1 Seini se solat ko, si Pablo, doma ki Silas, aw si Timoteo. Simolat kay te kedita niyo egpemenal doton te Tesalonika menge sakop te Amay tadon Timanem aw Pengolo tadon si Jesu Cristo.

2 Ibeg day, tebangan kaw te Amay tadon Timanem aw Pengolo tadon si Jesu Cristo, aw begayan kaw dan heman te kelinaw te pedowan.

3 Menge kedowa day, mèpiya aw megpesiontong kay diyà te Timanem tepad kenyo. Mèpiya se pegpesiontong day, so ontò den magsen se pegpemenal niyo kandin, aw ontò kaw den heman egpedekelay te pedowan. 4 Yan se doun te sikiyo se ipegduyun day te peglaoy day te menge doma otaw egpemenal doton te menge doma lonsod, so eg-indan kay kandan te gayed kaw egpemenal te Timanem pengkey ontò kaw egpemilangen aw egkelimahan.

5 Pineokit kenyan, impetaga-taga te Timanem te metòlid se peg-okom din, so pineokit te pegtayod niyo te kelimahan egkeokitan niyo, ipetaga-taga din te neketagad kaw mekesakop diyà te peglowan din. 6 Ontò metòlid se eg-inangen te Timanem, aw yan ipelumun din se menge otaw nemilang kenyo. 7-8 Meneng sikiyo egpemilangen songkani, inangen kaw din beyang-beyang sipat heman sikami. Yan se inangen din aw lomikò se Pengolo tadon lekat te langit. Iling te apoy se saol din, aw tekingan sikandin te menge anghil metolos lekat te langit. Ipelumun din se kedita te otaw kimulu te Timanem. Ipelumun din se kedita te otaw wedà pemenal te Mèpiya Indan tepad te Pengolo tadon si Jesus. 9 Ipelumun dan te kemetayun wedad temanan, so ipekesayo dan lekat te Pengolo tadon, aw lekat te kelangkaw te tolos din. 10 Yan se meinang te aldaw te peglikò din. Lomikò sikandin amon ipelangkaw sikandin pineokit te kedita te sakop te Timanem, aw amon iduyun sikandin te kedita te otaw egpemenal kandin. Ipesipat kaw heman kandan so nemenal kaw te kebenalan intoladà day kenyo.

11 Yan se doun te gayed kay egtawal-tawal tepad kenyo. Egpemoyò kay diyà te Timanem te ipetagad kaw din kominawà te ibegay din kenyo. Ibeg day, tebangan kaw te Timanem amon metoman se kedita te ibeg niyo meg-inang te mèpiya tandà te pegsalig niyo kandin. 12 Yan iduyun niyo se Pengolo tadon, aw iduyun kaw din heman. Metoman iyan pineokit te tabang te Timanem aw Pengolo tadon si Jesu Cristo.