85
Pajtáhuaꞌaj paj tajapuá huatányuunyij
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré
1 Tavástaraꞌ, muáaj paj tyámuaꞌ naa huojoꞌmuaꞌraj aꞌyaa maj huacháatɨmee aꞌ chuéj japua;
pajta jájcuan jɨn tyámuaꞌ tyeetyájtoo aꞌɨ́jcɨ ɨ Jacob,
2 pajta tyihuoꞌtúꞌuunyiꞌriꞌ tyiꞌtɨ́j maj jɨn jeꞌej puaꞌaj huarɨ́j aꞌtyéɨtyeristyamuaꞌ
pajta néijmiꞌi ɨ maj jɨn tyiꞌijxánaꞌcɨraꞌcaꞌaj;
3 néijmiꞌi pu arí jɨn huatyápuaꞌriacaꞌ
ɨ paj jɨn nyuꞌcamuɨꞌcaꞌaj ajta ɨ tɨ muajaaxɨejtyaꞌcaꞌaj.
4 Taj Dios pajta aꞌɨ́ɨn puéꞌeen ɨ tɨ tajapuá huatányuusij,
¡pataꞌaj ijíij tajapuá huatányuunyij
pajta jeꞌen quee cheꞌ ityájma tajaaxɨejviꞌraj!
5 ¿Caꞌ jusén jɨmeꞌ aꞌyan tyiꞌséereꞌej jaꞌmej
ɨ paj jɨn tajimí nyúꞌcamuɨꞌ?
6 ¿Nyi pequee cheꞌ júuricamej taatáꞌsij
mej mij aꞌtyéɨtyeristyamuaꞌ aꞌ jimi huatóotyamuaꞌveꞌen?
7 Muáaj paj Tavástaraꞌ,
¡taataséjratyeꞌ ɨ paj jɨn taxɨeꞌveꞌ, pajta tajapuá huatányuunyij!
8 Nyáanamuajran jeꞌej tɨ ɨ Tavástaraꞌ tyuꞌtaxájtaj;
jiꞌnye aꞌɨ́ɨ pu tyámuaꞌ naa tyihuoꞌtyéjeevij ɨ jutyéɨtyeristyamuaꞌ,
aꞌɨ́ɨjma ɨ maj jimi tyámuaꞌ een,
mej mij quee cheꞌ jeꞌej puaꞌaj tyityajaꞌhuóotɨmueꞌraj.
9 Aꞌyaa pu tyiꞌjɨꞌréꞌcan jɨmeꞌ, Dios pu huápuɨꞌɨj yevéjriꞌ séejreꞌ,
tɨꞌij huaꞌ japua huatányuunyij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,
aꞌɨ́jna ɨ tɨ jɨn naa huaséꞌrin pu tajamuán yeséeriaꞌaj jaꞌmej ɨ cháanacaj japua.
10 Aꞌɨ́jna ɨ tɨ jɨn taxɨeꞌveꞌ ajta ɨ tɨ jɨꞌréꞌcan jɨmeꞌ aꞌɨ́ɨ mu aꞌ jóosejran,
ajta ɨ tɨ naa tyúꞌasej ajta ɨ tɨ tyámuaꞌ tyáꞌxaꞌpuɨꞌɨntareꞌ aꞌɨ́ɨ mu iityóopuɨꞌtzeꞌsij,
11 ɨ tɨ jɨꞌréꞌcan jɨmeꞌ pu chóotaꞌ ajnyésij
ajta ɨ tɨ tyámuaꞌ tyíꞌxaꞌpuɨꞌɨntareꞌ aꞌɨ́ɨ pu tajapuá ɨmuáj taséeraj jaꞌmej.
12 Aꞌɨ́ɨ pu ɨ Tavástaraꞌ tyuꞌtáꞌsij mej mij huatyéviiyej,
ajta jeꞌen ɨ cháanacaj japua tyíꞌcɨɨren.
13 Aꞌɨ́ɨ pu anaquéej huamaꞌaj jaꞌmej ɨ tɨ tyámuaꞌ tyáꞌxaꞌpuɨꞌɨntareꞌ,
ajta jeꞌen tyámuaꞌ tyíꞌuuren ɨ juyáaraꞌ jitze.