1 Nayan, pegpengibing te menge bowad-bowad i Ismael ki Jose doton te Ehipto, imbeligyà dan sikandin diyà ki Potifar. Si Potifar se sebad opisyal migtelaban te selotan te Ehipto si Paraon, aw sikandin se kapitan te menge sondalo din. 2 Tinebangan te Timanem si Jose, aw mèpiya se kedita te eg-inangen din. Ininang sikandin sineligan doton te balay te amo din sìyan tege Ehipto. 3 Kinità te amo din te tinebangan sikandin te Timanem, aw tandà te tabang te Timanem, mèpiya se kedita te eg-inangen din. 4 Yan neluba si Potifar kandin, aw ininang din sikandin sineligan egtelaban kandin. Ininang din sikandin egpengibing te kedita te otaw doton te balay din aw kedakel te kedònan din. 5 Lekat niyan, so kidoen si Jose, tinebangan te Timanem si Potifar aw dakel se ontong din pengkey doton te balay din aw doton te pawà din. 6 Insalig din se kedakel te kedònan din diyà ki Jose, so dalem te pegpengibing i Jose kenyan, wedad palos keilangan eneng-enengen din, olò kànen din se egpemellien din.

Nayan, mèpiya se bawa i Jose aw magsen se lawa din. 7 Wedà kenamay, neibeg se esawa i Potifar ki Jose aw minikagi sikandin, “Layok ka den kanak.”

8 Meneng mig-eked si Jose, aw timaba sikandin, “Wedad palos keilangan eneng-enengen te amo ko so sineligan a din. Insalig din se kedakel te kedònan din diyà kanak. 9 Iling te onawa se kelangkaw ko diyà te kelangkaw din dini te balay seini. Wedad palos wedà din seligi diyà kanak olò sikona, so esawa ka din. Eked kepakay aw meg-inang a te medaet iling kenyan. Eked kepakay aw meg-inang a te salà diyà te Timanem.”

10 Pengkey nemoyò sikandin ki Jose te kelikit te aldaw amon lomayok aw domoma kandin, meneng wedà sikandin penenalan kenyan.

11 Doen sebad aldaw, minawop si Jose te balay so doen inangen din doton, aw wedad doma sineligan kidoen. 12 Yan minawid se bayi te buktun te saol i Jose, aw minikagi sikandin, “Layok ka den kanak.”

Ayas limowà si Jose lekat te balay aw kimadas sikandin, meneng netenanan din se saol din inewidan te bayi. 13 Pegkità te esawa i Potifar te netenanan i Jose se saol din aw kimadas sikandin lekat te balay, 14 tinawal din se menge doma sineligan, aw minikagi sikandin, “Na, inibing te doma ko dini se Hebreo sìyan amon megyàyà kenitadon. Minawop gina sikandin te tambì ko amon megleges peden kanak, meneng mig-olangag a. 15 Pegdineg din te peg-olangag ko, netenanan din se saol din dini kanak, aw limowà sikandin lekat te balay aw kimadas.”

16 Penga niyan, intagò din se saol i Jose lamig minolì se esawa din. 17 Peg-olì din, onawa se in-indan din, kagi din, “Se Hebreo sìyan sineligan inibing no dini, yan se minawop gina te tambì ko amon megleges peden kanak. 18 Meneng peg-olangag ko, netenanan din se saol din dini kanak, aw limowà sikandin lekat te balay aw kimadas.”

19 Pegdineg te amo i Jose te in-indan te esawa din te medaet se ininang i Jose diyà kandin, ontò sikandin neopal. 20 Impedakep din si Jose aw impekeleboso doton te kotà egsolan te selotan te menge otaw ipegpelumun din. Yan se sinolan ki Jose. 21 Meneng tinebangan sikandin te Timanem, aw gayed dakel se pedowan te Timanem kandin. Neluba se otaw egbantay te keleboso ki Jose, 22 aw ininang din sikandin egpengibing te kedita te otaw kineleboso, aw sikandin se simogò aw eden se inangen dan doton didalem te keleboso. 23 Wedad palos keilangan eneng-enengen te otaw egbantay te keleboso tepad te eg-inangen i Jose, so tinebangan te Timanem si Jose, aw yan mèpiya se kedita te eg-inangen din.