1 Penga niyan, migpekità se Timanem diyà ki Abram, aw minikagi sikandin, “E Abram, ikà egkelemitan. Siak se megkelasag kamno amon eked ka peelegi. Ontò dakel se ontong ibegay ko diyà kamno.”

2 Meneng minikagi si Abram, “E Timanem eglowan diyà te kedita, wedad palos ibegay no diyà kanak mekebegay te keluba te pedowan ko dalem te wedad batà ko. Aw matay a, metig-apò i Elieser tege Damasko se kedita te kedònan ko. 3 So wedad batà imbegay no kanak, olò allang ko se meketig-apò te kedakel te kedònan ko aw matay a.”

4 Penga niyan, minikagi se Timanem diyà kandin, “Kenà si Elieser se meketig-apò te kedònan nikaw, so kamno batà meama se meketig-apò te kedònan nikaw.”

5 Inibing te Timanem si Abram doton te lowà te balay, aw minikagi sikandin, “Lengag ka den doton te langit. Pegbilang ka te menge bitoen aw mebatog nikaw. Iling kenyan se kedita te menge bowad-bowad nikaw.”

6 Nemenal si Abram te Timanem, aw yan se doun te mig-aneng-aneng se Timanem te metòlid sikandin.

7 Minikagi heman se Timanem, “Siaken se Timanem nengibing kamno lekat te Ur te Caldea. Tod ko ibegay ko diyà kamno se tanà seini, amon tig-epoen no iyan.”

8 Meneng mig-insà si Abram, “E Timanem eglowan diyà te kedita, eden lay se pengilala ipekità no diyà kanak amon ketegahan ko te metoman a meketig-apò kani?”

9 Minikagi se Timanem, “Ibingi dini kanak se baka, kambing, aw karniro, aw keilangan olò telo se omay te tegsebad-sebad kenyan. Ibingi heman dini kanak se ponay aw selepati.”

10 Inibing i Abram se kedita niyan, aw inimetayan din iyan. Binekas din se lawa niyan, aw binelabay din iyan tegdowa-dowa, aw doen elet diyà te tengà-tengà. Meneng wedà din bekasi se dowa manok. 11 Doen menge dakel manok te kebenesan minembong diyà te lawa niyan, meneng linalag iyan i Abram.

12 Pegsallep te aldaw, ontò sikandin impetedogi te Timanem, aw iling te ontò nelemitan se pedowan din. 13 Minikagi se Timanem diyà kandin, “Metoman meg-ogpà se menge bowad-bowad no doton te tanà tinig-apò te menge doma otaw te sebad pongan. Kelimahan dan aw ellangen dan te doma otaw taman te epat gatos se omay. 14 Meneng ipelumun ko se menge otaw meg-allang kandan, aw penga niyan mekelowà dan lekat kidoen te dakel se kedònan ibingen dan. 15 Meneng sikona se eked kesamok. Eked ka kematay singed aw ontò ka megketemoay, aw penga niyan ilebeng ka. 16 Penga te peg-ogpà te menge bowad-bowad no doton te doma ogpeanan taman te ikeepat kebelikwat se pamilya megpetondogay, molì dan dini, so gayed dogangan te menge otaw Amori se peg-inang dan te salà igsà keilangan ipelumun ko dan.”

17 Pegsallep te aldaw sìyan aw pegkengitngit, tigkan kinità i Abram se iling te depolan minebel aw gansà limegdeg. Minokit iyan diyà te tengà-tengà te lawa te ayam-ayam binekas din. 18 Te delem sìyan, migpakang se Timanem diyà ki Abram, kagi din, “Ibegay ko diyà te menge bowad-bowad nikaw se kebelad te tanà seini. Lekat te wayeg doton te Ehipto taman te dakel wayeg te Yofritis, yan se tanà ibegay ko diyà kandan. 19 Ibegay ko heman diyà kandan se tanà inogpaan te menge pongan te otaw iningedanan Keni, Kenisi, Cadmoni, 20 Heti, Perisi, Repai, 21 Amori, Canaan, Girgasi, aw Jebusi.”