1 Peg-apet te kesyaman teg siyam se omay i Abram, migpekità se Timanem diyà kandin, aw minikagi sikandin, “Siak se Timanem eglowan diyà te kedita. Tolò ka kanak. Keilangan gayed ka meg-inang te metòlid. 2 Tomanen ko se pakang ko kamno. Inangen ko ontò medita se bowad-bowad nikaw.”

3 Limongken si Abram lamig minapet se olo din diyà te tanà, aw minikagi heman se Timanem, 4 “Seini se ipakang ko diyà kamno. Inangen ko sikona kemonaan te medita pongan. 5 Lekat seini, eked ka den ingedani ki Abram (kelebadan niyan, melangkaw amay), meneng ingedanan ka den ki Abraham (kelebadan niyan, amay te medita pongan), so inangen ko sikona kemonaan te medita pongan. 6 Inangen ko medita se bowad-bowad nikaw, aw inangen ko dan medita pongan, aw doen heman kandan meinang menge selotan. 7 Tomanen ko se pakang ko diyà kamno aw diyà te menge bowad-bowad nikaw te wedad temanan. Siak se Timanem meg-ipat kamno aw menge bowad-bowad nikaw te modi aldaw. 8 Se kedakel te tanà te Canaan làno nikaw inogpaan, yan se ibegay ko diyà kamno aw diyà te menge bowad-bowad nikaw amon tig-epoen niyo iyan te wedad temanan. Siak se Timanem meg-ipat kandan.”

9 Minikagi se Timanem diyà ki Abraham, “Doen pengilala tepad te pakang ko keilangan inangen no sipat te kedita te bowad-bowad nikaw te modi aldaw. 10 Seini se pengilala tepad te pakang ko keilangan inangen no sipat te kedita te bowad-bowad nikaw. Keilangan tolien se kedita te meama kidoen kamno. 11 Keilangan megpetolì ka, so yan se pengilala tepad te pakang ko kamno. 12 Se menge bowad-bowad nikaw heman te modi aldaw, keilangan tolien se kedita te batà dan meama te ikewalo te aldaw lekat te pegtebaw, sipat te kedita te allang niyo meama, pengkey tomebaw doton kenyo, aw pengkey beyadan diyà te doma otaw. 13 Keilangan tolien se kedita te meama, so pineokit te pengilala sìyan kidoen te lawa niyo, ketegahan niyo te wedad temanan te pakang ko kenyo. 14 Aw eked tolii se meama, eked sikandin pekeakop diyà kenyo, so eked sikandin tolò te punù tepad te pengilala te pakang ko.”

15 Minikagi se Timanem diyà ki Abraham, “Lekat seini, eked den kepakay aw si Sarai se ngadan te esawa nikaw. Keilangan ingedanan no sikandin ki Sara (kelebadan niyan, batà bayi te selotan). 16 Mèpiya se ibegay ko diyà kandin, aw ibegay ko diyà kamno se batà meama tomebaw diyà kandin. Mèpiya se ibegay ko diyà te esawa nikaw, aw meinang sikandin kemonaan te medita pongan. Doen menge bowad-bowad din meinang selotan.”

17 Limongken si Abraham lamig minapet se olo din diyà te tanà. Nebebayat sikandin, so mig-aneng-aneng sikandin, “Pengkey sebad gatos se omay ko, meneng doen kedì batà ko tomebaw. Pengkey kesyaman se omay i Sara, meneng tebawan kedì sikandin te batà.”

18 Minikagi sikandin diyà te Timanem, “Ibeg ko si Ismael peden heman se begayan no te mèpiya.”

19 Meneng minikagi se Timanem, “Esawa no si Sara se tebawan te batà no meama, aw ingedanan no se batà no sìyan ki Isaac (kelebadan niyan, nebebayat). Sikandin aw menge bowad-bowad din se ketomanan te pakang ko te wedad temanan. 20 Dinineg ko se pinemoyò no tepad ki Ismael, aw yan mèpiya heman se ibegay ko diyà kandin. Ibegay ko diyà kandin se medita batà din aw menge bowad-bowad din. Meinang sikandin kemonaan te sempolò teg dowa datò, aw inangen ko dakel pongan se menge bowad-bowad din. 21 Meneng se batà no si Isaac, yan se ketomanan te pakang ko kamno. Tomebaw sikandin diyà ki Sara te iling kani te modi omay.”

22 Penga te peg-ikagi te Timanem diyà ki Abraham, nesayo sikandin.

23 Dalem te aldaw sìyan, timolò si Abraham te Timanem, aw nenolì sikandin te batà din si Ismael, aw kedita te doma sakop din meama, sipat te kedita te allang din, pengkey timebaw kidoen kandin, aw pengkey bineyadan din diyà te doma otaw. 24 Kesyaman teg siyam se omay i Abraham te pegpetolì din, 25 aw sempolò teg telo se omay te batà din si Ismael. 26 Dalem te aldaw sìyan, tinolì se didowa dan, 27 sipat te kedita te allang din meama.