2
Mèpiya se kelowaan lekat te salà
1 So ontò melangkaw si Cristo, yan se doun te netegahan tadon den te keilangan ontò kidon menenalan te menge kebenalan intoladà kenitadon, amon eked kidon soway lekat kenyan. 2 Ontò keseligan se punù te Timanem ingkeliwat te menge anghil diyà ki Moises gebii. So keseligan iyan, yan se doun te impelumun se kedita te otaw limàpang kenyan, aw impelumun se otaw wedà tolò. 3 Yan heman se doun te labi kidon din ipelumun aw eked kidon penenalan te kagi din tepad te ontò mèpiya kelowaan lekat te salà. Pengolo tadon se tagnà migpetaga-taga te doen kelowaan lekat te salà, aw doen heman menge otaw dimineg kandin migpetaga-taga kenitadon te keseligan se kagi din sìyan. 4 Pineokit te menge kepelahan aw menge inang din metolos, impetaga-taga heman te Timanem te keseligan se kagi din ingkeliwat dan. Lekat te kandin ibeg, inteped din heman kandan se menge kemolò te kebiyasa ipegpemegay te Espiritu Santo.
Migpekedanà si Jesus aw migpekeotaw
5 Kenà menge anghil se pinemallì te Timanem ipelowan din diyà te kaling keneyonan te modi aldaw, aw yan se keneyonan in-indan ko den kenyo seini. 6 Meneng otaw beling se ipelowan din kenyan, so doen insolat diyà te kagi te Timanem gebii tepad kenyan,
“E Timanem, ontò ka melangkaw diyà te otaw, meneng kepelahan so wedà kay nikaw kelibeli.
Ontò ka melangkaw, meneng gayed kay nikaw eg-ipaten.
7 Te wedà kenamay ininang no se otaw medanà diyà te menge anghil.
Gebii ininang no se otaw ontò melangkaw,
8 So impelowan no se otaw diyà te kedita.”
So yan se insolat te impelowan te Timanem se otaw diyà te kedita, netegahan tadon te wedad palos pinolò din wedà lowani te otaw, pengkey netegahan tadon te kenà kidon eglowan diyà te kedita songkani. 9 Meneng netegahan tadon te timoman si Jesus limowan. Pegpekeotaw din, neinang sikandin medanà diyà te menge anghil te wedà kenamay, amon somelilin sikandin kenitadon aw matay doton te kros tandà te keido te Timanem kenitadon. Pineokit te pegkematay din, ininang sikandin te Timanem ontò melangkaw. 10 Timanem se miglalang te yan se inangen din, so ibeg te Timanem mig-inang te kedita domuyun kandin, ontò medita se otaw meinang menge batà din aw inangen din melangkaw doma kandin. Yan metòlid se pegpeokit din ki Jesus diyà te kelimahan amon metoman se ibeg din, so pineokit te pegkematay din, impetaga-taga te Timanem te ontò mèpiya si Jesus migtoman te pegpelowà kenitadon lekat te salà.
11 Timanem se Amay i Jesus eglinis lekat te salà, aw Timanem heman se Amay te kedita tadon lininisan din lekat te salà. Yan se doun te kenà sikandin egkeyàyà mikagi te sikitadon se menge kedowa din, 12 so minikagi sikandin,
“Amà, mig-indan a tepad kamno diyà te menge kedowa ko.
Iduyun ta pineokit te pegdelangan ko sipat kedita te otaw egsimba kamno.”
13 Minikagi heman sikandin,
“Somalig a heman diyà te Timanem.”
Minikagi heman,
“Seini a sipat menge batà te Timanem insalig din kanak.”
14 Sikitadon doen lawa egkematay se menge batà te Timanem sìyan. Yan migpekeotaw heman si Jesus amon matay sikandin, so pineokit te pegkematay din, dinaeg din den se eglekatan te kemetayun si Satanas. 15 Nematay si Jesus amon ipelowà din se otaw gayed neallang te lamit te kemetayun. 16 Netegahan tadon te kenà menge anghil se tinebangan din, meneng kedita te menge bowad-bowad i Abraham se tinebangan din. 17-18 Meneng eked sikandin peketabang kenitadon singed aw meinang sikandin iling kenitadon menge kedowa din. Yan se doun te migpekeotaw sikandin aw timayod te kelimahan amon meinang sikandin telekagon tadon doton te Timanem, aw amon pegwedaden din se menge salà tadon. So dinetengan sikandin te kelimahan, yan doen den keido din kenitadon egdetengan te kelimahan. So neketayod sikandin te pegboyo i Satanas, yan meketabang den sikandin te kedita te otaw boyowen i Satanas.