1 ¡Jéehua nu huatányetyamuaꞌveꞌsij matɨꞌɨjta aꞌyan tyinaatéꞌexaatyeꞌen tɨjɨn:

“Cheꞌréj aꞌájna joꞌtɨj joꞌtyéjvee ɨ tyeyúujraꞌ ɨ Tavástaraꞌ”!

2 Jerusalén, ¡tuꞌríj utyájrupij aꞌájna joꞌtɨj jaꞌpueertaj!

3 Jerusalén, chájtaꞌnaj tɨ huatyátaavijhuacaꞌ

mej mij néijmiꞌi aꞌáa jóosɨꞌrihuaꞌan aꞌáa maj joꞌcháatɨmee.

4 Aꞌáa mu jaꞌráꞌiixaj aꞌɨ́ɨmaj ɨ maj Tavástaraꞌ jitze ajtyámaꞌcan

mej mij tyaatatyójtziꞌreꞌen ɨ tɨ jɨn ántyapuaj,

aꞌyájna matɨꞌɨj tyihuoꞌtaꞌíj aꞌɨ́ɨjma ɨ maj Israel jitze ajtyámaꞌcan.

5 Aꞌáa pu jáꞌsejreꞌ joꞌmaj jeꞌráatyij ɨ maj tyámuaꞌ naa tyáꞌxaꞌpuɨꞌɨntareꞌ,

joꞌmaj jeꞌráatyij ɨ maj tyáꞌxaꞌpuɨꞌɨntareꞌ aꞌájna joꞌtɨj ɨ David jaꞌchej.

6 Aꞌyaa xu muaꞌaj tyuꞌtaxáj néijmiꞌi ɨ juxɨéjnyuꞌcaa jɨmeꞌ tɨjɨn:

“Cheꞌ tyámuaꞌ tyíꞌeenyeꞌ muéetzij jimi, Jerusalén;

micheꞌ juxáahuaj huacháatɨmeꞌnyij aꞌɨ́ɨmaj ɨ maj muaxɨeꞌveꞌ.

7 Cheꞌ tyámuaꞌ tyíꞌeenyeꞌ aꞌɨ́jcɨ jitze ɨ paj jɨn curiáꞌnamiꞌ,

majta tyámuaꞌ tyíꞌchaꞌɨɨj aꞌújna joꞌmaj jeꞌráatyij ɨ maj tyíꞌijta.”

8 Ajta ijíij, aꞌɨ́ɨjma jitze maꞌcan ɨ nyeꞌihuáamuaꞌ majta ɨ maj nyamuaꞌtyej aꞌyaa nu tyuꞌtaxájtaj tɨjɨn:

“Cheꞌ néijmiꞌi tyámuaꞌ tyíꞌeenyeꞌ muéetzij jimi.

9 Aꞌɨ́jcɨ jitze maꞌcan ɨ tyeyúujraꞌ ɨ Tavástaraꞌ taj Dios

aꞌɨj nu huoonyij ɨ tɨ tyámuaꞌ een muéetzij jimi.”