4
Kineleboso si Pedro aw si Juan
1 Telobo pa minikagi si Pedro aw si Juan diyà te menge otaw netipon, dimateng diyà kandan se menge pengolo te simbahan, aw kapitan te polis egtonggò te dakel simbahan. Dimateng heman se menge otaw Sadusiyo egtoladà te wedad palos keentayan. 2 Neopal dan, so migtoladà si Pedro aw si Juan te neantay si Jesus lekat te nematay aw doen aldaw te meantay heman se menge otaw lekat te nematay. 3 Dinakep dan si Pedro aw si Juan. Kineleboso dan te sebad se delem amon meinsà dan te keeldawan niyan, so simallep den se aldaw.
4 Meneng nemenal se medita otaw nenenalan ki Pedro aw si Juan. Menge lima melalan se kedita te otaw nemenal, sipat sìyan otaw tapay nemenal.
Kidoen te kelengkawan te oseyanan
5 Keeldawan niyan, netipon se kedita te egpengibing aw obanen te simbahan te Jerusalem aw menenoladà te punù ingkeliwat i Moises, so se kedita dan, yan se menge otaw eglowan te menge Judiyo. 6 Netipon se ontò pengolo te simbahan si Anas, aw si Caifas, aw si Juan, aw si Alejandro, aw menge doma gaked i Anas eleg netipon kidoen. 7 Impeangay dan si Pedro aw si Juan aw mig-insà dan kandan, kagi dan, “Sinu lay se nemegay kenyo te tolos? Sinu lay ngadan se inikagi niyo te nekeinang kaw kani?”
8 Penga niyan, tinebangan te Espiritu Santo si Pedro aw yan minikagi, “Menge egpengibing aw obanen te simbahan, 9 mig-insà kaw kenami tepad te mèpiya ininang day diyà te otaw kapig. Mig-insà kaw aw nemeno se pegkegolì din. 10 Indanan ko den sikiyo aw kedita te doma niyo bowad-bowad i Israel. Negolian se otaw kindoen pineokit te ngadan i Jesu Cristo tege Nasarit. Si Jesus se inimetayan niyo, meneng inantay te Timanem lekat te nematay. 11 Si Jesus se ketomanan te kagi te Timanem insolat,
‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay.’
12 Wedad doma mekepelowà kenitadon lekat te salà. Pengkey dini te kebelad te keneyonan, wedad doma insogò te Timanem dini te keneyonan amon megpelowà te otaw lekat te salà.”
13 Penga niyan, ontò nepela se kedita te obanen te simbahan netipon, so wedà pegketalaw si Pedro aw si Juan te pegtaba dan, pengkey wedà dan ontò pekeiskwila. Meneng mig-aneng-aneng den dan te timaking si Pedro aw si Juan ki Jesus kedengan. 14 Meneng wedad neinang te menge obanen te simbahan kandan ki Pedro so kidoen se otaw negolian. 15 Penga niyan, impelowà dan si Pedro aw si Juan te wedà kenamay. Te iyogan dan, migpeinsaay se menge obanen, 16 “Megmeno kidon? Eked kidon pekeikagi te wedà iyan keinang. Netegahan te kedita te otaw dini te Jerusalem te neinang dan se kepelahan. 17 Meneng mèpiya aw lemiten tadon dan amon eked dan ebey ikagi te ngadan te egtekingan dan sìyan, amon eked iyan ketegahi te menge otaw kidoen te doma lonsod.”
18 Pegtawal dan ki Pedro aw si Juan, migpunù dan te eked dan ebey ikagi te ngadan i Jesus, aw eked dan heman pegtoladà tepad kandin. 19 Meneng timaba si Pedro aw si Juan, kagi dan, “Peg-aneng-aneng kaw aw eden se ibeg te Timanem inangen day, aw sikiyo se toloen day, aw kenà sikandin. 20 Eked kay lengà te peg-indan te benal kinità aw dinineg day.”
21 Meneng labi pa miglamit se menge obanen te simbahan kandan aw migpelowà dan kandan, so wedà dan ketegahi aw eden se ipelumun dan kandan, so dimuyun se kedita te otaw te Timanem te pegkegolì te otaw kapig. 22 Lampas te kepatan se omay te otaw negolian.
Pegtawal-tawal te menge otaw egpemenal
23 Pegkelowà i Pedro aw si Juan, dimoton dan te menge doma otaw egpemenal. In-indan dan se kedita te inikagi te menge pengolo aw obanen te simbahan. 24 Pegdineg dan kenyan, migtawal-tawal se kedita dan diyà te Timanem, kagi dan, “E Pengolo, sikona se Timanem mig-inang te langit, aw tanà, aw dagat, aw kedita heman niyan. 25 Sikona heman se minikagi pineokit te kemonaan day si David egtolò kamno gebii, so pineokit te Espiritu Santo, minikagi sikandin,
‘Meopal se menge otaw kenà Judiyo, aw meglalang se menge Judiyo te medaet, meneng wedad detengan niyan. 26 Megsebad se pedowan te menge otaw eglowan dini te keneyonan amon mato dan te Pengolo aw isogò din.’
27 Netoman den iyan, so dini te Jerusalem, migsebad se pedowan i Herod, aw si Poncio Pilato, aw menge bowad-bowad i Israel, aw menge doma otaw kenà Judiyo, amon imetayan dan se insogò no si Jesus, pengkey wedad kandin salà. Sikandin se ininang no Misiyas. 28 Pengkey inimetayan dan sikandin, meneng se pegketoman niyan, yan se tapay lekat te kamno ibeg. 29 E Pengolo, netegahan no den se peglamit dan kenami. Yan tebangi kay menge sogounun no amon eked kay pegketalaw te peg-indan te kagi nikaw. 30 Pekitai se ketolos nikaw, aw pegolii se menge otaw doen mesakit. Pekitai se kepelahan aw doma inang no metolos pineokit te ngadan te insogò no si Jesus.”
31 Pegtawal-tawal dan diyà te Timanem, nekayong se balay netiponan dan, so dimateng se Espiritu Santo kandan. Lekat niyan, wedà dan kelemitan te peg-indan dan te kagi te Timanem diyà te menge doma otaw.
Pegpetebangay te menge otaw egpemenal
32 Migsebad se pedowan te kedita te otaw egpemenal. Wedad migtameng te kedònan din, meneng gayed dan egpetebangay. 33 Mig-inang se menge sogounun i Cristo te kepelahan, aw mig-indan dan te benal neantay se Pengolo si Jesus lekat te nematay. Ontò tinebangan te Timanem se kedita te otaw egpemenal. 34-35 Yan wedad puluk te kànen aw kedònan dan, so imbeligyà te menge otaw se tanà dan aw balay, aw imbegay dan se kwarta diyà te menge sogounun i Cristo. Inteped dan iyan diyà te menge doma otaw nelimahan. 36 Doen sebad otaw tege Sipro, bowad-bowad i Levi, ngadan din si Jose. Iningedanan sikandin te menge sogounun i Cristo ki Bernabe. (Se kelebadan niyan, “Egpenabang.”) 37 Imbeligyà din se tanà din aw imbegay din se kwarta diyà te menge sogounun i Cristo.