1-2 Sara ilepleep le ndaman tooni irau 127, ra saawe tooni isov ve imaat izi nugh Kiriat Arba tau igheen ila taan sirivu to Kanaan. (Kiriat Arba eeza ite Ebron). Tauvene Abaram loolo ipataŋan pa azaawa ve itaŋ pani. 3 Itaŋtaŋ le isov, ra iburig, ipul azaawa paata izi, ve ila isavsaav tomania yes Hita. Isaav pazi ighe: 4 “Aghita. Yau leg taan eta mako. Naleep namin loom ila yam sosomim. Mindai, irau aghita leg taan sirivu eta leso imin nugh to naghur azuwag paata ila?” * Mbaŋ 7:16; Hib 11:9, 13

5-6 Yes Hita tiyol aliiŋa tighe: “Olman, yo ŋeer tiina ee tau uleep tomani ghei, ve nighilaal ghom nighe Maaron ileep tomani ghom. Ulooŋ, mateegha tsiei niazi katini. Ughita poia eta tau irau lolom, o ughur azuwam paata ila. Tamtamon tsiei eta irau iŋguruuta payo mako.”

7 Abaram ilooŋ saveeŋ toozi le loolo poia. Tauvene iburig ve itud pazi imin pakuruuŋ zi, ve isaav ighe: 8-9 “Poia. Isaav ighe yam ayok payau to naghur mateegh tsiau izi nugh tane, o ala to Zoar naatu Epron, ve aghasoni pa maet puura tau igheen izi taan tooni Makpela ziige na. Nugh tawe ta naghe nagholi imin leg, ve naghuru imin mateegha tsiei niazi. Atuya piiz tau i ighuru, ene aat naghol suvinia ila yam asov matamim.”

10 Abaram isavsaav tomania yes Hita izi lupuuŋ niia tau igheen eez maata, ve Epron tauu ilepleep paam. Tauvene iburig ve iyooz ila eval tiina matazi, ve iyol Abaram aliiŋa ighe: 11 “Tiina tsiau, ulooŋ. Yau lolog pa ughol taan tsiau tawe mako. Yau aat nagham payo sorok. Ve maet puura tau igheen ila taan tawe paam, aat nagham payo sorok ila eval tisov tane matazi. Ula utavia mateegh tsio ta sewe.”

12 Abaram ilooŋ saveeŋ tane, ve itud pazi muul imin pakuruuŋ zi, ve isaav pa Epron ila eval tisov matazi ighe: 13 “Ene poia. Eemon ughur taliŋam payau. Yau naghe naghol duduŋai taan tsio tawe. Tauvene taan atuya aat ilat nimam muuŋ, o nala natavia mateegh tsiau.”

14 Epron iyol Abaram aliiŋa ighe: 15 “Tiina tsiau, ulooŋ! Taan tawe atuya irau maet silva 400 ma vene. Eemon tambaaŋo paam. Ugholi pasaa? Ituru tavawataghi ghiit. Ula ve utavia azuwam.” 16 Abaram ilooŋ Epron aliiŋa, ve inin le maet silva irau 400 itaghon saveeŋ tau Epron isavia ila eval tawe matazi na.

17-18 Tauvene taan to Epron tau igheen izi Makpela igharau nugh Mamre, tomania maet puura ve ai tisov tau tiyooz ila taan tawe, ene Abaram ighol motin zi timin le. Ve yes Hita tisov tau tileep ila lupuuŋ tana, tilooŋ saveeŋ mbuaaŋ to yesuru, ve tighita pa matazi. 19 Ra Abaram ila ighur azaawa Sara paata iloŋ ila maet puura tau igheen ila taan Makpela igharau nugh Mamre izi taan Kanaan. (Nugh Mamre eeza ite Ebron.) 20 Tauvene taan tawe tomania maet puura tau igheen ila, ene yes Hita tipuli imin Abaram le, ve i ila igharaata imin mateegha tooni niazi.