini naghe loolo isaghatin ghau ve iuul ghau. Pasaa, yau besooŋa tooni.
2 Yau navotia pataŋani tsiau ila pani.
Gabua tau igham ghau lolog isaghat, ene nasavia pani.
3 Isaav ighe lolog ipataŋan kat ve tapirig imbool, ene yo uwatagh lepoghag wa.
Eez tau yau nataghoni, ene koiagŋa tighur liis toozi ila wa.
4 Matag izi pa zigeg, eemon naghita eta to iuul ghau mako.
Ve leg nugh eta to yoŋgaaŋ mako.
Ve tamtamon eta maata iŋgal ghau mako paam.
5 Yoova, yau nataŋ rarai ghom pa uleeŋ.
Ve nanumeer ghom naghe yo ta umin niag to yoŋgaaŋ.
Saawe tau naleep izi taan, yau naleep ilat tsio imin taan poia ee tau tipuli payau to naleep ila.
Irau nambool pa gabua eta mako.
6 Ughur taliŋam pa taŋiiz tsiau tane.
Pasaa, aazne pataŋani itatan ghau kat.
Koiagŋa tau tighurghur pataŋani payau na, tapirizi iliiv ghau kat.
Tauvene ugham mulin ghau ila nimazi.
7 Lepoogh tsiau, ene imin naleep iloŋ ila ruum to yavyavuuŋ, ve leg eez eta to navot mako.
Tauvene upas ghau navot pa pataŋani tane. Leso napait ezam.
Isaav ighe ugham poghani ghau ve uul ghau,
ene pale tamtamon tsio duduŋazi tilam tilivutin ghau ve napait ezam toman lolog poia ila matazi.