Salmo 84
84
I ayè satu to i Bong Gumnè Dwata
Ani satu lingag i bel Kora.
1 E Amugu Dwata, gumdatah i kdee di tah langit na tanà,
too bong nawagu i Bong Gumneam.
2 Too mayè i nawagu salu déén di gustifun dad to mangamfù di ge,
du én too kayè i nawagu, fdadong di ge;
mdà di foon i nawagu kayègu mlingag di klehewgu di too mto Dwata.
3 Amugu Dwata, gumdatah i kdee di tah langit na tanà, balù dad malnak anuk di bnas,
nimòla i salalla ditù di gudamsù di ge,
na dad kalsidaw, ditù gumifatla dad ngàla di gumneam, harìgu na Dwatagu.
4 Na too nun kafye i dad to mnè di Bong Gumneam;
too ale gal mlingag du dmayen ge.
5 Too nun kafye i dad to gamfun kgal mdà di ge;
too nun ayèla salu di bululam Sion, du mangamfù di ge.
6 Na di kagula salu ditù, di kifalla i too kafag banwe dnagit Baka,
tì maloh déén dad sfuten,
na di tnanin kulenan nun dee malnak kligu déén.
7 Na mbaling matnù i galla di kagula,
na kakella di Sion, tadag ale di kanfe Dwata.
8 E Amugu Dwata, gumdatah i kdee di tah langit na tanà, begam fanlinge i kdasalgu di ge;
E Dwata, gusmalig i gutambulmi Dyékob, fanlingem agu.
9 E Dwata, banlém kafye harìmi,
i mgalékam mebe gami.
10 Balù ku alò sduhgu mnè di gustifun dad to mangamfù di ge,
too fye fa i knègu ditù, di knègu di balù nean, balù ku kel di mlibu fali.
Balù ku alògu tadag di bà gufusuk di Gumnè Dwatagu,
too fye fa di deg di knègu di lam i gumnè i dad to mimò sasè,
11 du Amugu Dwata lamwa fandam i dad to na kamlung dale,
na kenen mlé kafye na kdatah.
Landè kafye i klenan di dad to matlu nimòla.
12 E Amugu Dwata, gumdatah i kdee di tah langit na tanà,
too nun kafye i to smalig di ge.