1 Chene waknan Jesus ne le men ne nak farisew che wyenen ne le Jesus katxobnis no ne ndaldee xpén Jesus ke lo xpén Xwa, 2 (mase let Jesusdet katxobnis mén, sinke xpén Jesus nak ne katxobnis mén.) 3 wruu Jesus lo lyu ne la Judea sya ke Ne lo lyu ne la Galilea.

4 Ne sya Ne lo lyu guin, wap Ne degne wdee Ne lo lyu ne la Samaria. 5 Wdxiin Ne te gyëz ne la Sicar ne nak lo lyu ne la Samaria, guex ledne ka lyu ne wgueed Jacob lo Xeb xpee Jacob. 6 Nga zob pos ne rnii mén xpos Jacob, kom che wzaguen Jesus, wzobchee Ne koo pos guin, zeg rwen ngbiz orguin. 7-8 Le yra xpén Ne za lenlgyëz guin zaka men ne gu men. Orguin wdxiin te wna-Samaria ne zaxii nis rupos guin, lex re Jesus lo men:

―Gugued tebruu xnis de goo noo.

9 Orguin re wnaa guin lo Jesus:

―¿Penak rnab de nis lo noo si men-Israel nak de, le noo nak men-Samaria?

(Re wnaa guin zenga, porke rtsëlsaadet men-Israel men-Samaria.) 10 Wke Jesus, re Ne:

―Belne gaknan de gan kox rseleedx Dëdyuzh no gaknan de gan txu nak noo, snab de nis ne goo de lo noo, noo yniiz nis ne rguu gyelembán goo de.

11 Lex re wnaa guin:

―Dechey, ni bet neeydet de ne koo de nis no kesentyent gyët pos. ¿Pazh koo de nis ne rguu gyelembán? 12 ¿Peguin nondee de ke lo Jacob men ne nak xpenkwlal be? Laa men wsan posree nee, nisree woo men yra zhiin men no le yra xmaa men.

13 Wke Jesus, re Ne:

―Yrandxee mén ne roo nisree, rberee ke rlaan men nis ste; 14 per le mén ne goo nis ne ydee noo, ybereedetre ylaan men nis. Porke nis ne ydee noo, ydaa we lextoo men zegne rdaa we rubzin, laa we ydee gyelembán ne nunk luzhdet lo men.

15 Lex re wnaa guin:

―Dechey, guniiz nis guin goo noo chen ylaandetre noo nis, ni chiidetre noo koo noo nis nee.

16 Lex re Jesus lo wnaa guin:

―Gutsaxii xemgyeey de, lex yberee de.

17 Wke wnaa guin, re men:

―Yëten noo xemgyeey noo.

Lex re Jesus:

―Nli rnii de ne yëten de xemgyeey de. 18 Porke che wzaa gaay mgyeey wap de, le men gwa ne rap de naaree, let xemgyeeydet de nak men; neguin nan noo ne nli rnii de.

19 Ne won wnaa guin zenga, re men:

―Dechey, ryenen noo ne te profet nak de. 20 Xpenkwlal noo yra noo nee gyeeyree wdxiid men wzaknon men Dëdyuzh, per le laa de yra de ne nak de men-Israel, re de ne Jerusalén nak ledne rap mén degne tsa men saknon men Ne.

21 Wke Jesus, re Ne:

―Wnaae, gulaleedx noo ne che wyob saknon mén Dëdyuzh sin ne chiidetre men nee gyeeyree, ni tsadetre men Jerusalén. 22 Laa de yra de ne nak de men-Samaria, nandet de gan txu rzaknon de, per le noo yra noo nan noo gan txu rzaknon noo; porke lad men-Israel yruu men ne yselaa mén lo dol. 23 Sdxiin or no laa orguin nee ne yrandxee mén ne nli rzaknon Dëdyuzh, ylaa meno ydebgyiky ydeblextootee men zegne ryal ylaa meno. Porke zenga rlaan Dëdyuzh ne ylaa yra mén ne rzaknon Ne. 24 Dëdyuzh Espíritu nak Ne, no yrandxee mén ne rzaknon Ne, rap men degne ylaa meno ydebgyiky ydeblextootee men zegne ryal ylaa meno.

25 Lex re wnaa guin:

―Nan noo ne schiid Mesías ne la ke Crist; chene chiid men, laa men yzëëto yra we lo be.

26 Orguin re Jesus:

―Noo nak men guin, laa men nee kayuno de diiz.

27 Laatee orguin wberee yra xpén Jesus, kesentyent wzee wzak men ne wii men kayuu Ne diiz yrup Ne te wnaa; per ni te men wnabdiizdet gan pe rlaan wnaa guin o gan pe diizzhe ruu Ne yrup Ne men. 28 Nga wsan xree wnaa guin sya men. Wdxiin men lenlgyëz, re men lo mén:

29 ―Gutaa gante, tsa be kwii de te mén ne wzëët yrandxee ne wlaa noo. ¿Pe let laadet Crist nga?

30 Lex wruu yra mén gyëz guin za men lo Jesus. 31 Myentras ne nuu yra mén guin nëz, wzelo yra xpén Jesus re men lo Jesus:

―Maxter, gugu.

32 Wke Ne re Ne:

―Noo che rap noo ne ru noo, rnebeeydet do.

33 Lex wzelo yra xpén Jesus rnabdizlsaa men, re men:

―¿Peguin nuu txu wdxidneey ne wu Jesus?

34 Orguin re Jesus:

―Ne ru noo nak ne ylaa noo ne rlaan Dëdyuzh no ne yseyal noo ne wxaal Ne noo ylaa noo. 35 Re de yra de: “Benak rak falt tap mëëw ne ydxiin kwlaap.” Per yna noo lo de: Gulis lo de gukwii den, le we che wal, wal ylaap de. 36 Men ne rkaa kwlaap rezh rka men; logne rtop men por gyelembán ne nunk luzhdet nako, chen tese yzhiilen men ne rguu bni yra men men ne rkaa kwlaap. 37 Nli ne re lo diiz: “Wren mén ne rguu bni, wren mén ne rlaap.” 38 Noo wxaal de walaap de ledne wlaadet de dxiin; wren mén ne wlaa dxiin no laa de walaap ledne wlaa men dxiin.

39 Ndalyaa mengyëz guin wlaleedx Jesus por ne re wnaa guin lo men: “Yrandxee ne wlaa noo wzëët Jesus lo noo.” 40 Por neguin chene wdxiin yra mén guin lo Jesus, wnab men lo Ne ne ykaa Ne lo men. Lex wkaa Ne lo men txup gbiz, 41 no ndalre mén wlaleedx Ne por ne won men diiz ne re Ne laa zhal Ne. 42 Lex re men lo wnaa guin:

―Orree si let nozdet por ne na de lo noo yra noo rlaleedx noo ménree, sinke por ne noo zhal won ne rzëët men, no nan noo ne nli laa men yselaa mengyëzlyu.

43 Chene wluzh txup gbiz, wruu Jesus lo lyu ne la Samaria za ke Ne lo lyu ne la Galilea. 44 No laake Ne re, ni te profet rzaknondet mén men laake laz men. 45 Le chene wdxiin Ne Galilea, kesentyent waknzebnëz mén guin lo Ne porke no men wa lni pask Jerusalén wii men yrandxee ne wlaa Ne.

46 Zhich guin wa Ne Caná ste ne nak lo lyu guin ne la Galilea, ledne wlaa Ne nis bin. Capernaum nuu te xsoldad rrey, rzhuun xpee men. 47 Chene won men ne le Jesus che wruu lo lyu ne la Judea wdxiin Ne lo lyu ne la Galilea, wa men lo Ne wanab men ne tsa Ne ruxyuu men yneseyaken Ne xpee men porke che mer mer guet mee. 48 Lex re Ne lo men:

―Laa de yra de belne bet gyelmilaguer kwiidet de, bet ylaleedxdet de.

49 Per re men:

―Dechey, yoo tsague be antes ke ne guet xpee noo.

50 Orguin re Jesus lo men:

―Guberee ruxyuu de, le xpee de che wyaken.

Wlaleedx men ne re Jesus, syague men ruxyuu men. 51 Chene sya men, wruu xmos men watsëlnëz men men, re men lo men:

―Le xpee de che wyaken.

52 Lex wnabdiiz men gan pa orzhe wzelo wruu xlaa led xpee men, re yra mén guin:

―Naag beyteb wruu xlaa led mee.

53 Orguin wnileedx men ne medid orke guin re Jesus: “Le xpee de che wyaken.” Lex wlaleedx men Jesus yra xfamilyendxee men.

54 Laa neree wrup gyelmilaguer ne wlaa Jesus chene wruu Ne lo lyu ne la Judea ne wdxiin Ne lo lyu ne la Galilea.