1 Antes pask che nan Jesus ne che wyob ydxiin or ne ysan Ne gyëzlyuree chen gya Ne lo Xuz Ne. Kesentyent wyaan Ne yra xpén Ne nee gyëzlyuree, zenga wyaan Ne men axtegue ne le Ne sya.

2 Che wsegyee Bzelo lextoo Judas xpee Simon Iscariote ne ydekwent men Ne, 3 no che nan Ne ne yrandxee ne nuu gyëzlyu gyeybaatee wdee Xuz Ne lo Ne chen ynebééy No no ne lo Xuz Ne wruu Ne, lo ke Xuz Ne gya Ne. 4 Chene kayuxsëë Ne yra Ne men, wzuli Ne wboo xab Ne lërlegya, wgoob Ne te toay wliib No txu Ne. 5 Lex wgaa Ne nis te leen ntsaa, wzelo Ne waa Ne nii yra xpén Ne, lex wkwiidx No kon toay ne nliib txu Ne.

6 Chene wdxiin Ne lo Simon-Bëd ne ga Ne nii men, re men lo Ne:

―Dechey, ¿pe lel laa de ga nii noo?

7 Wke Ne re Ne:

―Orree rdeedet de kwent logne kalaa noo, per sdee de kwento tsoow.

8 Lex re Simon-Bëd:

―Nunk ydeedet noo si ga de nii noo.

Wke Ne re Ne:

―Belne gadet noo we, gakdetre gak de xpén noo.

9 Orguin re Simon-Bëd:

―Dechey, gugaa we bes, per let nozdet nii noo, sinke no nya noo no le xtoo noo.

10 Lex re Ne:

―Men ne che waz, nonchee nii men rkyiin ydaa, porke che yde men ndaa. Laa de che ndaa de, per let yradet de ndaa.

11 Kom che nan Ne gan txuzh nak ne ydekwent Ne, por neguin re Ne: “Let yradet de ndaa.”

12 Wluzhse waa Ne nii men yra men, wak ke Ne xab Ne ste; zhich guin wzob ke Ne lo mezh, lex re Ne lo men:

―¿Pe rdee de kwent neree ne wlaa noo? 13 Laa de yra de, Dechey rnii de noo no le Maxter; nli rnii de, porke nli nak noo we. 14 Noo ne nak noo Dechey no le Maxter, no waa noo nii de yra de, zenga ke rap de degne galsaa de nii xkompanyer de. 15 Wlaa noo neree chen kwii de chen no de ylaa zeree zegne wlaa noo. 16 Nligue yna noo lo de ne ni te mos nondet mazre ke lo xpatron men, no ni te mén ne ra mandad nondet mazre ke lo mén ne rxaal men. 17 Nzoon de belne rdee de kwent neree no belne rlaa do.

18 ’Let por yradet de rnii noo; nan noo gan txuzh wye noo ne gak xpén noo. Per rap degne gak kumplir ne zëëd lo xgyiich Dëdyuzh ledne re: “Mén ne ru yrup men noo, le men che rwinyaan noo.” 19 Ynague noo neree lo de yra de chen chene gako, ylaleedx de ne noo nak men ne nak noo. 20 Nligue yna noo lo de ne men ne tsukas mén ne yxaal noo ne tsa men, noo nga tsukas men; no men ne rukas noo, Xuz noo nga ne wxaal noo zëëd noo rukas men.

21 Wluzh re Jesus zenga, kesentyent wdenles lextoo Ne, wzëët Ne neree lo xpén Ne, re Ne:

―Nligue yna noo lo de yra de, ne laake de te de nak ne ydekwent noo lo mén chen yzakzi men noo.

22 Orguin wzelo men noze rwilolsaa men te te men, ni nandet men txu por laa rnii Ne. 23 Te men ne nak ke xpoxter Ne ne kesentyent ryaan Ne, zobnka koo Ne. 24 Lex wluu Simon-Bëd senye lo men chen ynabdiiz men lo Ne gan txu por laa rnii Ne. 25 Kom koo Ne zobnka men, wnabdiiz men lo Ne, re men:

―Dechey, ¿txuzh ne?

26 Wke Ne re Ne:

―Ygaz noo tebla gyëtxtil; men ne ydee noo we lo, men guin ne.

Lex wgaz Ne tebla gyëtxtil, wdee No lo Judas xpee Simon Iscariote. 27 Zegne wnëëz Judas gyëtxtil guin, wdegue Bzelo lextoo Judas. Lex re Ne lo Judas:

―Logne ylaa de, gulaa we gyiid gyiidske.

28 Per ni te men ne ndxin lo mezh wdeedet kwent gan penak re Ne lo Judas zenga. 29 Kom laa Judas nzen bols ne nuu med, por neguin nuu lextoo men gwrol men pazer ne ykyiin lo lni re Ne lo Judas yka Judas o ka pe ydee Judas lo menprob. 30 Zegne wnëëz Judas gyëtxtil guin, wruugue men. Chexke wnit lyu orguin.

31 Chene che wruu Judas, re Jesus:

―Le or che wdxiin ne gaknyoo xgyelenzoon Men ne wdxiid wak Mén no por laa men gaknyoo xgyelenzoon Dëdyuzh. 32 No belne por laa men gaknyoo xgyelenzoon Dëdyuzh, zenga ke konyoo Dëdyuzh xgyelenzoon men no che wyob ylaa No. 33 Zhiin, che xchedetre ykaa noo lad de. Skaye de noo yra de, per zegne re noo lo men-Israel, zenga ke yna noo lo de yra de orree: Gakdet tsa de ledne gya noo. 34 Ykyeen noo de ylaa de te ne kweb: Gugyanelsaa; zeree zegne ryaan noo de yra de, zeree ke gugyanelsaa. 35 Porke belne gyanelsaa de, yrandxee mén ydee kwent ne xpén noo nak de.

36 Lex re Simon-Bëd lo Jesus:

―Dechey, ¿pazh tsa de?

Wke Ne re Ne:

―Orree gakdetgue chidnal de noo ledne gya noo, per schidnal de noo tsoow.

37 Orguin re Simon-Bëd:

―Dechey, ¿penak gakdetgue chidnal noo de orree? Noo rboleedx noo xgyelembán noo nyaalzhe guet noo por laa de.

38 Wke Ne re Ne:

―¿Pe nli ne rboleedx de xgyelembán de por noo? Nligue yna noo lo de ne antes ne ykarëz ngyedgol, che wyon tir wkedxnruu de ne rnebeey de noo.