1 Nayan, keilangan peg-ilingan niyo se pegkedakel te pedowan. Meneng mèpiya aw meibeg kaw te kebiyasa ibegay te Espiritu Santo kenyo, amon meketabang kaw te doma niyo. Se ontò mèpiya kebiyasa, yan se pegkeliwat te kagi te Timanem. 2 Aw mikagi se otaw te doma kagi eked kelebeti, kenà doma otaw se ikegiyan din kenyan, meneng Timanem se ikegiyan din, so pengkey wedad otaw mekelabet te kagi din, meneng pineokit te Espiritu Santo, ikegiyen din se kebenalan wedà ketegahi te doma otaw. 3 Meneng aw komeliwat se otaw te kagi te Timanem, doma otaw se ikegiyan din kenyan, amon ketebangan din se pegsalig dan te Timanem, aw amon entagen din heman se pedowan dan, aw amon meketayod dan heman te kelimahan. 4 Aw mikagi se otaw te doma kagi eked kelebeti, olò kandin pegkeotawun se ketebangan din. Meneng aw komeliwat se otaw te kagi te Timanem, yan se meketabang te kedita te doma otaw egsimba. 5 Pengkey ibeg ko mekeikagi se kedita niyo te doma kagi eked kelebeti, meneng labi pa mèpiya aw mekekeliwat kaw te kagi te Timanem amon ketebangan se doma otaw egsimba. Labi pa mèpiya se pegkeliwat te otaw te kagi te Timanem diyà te peg-ikagi te otaw te kagi eked kelebeti aw wedad otaw mekeobad te ikegiyen din.

6 Menge kedowa ko, simpana domoton a kenyo, aw olò a mikagi te kagi eked niyo kelebeti, wedad ontong niyo singed aw mikagi a te impetaga-taga te Timanem kanak, aw megpekelabet a kenyo te kebenalan, aw komeliwat a te kagi te Timanem, aw megtoladà a kenyo. 7 Iling te daging te seluli aw kitara, aw eked iyan kelitok, eked ketegahi aw eden se litok. 8 Iling heman te peg-edop te bodyong amon metipon se menge otaw mato te menge mengayaw, so aw eked kelitok se peg-edop kenyan, wedad meketagad. 9 Sikiyo heman, aw eked kebangal se ikegiyen niyo, wedad mekelabet kenyo aw wedad ontong kenyan, so ipalid olò te kelamag se kagi niyo. 10 Doen medita kemolò te kagi te otaw dini te keneyonan, aw doen kedegdagan te teg sebad-sebad kenyan. 11 Meneng aw eked ko kelebeti se kagi te otaw mikagi kanak, yan se iling te otaw kenà tege dini, aw iling a heman kandin. 12 Sikiyo heman, aw meibeg kaw te kebiyasa ibegay te Espiritu Santo, yan mèpiya aw keibegan niyo se kebiyasa meketabang te menge doma niyo egsimba.

13 Aw doen otaw kidoen kenyo mekeikagi te kagi eked kelebeti, keilangan pemoyoen din diyà te Espiritu Santo se kebiyasa amon meobad din se kagi din eked kelebeti. 14 Aw megtawal-tawal a te kagi eked kelebeti, pengkey megtawal-tawal se pedowan ko, meneng eked taking se aneng-aneng ko. 15 Aw iling kenyan, seini se inangen ko. Megtawal-tawal a te kagi eked ko kelebeti imbegay te Espiritu Santo kanak, meneng megtawal-tawal a heman te kagi kelebetan. Aw megdelangan a te kagi eked ko kelebeti imbegay te Espiritu Santo kanak, megdelangan a heman te kagi kelebetan ko. 16 Aw megpesiontong kaw diyà te Timanem te kagi eked kelebeti, eked pegpesiontong se doma otaw egsimba doma kenyo singed aw doen meg-obad kenyan, so eked dan kelebeti se eg-ikegiyen niyo. 17 Pengkey ontò mèpiya se pegpesiontong niyo diyà te Timanem, meneng eked ketebangi se menge doma otaw. 18 Egpesiontong a diyà te Timanem so egpekeikagi a te kagi eked kelebeti, aw labi a pa ontò biyasa diyà te kedita niyo. 19 Meneng aw doen doma ko megsimba, mèpiya aw ikegiyen ko se kagi kelebetan dan amon ketoledaan ko dan. Pengkey olò lima kagi kelebetan dan se ikegiyen ko, yan se labi pa mèpiya diyà te sempolò melalan kagi ikegiyen ko eked dan kelebeti.

20 Menge kedowa ko, ikà niyo eg-iling te mengisù wedad inenengen. Pengkey mèpiya aw iling kaw te mengisù wedad toig meg-inang te salà, meneng diyà te aneng-aneng niyo, pekitai niyo te metesan kaw den. 21 Doen kagi te Timanem insolat, te pengkey doen menge otaw lekat te mediyò ogpeanan eg-ikagi te sebad kemolò kagi, aw pengkey pineokit kandan mikagi se Pengolo diyà te menge otaw pinemallì din, meneng kunù eked dan penenalan. 22 Yan ketegahan tadon ini. Se peg-ikagi te kagi eked kelebeti, yan se petaga-taga te Timanem diyà te otaw egpengela te metoman dan detengan te pelumun, aw kenà ini petaga-taga diyà te otaw egpemenal. Meneng se pegkeliwat te kagi te Timanem, yan se tabang te Timanem diyà te otaw egpemenal, so kenà ini tabang diyà te otaw egpengela. 23 Aw metipon kaw megsimba, aw mikagi se kedita niyo te kagi eked kelebeti, aw penga niyan mawop se otaw kenà egpemenal aw wedà ketoledai te kebenalan, yan mekeaneng-aneng sikandin te migkebook kaw den, so wedà sikandin pekelabet. 24 Meneng aw se kedita mikagi, komeliwat dan te kagi te Timanem, aw penga niyan mawop se otaw kenà egpemenal aw wedà ketoledai te kebenalan, yan aw menenalan sikandin, ketegahan din te benal sikandin mig-inang te medaet, aw mikagi sikandin te benal doen salà din diyà te Timanem. 25 Ipeaneng-aneng kandin se medaet diyà te pedowan din, aw penga niyan tomikelong, aw megsimba te Timanem, aw mikagi sikandin te benal doen Timanem doma niyo.

26 Nayan menge kedowa ko, aw metipon kaw megsimba, seini se mèpiya inangen niyo. Doen megdelangan tepad te pegduyun te Timanem. Doen heman doma megtoladà. Doen heman doma meg-indan te kebenalan impekità te Timanem kandin. Se doma mikagi te kagi eked kelebeti, aw meg-obad heman se doma kenyan. Inangi niyo ini amon ketebangan se kedita niyo egtaking ki Cristo. 27 Aw doen otaw meibeg mikagi te kagi eked kelebeti, mepakay aw taman olò te dowa aw kenà telo se megpetibos-tibosay mikagi, aw penga niyan keilangan doen otaw meg-obad. 28 Meneng aw wedad otaw kidoen biyasa meg-obad kenyan, keilangan wedad mikagi te kagi eked kelebeti kidoen te simbahan. So aw wedad meg-obad, mepakay aw iduyun din se Timanem te kagi eked kelebeti te wedad doma din. 29 Aw doen otaw kidoen kenyo biyasa komeliwat te kagi te Timanem, mepakay aw dowa aw kenà telo olò se mikagi, aw keilangan menenalan se kedita megsimba, amon ketegahan dan aw metòlid se ikegiyen dan. 30 Meneng aw doen ipekità te Timanem diyà te sebad otaw, ipetunung onà se monà migtoladà. 31 Aw yan se inangen niyo, meketoladà se kedita te telekeliwat te kagi te Timanem te petibos-tibosay, amon mekeiling se kedita niyo megsimba, aw meantag heman se pedowan te kedita niyo timaking ki Cristo. 32 Se otaw biyasa megkeliwat te kagi te Timanem, mepakay din ipetunung se kagi din, 33 so kenà lekat te Timanem se belisì, meneng sikandin se kelekatan te kelinaw te pedowan.

Iling te ketanem te kedita te sakop te Timanem egsimba doton te teg sebad-sebad lonsod, 34 egkepenek se menge bayi doton te simbahan, so eked kepakay aw mikagi dan. Doen heman kagi te Timanem insolat, te keilangan tomolò se bayi te meama. 35 Aw meibeg se bayi meg-insà, keilangan meg-insà sikandin te esawa din doton te balay, so kenà mèpiya aw mikagi se bayi kidoen te simbahan.

36 Doen besi menge otaw kidoen kenyo egpengela te intoladà ko seini. Mig-aneng-aneng dan besi te sikiyo tege Korinto se tagnà pinetega-tegahan te Timanem te kebenalan. Aneng-aneng dan besi, sikiyo olò se binegayan te kebenalan. 37 Aw doen otaw kidoen kenyo meg-aneng-aneng te sikandin se komeliwat te kagi te Timanem, aw doen doma kebiyasa din imbegay te Espiritu Santo kandin, yan keilangan ketegahan din te ontò punù te Pengolo tadon se insolat ko seini. 38 Aw wedà sikandin pemenal te lekat te Pengolo tadon se punù seini, ikà niyo egpenenalan kandin.

39 Nayan menge kedowa ko, ontò kaw pekeaseb te pegkeliwat te kagi te Timanem, meneng ikà niyo egsagda te peg-ikagi te kagi eked kelebeti. 40 Keilangan inangen niyo se kedita diyà te kebenalan aw kedalem te pedowan.