1 Baza Jesús yagaj, badxin ladxaman con ree xbejnman. 2 Chi bidxin dxej raziiladx ree bejn, guzuloj culüüman bejn ree lën yadoo. Abiꞌ gra ree bén cucaagdiajg dád badxa loj reeman ni rnieeman, abiꞌ rëb reeman:

―¿Ban basiid bén guin gra ni rnieeman? ¿Ban gulëëman guialrigniaꞌ guin abiꞌ chu badëë guialrniabee zeel rüjnman milagr guin ree?

3 ¿Nid laaman na̱j bén carpinter ya, xiꞌn Li abiꞌ ree bijchaman na̱j Jacob, Xiëb, Judas, në Simón? Guiáad ree bizanman zojb luguiedx guie.

Abiꞌ ad bidxgaꞌt reeman Jesús. 4 Per rëbaman loj reeman:

―Guidibczi rajp reeman respejt tijb bén rudëë xtiidx Dios loj ree bejn. Per ladxaman achut rajp laaman respejt, niꞌqui lidxaman, niꞌqui ree xfamilaman ad rajpt laaman respejt.

5 Ad bileꞌt nüjn Jesús zien ree milagr yagaj. Bëlzi ree bénragxuu bayüjnman, badxiib yaaman guijc reeman. 6 Dád badxalojman guial ad bililadxt reeman laaman. Dxel zëman guiedx na̱j ree gajxh, ziglüüman bejn ree.

7 Dxel gurejdx Jesús guidxiptioꞌp ree xbejnman, abiꞌ guxhaalaman tioꞌp gaj reeman. Badëëman guialrniabee loj reeman din yabëë reeman xindxab ree luxdoo ree bejn. 8 Dxel gunabeeman din achetczi chinë reeman par runejz, niꞌqui guijxh, niꞌqui guialraw, niꞌqui milia, tijbzi yagrliadx reeman, 9 con xgurëch reeman, con tijbzi lajd najcw reeman. 10 Dxel rëbaman loj reeman:

―Yu lod guidxindi, tijbzi yagaj yayaꞌndi xt guidxin dxej yazadi luguiedx guin. 11 Bal yuꞌ guiedx lod ad rënt reeman lëjt o ad rënt reeman gucaagdiajg reeman ni rnieedi, gol barii yagaj, gol gudxijp guxyuj guiaꞌdi ziꞌc sen guial ad rënt reeman guzoob reeman diidx. Din naj rni lojdi, guial dxej ni yadëëd ree bejn cwent loj Dios mazri casti naroob yayal reeman guial loj ree bén Sodoma në Gomorra.

12 Zianz brii reeman ziguiedx reeman loj ree bejn guial rayal yayüjn reeman xgab por xtol reeman. 13 Abiꞌ rabëë reeman zien ree xindxab luxdoo ree bejn, zien tëë ree bénragxuu gudëëb reeman sejt, abiꞌ bayüjn reeman laa reeman.

14 Chi biguiejn rey Herodes ni rüjn Jesús guial ruzaꞌt ree bejn laaman guidibczi, rëb reeman:

―Waj, bén baroobnijs bejn ree ma baban, zeel rajpaman guialrniabee rüjnman milagr ree.

15 Per yuꞌ reeman rëb:

―Elíasan, bén rudëë xtiidx Dios loj ree bejn.

Yuꞌza reeman rëb:

―Tijb bén rudëë xtiidx Dios loj ree bejnan lasaꞌ ree bén gocli.

16 Chi biguiejn Herodes rëb reeman zian, rëbaman:

―Wajn, xin gunabeen biruꞌ yëjn, laaxan ma baban yan.

17 Rëb Herodes guin zian din laagajcaman gunabee gunaaz reeman Waj, abiꞌ badxeꞌman laaman ladxguiib por Herodías. Herodías na̱j xbéngunaa Felip bijch Herodes. Per Herodes cwaꞌman Herodías. 18 Abiꞌ guial rëb Waj loj Herodes:

―Ad laat tiaꞌ xbéngunaa bijchil.

19 Zeel bidxeꞌch Herodías Waj, guyënman nugüjtaman laaman. Per ad rileꞌtan, 20 din rdxeb Herodes guial ragbeeman rüjn Waj ni rën Dios, rüjn tëëman ziꞌc rayal, zeel ad cwëjbtaman xhie nüjnnë Herodías Waj. Majsi ad ragbeet Herodes xhie güünman por ni rëb Waj lojman, per ruladxaman gucaagdiajgaman ni rnieeman.

21 Per bidxin dxej been Herodías ni rënman. Chi bazaꞌ Herodes ijz, abiꞌ beenman lanij, badxeꞌman tijb guialraw par bén rniabee ree në par ree bén rniabee ree suldad nëtëë ree bén zojbloj niz Galilea. 22 Dxel guyu xiꞌn Herodías lod cayajc lanij guin zianz bayaꞌm. Abiꞌ Herodes con ree xbioozaman dád bayuladx reeman ziꞌc bayaꞌm. Zeel rëb rey guin lojm:

―Gunab ni rëntzil, naj gune laan.

23 Xt badëë xtiidxaman gudëëman ni guiniabtzim, majsi garol ni rajpaman. 24 Dxel bariim bignabdiidx loj xniaam, rëbim:

―¿Xhie ganaaban?

Badxiꞌman laan rëbaman:

―Gunab guijc Waj bén ruroobnijs bejn ree.

25 Laa bayugajquim lod zaꞌ rey Herodes, rëbim lojman:

―Yan gajc rënan guneel guijc Waj, bén ruroobnijs bejn ree, guneelan loj tijb pliajt.

26 Dád guyu naya Herodes, per mal badëëd xtiidxaman guidib loj ree bén rigaꞌ, zeel ad bileꞌt nibexuuman nudëëman ni gunabim. 27 Dxel gunabee Herodes tijb suldad din chicaꞌx guijc Waj. 28 Zianz wej suldad guin lën ladxguiib guin, gutüꞌx guijc Waj badxeꞌxan loj pliajt binëxan lojm. Dxel bayü loj xniaamin.

29 Chi gogbee ree xbejn Waj guial ma güjtaman, bacaꞌ reeman xcuerpaman persi biquieꞌch reeman laaman.

30 Chi bayejc ree xi apóstoles Jesús, be reeman diidx lojman gra ni been reeman në ni balüü reeman. 31 Dxel rëb Jesús loj reeman:

―Gol guda, yoꞌ dunujz ree niz lod achut bejn zojb din yaziiladx ree taꞌn.

Rëbaman zian guial dád zien ree bén zia zien tëë ree bén zëëd, xt niꞌqui guial gaw reeman ad rileꞌtan.

32 Dxel Jesús con ree bén na̱j ree apóstoles zë reeman loj barcw tijb luar lod achut zojb. 33 Per dád zien ree bejn baguiaa guial zë reeman, abiꞌ bayünbee reeman laa reeman zeel zien ree bejn brii luguiedx guin ree ruxüün reeman, abiꞌ yalojl laa reeman bidxin lod zë Jesús con ree xbejnman.

34 Chi baguiajt Jesús loj barcw guin, baguiaaman bén guixiuj rigaꞌ yagaj, abiꞌ bayaman laa reeman guial zaꞌ reeman ziꞌc xiil achut rajp. Dxel guzuloj balüüman laa reeman, zien ree ni balüüman laa reeman. 35 Chi ma gudxe, gubig ree xbejnman, rëb reeman lojman:

―Ma gudxe yan, abiꞌ achut bejn zojb niz guie. 36 Güjdx loj ree bén guin din che reeman ranch ree në ree guiedx ni rigaꞌ gajxh chisii xhienin gaw reeman.

37 Per rëb Jesús loj reeman:

―Lëjt gol badëëd ni gaw reeman.

Dxel rëb reeman lojman:

―Per zroꞌ daꞌt milia ryaadx din yoꞌ ni gaw ree bén guin, ziꞌct ni rüjn bejn gan loj tioꞌp gayuu dxej.

38 Abiꞌ rëb Jesús loj reeman:

―¿Bël guiadxtil caꞌdi? Gol baguiaa don.

Chi baguiaa reeman, dxel rëb reeman:

―Gaay guiadxtil con zatioꞌp bëjl.

39 Dxel gunabeeman din cwe tibcwaa gaj reeman loj guixyaꞌ. 40 Zianz gurej reeman zian, yuꞌ lod gure tibgayuu reeman, yuꞌ lod gure tüꞌpchii reeman. 41 Abiꞌ cwaꞌ Jesús guigaay guiadxtil guin con grop bëjl guin. Dxel gules lojman xanyabaa, badëëman quixtëë loj Dios, gulaꞌman guiadxtil guin badëëman loj ree xbejnman persi gudiꞌs reeman laan loj ree bén rigaꞌ, gudiꞌs tëëman grop bëjl guin loj gra reeman. 42 Graczi reeman gudaw xt bigdxinladx reeman, 43 abiꞌ staczi bacha reeman chiptioꞌp dxüm guiadxtil laay con bëjl ni bayaꞌn. 44 Loj ree bén gudaw noꞌch cost gaay mil xinguiaaw.

45 Dxel gunabee Jesús guyu ree xbejnman loj barcw din tëdgaj reeman stiblad roꞌ nijs par guidxin reeman Betsaida, laꞌtgaj cuzaadiidxnëman benzien guin ree. 46 Chi gulox bazaadiidxnëman laa reeman, wejman guijc tijb guiaꞌ, persi gurejdx gunabaman Dios. 47 Chi ma cabej guiaal, ma yuꞌ barcw guin galay nijs guiáad Jesús bayaꞌn xtijbzaman guijc guiaꞌ guin. 48 Dxel baguiaaman dád cazagdiaj ree xbejnman cusa reeman barcw guin guial rliaj bi niz loj barcw guin. Abiꞌ chi ma cayreguiaal zibig Jesús loj reeman cazaman loj nijs guin, beenman ziꞌc bén tëdnejz. 49 Chi baguiaa reeman cazaman loj nijs guin gunaladx reeman sprijt malan, abiꞌ gurixdiaj reeman. 50 Dád cadxeb reeman por ni cuguiaa reeman. Per guneenë Jesús laa reeman rëbaman:

―¡Gol baguꞌ luxdoodi, ad bal rdxebidi, najn!

51 Dxel guyuman loj barcw guin, zianz gulëjz bi guin. Guiáad laa reeman dád badxa loj reeman, 52 din nayaaw xquiarguiejn reeman, abiꞌ ad bigniaꞌt reeman milagr ni beenman con guiadxtil guin ree.

53 Chi ma gudëd reeman lojnijs guin bidxin reeman xdajn ree bén Genesaret, yagaj guxhii reeman barcw guin roꞌ nijs. 54 Naabzi baguiajt reeman loj barcw guin, laa bayünbee gajc ree bejn Jesús. 55 Abiꞌ gutieꞌch reeman diidx guidib niz yagaj. Dxel guzuloj zinë ree bejn bénragxuu ree lod riguiejntzi reeman zaꞌ Jesús. 56 Bantëëz zëman, majsi guiedx naroob o guiedx dobëz o ranch ree, rguijxh reeman bénragxuu guin ree niz lod tëdaman. Dxel rzajc reeman laaman liaadx din tiëbaman gugaal reeman majsi guiaꞌz xabaman. Abiꞌ graczi ree bén bagaal xabaman bayajc.