1 Nayan, doen menge Parisiyo aw Sadusiyo dimoton ki Jesus amon megtandà dan kandin. Nemoyò dan te ipekità din diyà kandan se pengilala amon ketegahan dan te ontò sikandin insogò te Timanem. 2 Minikagi si Jesus, “Aw melalag se langit te pegsallep te aldaw, ketegahan niyo te eked odan te keeldawan niyan. 3 Aw melalag se langit te iselem aw domelem, ketegahan niyo te modan te aldaw sìyan. Nepela a kenyo, so pengkey egpengilala kaw te ledyawan doton te langit, meneng wedà niyo kilelai aw eden se kedegdagan te egkeinang seini. 4 Medaet se ibeg te kedita te otaw songkani timinàyog te Timanem, so gayed kaw egkeibeg te ipekità ko diyà kenyo se pengilala. Meneng sebad olò se pengilala ipekità te Timanem diyà kenyo, aw yan se iling te neinang diyà te telekeliwat te kagi te Timanem gebii si Jonas.”

Penga niyan, nesayo si Jesus lekat kidoen.

5 Nayan, minatas se menge tinoledaan i Jesus te lanaw, meneng wedad pan inibing dan so nelibelan dan se bawo dan. 6 Minikagi si Jesus, “Peg-ahà kaw amon eked kaw ketini te yist te menge Parisiyo aw Sadusiyo.”

7 Migpebelaw-belaway se menge tinoledaan din, kagi dan, “Yan se inikagi din so wedad pan inibing tadon.”

8 Meneng netegahan i Jesus aw eden se aneng-aneng dan, aw minikagi sikandin, “Tay law. Wedà pa kedì kelobos se pegsalig niyo kanak. Ikà niyo egkepela so wedad pan inibing niyo. 9 Nepela a kenyo, so wedà kaw pa ketaga-taga aw eden se mebatog ko inangen. Iling te nelibelan niyo den se pegpekaen ko te lima melalan otaw te lima pan, aw medita se buun inipenò niyo te samà. 10 Iling te nelibelan niyo heman se pegpekaen ko te epat melalan otaw te pito pan, aw medita se boliyas inipenò niyo te samà. 11 Meneng nepela a so wedà kaw pa pekelabet te kenà pan se kedegdagan te inikagi ko gina, te keilangan meg-ahà kaw amon eked kaw ketini te yist te menge Parisiyo aw Sadusiyo.”

12 Penga niyan, nekelabet dan te kenà yist te pan se keilangan imendayan dan, meneng keilangan megpekeimanday dan te ipegtoladà te menge Parisiyo aw Sadusiyo.

13 Nayan, dimoton si Jesus te lonsod medapag te Sesarya Filipos. Pegdateng din doton, mig-insà sikandin diyà te menge tinoledaan din, kagi din, “Eden lay se kagi te kedita te otaw tepad te Timanem Migpekeotaw? Sinu a lay ekon?”

14 Timaba dan, “Doen menge otaw eg-ikagi te sikona si Juan Memonyagay. Doen heman eg-ikagi te sikona si Elias. Doen heman eg-ikagi te sikona si Jeremias aw doma telekeliwat te kagi te Timanem gebii.”

15 Mig-insà si Jesus, “Meneng eden lay se kenyo aneng-aneng tepad kanak? Sinu a lay?”

16 Timaba si Simon iningedanan din ki Pedro, kagi din, “Sikona se Misiyas. Sikona se Batà te Timanem.”

17 Minikagi si Jesus, “Simon, batà i Juan, doen ontò keluba nikaw. Kenà otaw se migpetaga-taga diyà kamno te siak se Batà te Timanem, meneng Amay ko doton te langit se migpetaga-taga kenyan diyà kamno. 18 Eneng-enengi se kagi ko kamno seini. Iling ka te bato dimasel tandà te pegsalig no kanak, aw medita se otaw tomaking kamno aw megpesakop diyà kanak. Eked dan dàgi te tolos te kemetayun. 19 Isogò ko sikona meg-owang te lelebangan amon medita se otaw megpesakop diyà te peglowan te Timanem. Aw megpunù ka te doen eked kepakay inangen dini lanto te tanà, eked heman iyan kepakay inangen doton te langit. Aw megpunù ka te doen mepakay inangen dini lanto te tanà, mepakay heman iyan inangen doton te langit.”

20 Penga niyan, ontò migpunù si Jesus te keilangan eked dan indani diyà te doma otaw te sikandin se Misiyas.

21 Lekat niyan, mig-indan si Jesus diyà te menge tinoledaan din aw eden se metoman domateng diyà kandin. Keilangan domoton sikandin te Jerusalem, aw ipeeleg sikandin te menge obanen aw pengolo te simbahan aw menenoladà te punù ingkeliwat i Moises. Metoman sikandin imetayan, aw penga niyan meantay lekat te nematay te iketelo aldaw. 22 Penga niyan, migpedapag si Pedro diyà ki Jesus, aw sinagda din, kagi din, “Pengolo, eked peden iyan keinang te Timanem diyà kamno. Eked palos iyan ketoman.”

23 Meneng miniling si Jesus, aw minikagi diyà ki Pedro, “Kesayo ka lekat kanak. Iling ka ki Satanas, so mekeanggà ka kanak. Kenà lekat te Timanem se ibeg no sìyan, meneng lekat iyan te aneng-aneng nikaw.”

24 Penga niyan, minikagi si Jesus diyà te menge tinoledaan din, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak. 25 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan. 26 Simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din, so eked kebeyadi se kaling pedowan wedad temanan. 27 Siak se Timanem Migpekeotaw, aw lomikò a dini tekingan te menge anghil aw kelangkaw te Amay ko. Aw lomikò a, begayan ko se kedita te otaw te ontong tepad te tapay dan ininang. 28 Eneng-enengi niyo se kagi ko kenyo seini. Doen otaw dini kenyo eked kematay singed aw onà dan komità te pegtebò te peglowan ko Timanem Migpekeotaw.”