43
Suŋuuŋ sirivu to ŋeer tau ipasawal pa Maaron
1 Maaron, yes tau matazi iŋgalŋgal ghom mako na, tighamgham pataŋani payau.
Uyooz payau, ve upaghazoŋai ghau ila matazi ughe yau nagham sosor eta mako.
Upas ghau ila zeran karomŋa ve zeran sasaghati tane nimazi.
2 Pa yo Maaron tsiau, ve yau nayooŋ ilat tsio.
Puughu mindai ta ughur murim payau?
Mindai ta upul koiagŋa titatan ghau, ve tigham ghau lolog isaghat?
3 Naghe ugham ghazooŋa tsio isul ghau ve upaghazoŋai ghau pa saveeŋ tsio onoon.
Pasaa, gabua ru tawe pale titotoi eez payau ve tigham pooz payau, leso nazala pa niam to lepoogh tau igheen izi loloz tsio patabuyaaŋ daaba. * Mbo 25:5, 27:1; Yo 8:12; 2Kor 4:6
4 Mako naŋarui artaal tsio, ve nayooz ila naghom ve napait ghom.
Pasaa, yo Maaron tsiau, ve yo ta ugham ghau lolog poia kat.
Tauvene yau aat narav gita, ve nambou to napait ezam.
Pasaa, yo Maaron tsiau.
5 Tauta naghason taug muul naghe mindai ta aazne lolog isaghat?
Lolog ipataŋan ve nagham ŋgar naol pasaa?
Yau aat naghur ila to Maaron ariaaŋ, ve naghur matag pani.
Pasaa, i Maaron tsiau ve Uleeŋa tsiau. Tauvene yau aat napaiti muul.