109
Ŋeer ee ighason Maaron to ipamuul ŋgar saghati to koiŋa imuul ila pa tauzi
Mbouŋ to David
1 O Maaron, saawe isov yau napapait ghom.
Ulooŋ suŋuuŋ tsiau. Uneneeŋ sov!
2 Pasaa, zeran sasaghati tau avozi karom na, tighurghur koi payau,
ve tiŋgalŋgal saveeŋ karom naol payau.
3 Koiagŋa tawe tisiksik saveeŋ sasaghati payau,
ve tivaghamunia ezag sorok.
4 Muuŋ, yau lolog pazi, ve naghamgham ŋgar poia pazi.
Eemon tiyat ŋgar poia ta nagham pazi na pa ŋgar saghati, ve tiŋgalŋgal saveeŋ naol payau.
Eemon yau ŋeer to suŋuuŋ.
5 Ŋgar poia tau yau naghamgham pazi na, yes tiyatu pa ŋgar saghati.
Yau lolog pazi. Eemon yes tighur koi payau, ve tighe:
6-7 “Taghur tamtamon saghati eta iyooz ila ziige to iŋgal saveeŋ pani.
Leso saawe tau tipayooze pa savsaveeŋ, tighita tighe i isosor, ve tighur atuya pani.
Ve nighe suŋuuŋ tooni paam, ene isosor ila Maaron maata.
8 Ŋeer tawe ileep malau izi taan sov.
Tamtamon ite paam aat igham niia ve igham uraat tooni, o poia. * Mbaŋ 1:20
9 Azaawa pale imin naar,
ve natŋa timin parooŋa.
10 Pale tireu natŋa ruum toozi tizi, ve tinaan zi tighawaar.
Leso tivaghamgham, tivalaghlaagh, ve tisuŋsuŋ lezi gabua.
11 Isaav ighe ŋeer tawe igham bun ila to tamtamon eta, ene pale tamtamon tana ilam ve iyauur gabua tooni isov imin le.
Gabua tau i ighun punita pani na, zeran to nugh ite pale tilam ve tighamuur zi.
12 Tamtamon eta igham poghania ŋeer tawe sov.
Ve natŋa tau timin parooŋa na, tamtamon eta loolo isaghatin zi ve iuul zi sov.
13 Natŋa timataar le tisov, o poia. Leso ŋeer tawe eeza igheen muul sov, ve tamtamon lolozi iveegh pani.
14 Ŋgar saghati to timŋa, tamtamon pale tisavia pa Yoova, leso maata iŋgalŋgali.
Ve sosor to tiina paam, Yoova ireua sov.
15 Tauvene sosor to ŋeer tawe tomania ziiri waaro tooni, Yoova pale maata iŋgalŋgali irau saawe, ve ipasovuur zi pa taan.
Leso tamtamon lolozi iveghai zi kat.
16 Pasaa, ŋeer tawe maata iŋgal ve igham ŋgar poia eta pa tamtamon mako.
Yes mbolaaŋa ve yes tau tileep ila pataŋani loolo na, i ighamgham saghatin zi, ve iravrav zi timatmaat.
17 Ŋgar to avoon saghati pa tamtamon, i loolo pani kat.
Eemon saveeŋ tooni saghati tawe pale imuul pa tauu, ve ivaghamunia.
Ŋgar to tasuŋ Maaron leso ighur poia tooni izaa to tamtamon, ŋeer tawe loolo pani mako.
Tauvene poia to Maaron pale igheen malau pani.
18 Ŋgar to avoon saghati pa tamtamon, i ipulpuli mako.
Ene imin nonoghiiŋa tau i loolo pani kat, ve inonogh ghi pani irau saawe.
Eemon saveeŋ tooni saghati tawe pale imuul pa tauu,
ve izila loolo imin yaa, ve ila irau tuua ta naol ne imin ŋgoreeŋ, ve ivaghamunia.
19 Saveeŋ tooni saghati tawe, pale imuul pa tauu ve ikauu,
imin kawaal tau i ikawaala ila ŋgaali ve ipuusa pa puus irau saawe.”
20 O Yoova, saveeŋ sasaghati tau koiagŋa tiŋgalŋgali payau ne,
upamuule ila pa tauzi. Leso uyat ŋgar toozi tawe.
21 Yoova, yo Maaron tsiau. Ezam tiina pa poia tsio ve uleeŋ tsio.
Yo lolom isaghav tamtamon tsio ve uluul zi irau saawe.
Tauvene uyooz payau, ve upas ghau navot pa pataŋani tsiau tane.
22 Pasaa, aazne naleep saghat, ve leg eez eta mako.
Tauvene ateg ipaparav ve lolog isaghat kat.
23 Yau namin gabua yavyaava tau ighe aaz izila, mako taghita muul mako.
Yau namin siis tau yaghur ivuvuura gha ila.
24 Yau naŋgun taug pa ghaniiŋ aniiŋ alok wa.
Tauvene nakoŋkoŋ, ve tuag isov peria, ve agheg imatmaat.
25 Isaav ighe koiagŋa tighit ghau, ene tivevelegh ghau ve tiŋiŋiŋ payau.
Ve titurun luazi payau ve tighe: “Aa, ughita wa?”
26 Yoova, yo Maaron tsiau. Uul ghau lak!
Ugham mulin ghau pa pataŋani tsiau tane. Pasaa, lolom isaghav tamtamon tsio, ve uluul zi.
27 Ugham koiagŋa tiwatagh yo nimam. Utotoi tapirim pazi ve tighit katini pa matazi.
Leso tighilaal tighe yo ta Volaaŋa tsiau.
28 Onoon, yes avozi saghati payau. Eemon yo pale ughur poia tsio izaa tsiau.
Isaav ighe koiagŋa tipaburigin malmal payau, yo pale utatan zi, ve upamuul zi tila toman mayazi.
Leso ugham besooŋa tsio loolo poia ve tintini.
29 Tauvene yes tau tiŋgalŋgal saveeŋ payau ne, ugham zi tivaghamgham, ve tighau tila toman mayazi.
Mayaŋa tana pale imin lezi nonoghiiŋa to tinonogh zi pani irau saawe.
30 Eemon yau aat lolog poia kat pa Yoova, ve avog ipaiti pa poia tooni toman aliŋag tiina.
Saawe tau yeŋa eval tiina nilup ghei pa suŋuuŋ, yau aat nayoor eeza.
31 Pasaa, yes tau tileep ila pataŋani loolo ve titaŋ raraini pa uleeŋ na, i iyozyooz zigezi to iuul zi.
Ve yes tau koiazŋa tiŋgalŋgal saveeŋ pazi ve tighe tirav zi timaat na, i igham mulin zi.