1 Tijb dxej bidoꞌp zien ree bejn abiꞌ achet ni gaw reeman. Dxel gurejdx ree xbejn Jesús rëbaman loj reeman:

2 ―Rayan bén guin ree din ma gojc choon dxej nadxuꞌnëꞌ reeman guie, abiꞌ ad caꞌt ni gaw reeman. 3 Abiꞌ bal yaxhalan laa reeman lidx reeman sin guialraw, dool yadaj reeman lunejz, din yuꞌ reeman zëëd zijt.

4 Dxel rëb ree xbejnman:

―Per, ¿ban guin yucaꞌn ni gaw ree bén guin, achutczi bejn zojb niz guie?

5 Dxel gunabdiidxaman loj reeman rëbaman:

―¿Bël guiadxtil caꞌdi?

Abiꞌ rëb reeman:

―Gajdxan.

6 Dxel gunabeeman gurej ree bén guin luyuj. Zianz cwaꞌman guigajdx guiadxtil guin, badëëman quixtëë loj Dios, abiꞌ gulaꞌman laa reen badëëd loj ree xbejnman persi gudiꞌs reeman laa reen loj gra ree bén guin. 7 Nëgajc tioꞌp choon ree bëjldoo caꞌ reeman, abiꞌ badëëman quixtëë loj Dios dxel gunabeeman gudiꞌs reeman në laa reeb loj ree bén guin. 8 Graczi reeman gudaw xt bigdxinladx reeman, abiꞌ staczi bacha reeman gajdx dxüm guiadxtil laay në bëjl ni bayaꞌn. 9 Bén gudaw ree na̱j reeman cost tajp mil. Chi gulox gudaw reeman, dxel bazaadiidxnë Jesús laa reeman. 10 Zianz guyuman loj barcw con ree xbejnman zë reeman niz Dalmanuta.

11 Dxel bidxin ree bénfarisew, guzuloj cadildiidxnë reeman Jesús, abiꞌ par güün reeman laaman prueb, gunab reeman güünman tijb milagr ziꞌc tijb sen guial por Dios zëëdaman. 12 Dxel banajladx Jesús, rëbaman:

―¿Chexc zeel rëndi günan tijb milagr? Diidxli ganin, achetczi milagr günan guguiaadi.

13 Dxel basaꞌnman laa reeman, bayuman loj barcw zatijb, zignë ree xbejnman stiblad roꞌ nijs guin.

14 Bayanladx ree xbejn Jesús ninë reeman guialraw, tijbzi guiadxtil caꞌ reeman loj barcw guin. 15 Abiꞌ chi rëbaman loj reeman:

―Gol gojp cudad con xlevadur ree bénfarisew në xlevadur Herodes.

16 Dxel guzuloj rëb loj lasaꞌ reeman:

―Naman duloj ree zian guial ad nacaꞌt ree guiadxtil.

17 Abiꞌ gogbee Jesús ni canee reeman, zianz rëbaman:

―¿Chexc zeel rëbidi guial ad caꞌtidi guiadxtil? ¿Staczi ad rigniaꞌtidi ya? ¿Sta nayaaw xquiarguiejndi ya? 18 Yuꞌ guiaalojdi per rulüü ad ruguiaatidi, yuꞌ guidiajguidi per rulüü ad riguiejntidi. ¿Nid rusaaladxidi ya? 19 Chi gudiꞌsan gaay guiadxtil loj gaay mil bejn, ¿bël dxüm ni laay batoꞌpidi?

Badxiꞌ reeman laan rëb reeman:

―Chiptioꞌpan.

20 Dxel rëbaman:

―Laadx chi gudiꞌsan gajdx guiadxtil loj tajp mil bejn, ¿bël dxüm guidxa bacaꞌdi?

Badxiꞌ reeman laan rëb reeman:

―Gajdxan.

21 Dxel rëbaman:

―¿Staczi ad waygniaꞌtidi ya?

22 Chi bidxin Jesús guiedx Betsaida con ree xbejnman. Binë ree bejn tijb bén ad ranit loj, rëb reeman loj Jesús din gugaalaman guiaalojman. 23 Dxel gunaaz Jesús yaaman gulëëman laaman luguiedx guin, abiꞌ gudëëb xhiejnman guiaalojman, baquiꞌman guiaalojman. Zianz gunabdiidxaman rëbaman:

―¿Rajc ruguiaal taꞌn ya?

24 Dxel guzuloj cuguiaaman, abiꞌ rëbaman:

―Ruguian bejn ree, per rulüü na̱j reeman ziꞌc yag ni caza.

25 Dxel bagaal Jesús guiaalojman stijb, abiꞌ rëbaman lojman din guguiaadxijchaman, dxel guzuloj cuguiaaman zagdxe, naynidxuj ma ruguiaaman gra. 26 Abiꞌ baxhaal Jesús laaman lidxaman, rëbaman:

―Ad yayul luguiedx guin achu tëë loj guiëbil xhienaag bayajc lojl.

27 Bazanë ree xbejn Jesús niz Galilea, wej reeman guiedx rigaꞌ ree Cesarea de Filipo. Chi zë reeman lunejz gunabdiidx Jesús loj ree xbejnman, rëbaman:

―¿Chu rëb ree bejn najn?

28 Badxiꞌ reeman laan rëb reeman:

―Yuꞌ reeman rëb lüj na̱j Waj bén baroobnijs bejn ree, yuꞌza reeman rëb lüj na̱j Elías, yuꞌ tëë reeman rëb lüj na̱j tijb ree bén badëëd xtiidx Dios loj ree bejn gocli.

29 Dxel gunabdiidxaman rëbaman:

―Laadx lëjt, ¿xhie nadi chu najn?

Badxiꞌ Bëdan rëbaman:

―Lüj na̱j Cristo.

30 Per rëb Jesús loj reeman achu loj guiëb reeman zian.

31 Guzuloj Jesús rëb loj ree xbejnman:

―Rayal sagdiaj daꞌt Bén guxhaal Dios. Ad zënt ree guxtis Israel laaman, niꞌqui ree bixhioz rniabee ree bixhioz, niꞌqui ree mextr rajc ley. Gugüjt reeman laaman, per ni yayon dxej yabanman.

32 Zagdxe basigniaꞌman laa reeman. Dxel gulëëcaan Bëd laaman, rëbaman lojman chitëë rëbraman zian. 33 Per badxiꞌ lojman baguiaa ree xbejnman, dxel gudilëman Bëd rëbaman:

―¡Bisüd lon, Satanás!, din ad por Diost zëëd ree xgab ni rüjnl, rüjnl ziꞌc na̱j xixgab bénguidxliuj.

34 Dxel gurejdx ree xbejn Jesús con ree bén rigaꞌ yagaj, abiꞌ rëbaman loj reeman:

―Bal chu rën gac da bejnan, ad rayalt güünman ziꞌc na̱j xixgabaman. Siibnejzaman guialzi ni tëdzaman abiꞌ guidnalaman naj. 35 Din bén mazri rën guialnaban ni rajpaman loj guidxliuj guie, zadxin dxej gusëëbaman laan, per bén guiët por naj në por da diidxan, zajpaman guialnaban tiblayaa con Dios. 36 ¿Xhie gan güün bejn gapaman gra ni yuꞌ loj guidxliuj bal canijtaman loj Dios? 37 Din ad zileꞌt sii bejn xguialnabanman xanyabaa. 38 Din bén yatunë naj në da diidxan niz loj ree béndol bén ad zinalt ree xnejz Dios, bén rigaꞌ ree yan, ziangajc naj, najn Bén guxhaal Dios, yatunëꞌn laaman chi guialan con xguialrniabee da Dadan con ree xianjlaman.