Ⅲ
Ⅰ අපරං සාර්ද්දිස්ථසමිතේ ර්දූතං ප්‍රතීදං ලිඛ, යෝ ජන ඊශ්වරස්‍ය සප්තාත්මනඃ සප්ත තාරාශ්ච ධාරයති ස ඒව භාෂතේ, තව ක්‍රියා මම ගෝචරාඃ, ත්වං ජීවදාඛ්‍යෝ (අ)සි තථාපි මෘතෝ (අ)සි තදපි ජානාමි|
Ⅱ ප්‍රබුද්ධෝ භව, අවශිෂ්ටං යද්‍යත් මෘතකල්පං තදපි සබලීකුරු යත ඊශ්වරස්‍ය සාක්‍ෂාත් තව කර්ම්මාණි න සිද්ධානීති ප්‍රමාණං මයා ප්‍රාප්තං|
Ⅲ අතඃ කීදෘශීං ශික්‍ෂාං ලබ්ධවාන් ශ්‍රුතවාශ්චාසි තත් ස්මරන් තාං පාලය ස්වමනඃ පරිවර්ත්තය ච| චේත් ප්‍රබුද්ධෝ න භවේස්තර්හ්‍යහං ස්තේන ඉව තව සමීපම් උපස්ථාස්‍යාමි කිඤ්ච කස්මින් දණ්ඩේ උපස්ථාස්‍යාමි තන්න ඥාස්‍යසි|
Ⅳ තථාපි යෛඃ ස්වවාසාංසි න කලඞ්කිතානි තාදෘශාඃ කතිපයලෝකාඃ සාර්ද්දිනගරේ (අ)පි තව විද්‍යන්තේ තේ ශුභ්‍රපරිච්ඡදෛ ර්මම සඞ්ගේ ගමනාගමනේ කරිෂ්‍යන්ති යතස්තේ යෝග්‍යාඃ|
Ⅴ යෝ ජනෝ ජයති ස ශුභ්‍රපරිච්ඡදං පරිධාපයිෂ්‍යන්තේ, අහඤ්ච ජීවනග්‍රන්ථාත් තස්‍ය නාම නාන්තර්ධාපයිෂ්‍යාමි කින්තු මත්පිතුඃ සාක්‍ෂාත් තස්‍ය දූතානාං සාක්‍ෂාච්ච තස්‍ය නාම ස්වීකරිෂ්‍යාමි|
Ⅵ යස්‍ය ශ්‍රෝත්‍රං විද්‍යතේ ස සමිතීඃ ප්‍රත්‍යුච්‍යමානාම් ආත්මනඃ කථාං ශෘණෝතු|
Ⅶ අපරඤ්ච ඵිලාදිල්ඵියාස්ථසමිතේ ර්දූතං ප්‍රතීදං ලිඛ, යඃ පවිත්‍රඃ සත්‍යමයශ්චාස්ති දායූදඃ කුඤ්ජිකාං ධාරයති ච යේන මෝචිතේ (අ)පරඃ කෝ(අ)පි න රුණද්ධි රුද්ධේ චාපරඃ කෝ(අ)පි න මෝචයති ස ඒව භාෂතේ|
Ⅷ තව ක්‍රියා මම ගෝචරාඃ පශ්‍ය තව සමීපේ (අ)හං මුක්තං ද්වාරං ස්ථාපිතවාන් තත් කේනාපි රෝද්ධුං න ශක්‍යතේ යතස්තවාල්පං බලමාස්තේ තථාපි ත්වං මම වාක්‍යං පාලිතවාන් මම නාම්නෝ (අ)ස්වීකාරං න කෘතවාංශ්ච|
Ⅸ පශ්‍ය යිහූදීයා න සන්තෝ යේ මෘෂාවාදිනඃ ස්වාන් යිහූදීයාන් වදන්ති තේෂාං ශයතානසමාජීයානාං කාංශ්චිද් අහම් ආනේෂ්‍යාමි පශ්‍ය තේ මදාඥාත ආගත්‍ය තව චරණයෝඃ ප්‍රණංස්‍යන්ති ත්වඤ්ච මම ප්‍රියෝ (අ)සීති ඥාස්‍යන්ති|
Ⅹ ත්වං මම සහිෂ්ණුතාසූචකං වාක්‍යං රක්‍ෂිතවානසි තත්කාරණාත් පෘථිවීනිවාසිනාං පරීක්‍ෂාර්ථං කෘත්ස්නං ජගද් යේනාගාමිපරීක්‍ෂාදිනේනාක්‍රමිෂ්‍යතේ තස්මාද් අහමපි ත්වාං රක්‍ෂිෂ්‍යාමි|
Ⅺ පශ්‍ය මයා ශීඝ්‍රම් ආගන්තව්‍යං තව යදස්ති තත් ධාරය කෝ (අ)පි තව කිරීටං නාපහරතු|
Ⅻ යෝ ජනෝ ජයති තමහං මදීයේශ්වරස්‍ය මන්දිරේ ස්තම්භං කෘත්වා ස්ථාපයිස්‍යාමි ස පුන ර්න නිර්ගමිෂ්‍යති| අපරඤ්ච තස්මින් මදීයේශ්වරස්‍ය නාම මදීයේශ්වරස්‍ය පුර‍්‍ය්‍යා අපි නාම අර්ථතෝ යා නවීනා යිරූශානම් පුරී ස්වර්ගාත් මදීයේශ්වරස්‍ය සමීපාද් අවරෝක්‍ෂ්‍යති තස්‍යා නාම මමාපි නූතනං නාම ලේඛිෂ්‍යාමි|
ⅩⅢ යස්‍ය ශ්‍රෝත්‍රං විද්‍යතේ ස සමිතීඃ ප්‍රත්‍යුච්‍යමානාම් ආත්මනඃ කථාං ශෘණෝතු|
ⅩⅣ අපරඤ්ච ලායදිකේයාස්ථසමිතේ ර්දූතං ප්‍රතීදං ලිඛ, ය ආමේන් අර්ථතෝ විශ්වාස්‍යඃ සත්‍යමයශ්ච සාක්‍ෂී, ඊශ්වරස්‍ය සෘෂ්ටේරාදිශ්චාස්ති ස ඒව භාෂතේ|
ⅩⅤ තව ක්‍රියා මම ගෝචරාඃ ත්වං ශීතෝ නාසි තප්තෝ (අ)පි නාසීති ජානාමි|
ⅩⅥ තව ශීතත්වං තප්තත්වං වා වරං භවේත්, ශීතෝ න භූත්වා තප්තෝ (අ)පි න භූත්වා ත්වමේවම්භූතඃ කදූෂ්ණෝ (අ)සි තත්කාරණාද් අහං ස්වමුඛාත් ත්වාම් උද්වමිෂ්‍යාමි|
ⅩⅦ අහං ධනී සමෘද්ධශ්චාස්මි මම කස්‍යාප්‍යභාවෝ න භවතීති ත්වං වදසි කින්තු ත්වමේව දුඃඛාර්ත්තෝ දුර්ගතෝ දරිද්‍රෝ (අ)න්ධෝ නග්නශ්චාසි තත් ත්වයා නාවගම්‍යතේ|
ⅩⅧ ත්වං යද් ධනී භවේස්තදර්ථං මත්තෝ වහ්නෞ තාපිතං සුවර්ණං ක්‍රීණීහි නග්නත්වාත් තව ලජ්ජා යන්න ප්‍රකාශේත තදර්ථං පරිධානාය මත්තඃ ශුභ්‍රවාසාංසි ක්‍රීණීහි යච්ච තව දෘෂ්ටිඃ ප්‍රසන්නා භවේත් තදර්ථං චක්‍ෂුර්ලේපනායාඤ්ජනං මත්තඃ ක්‍රීණීහීති මම මන්ත්‍රණා|
ⅩⅨ යේෂ්වහං ප්‍රීයේ තාන් සර්ව්වාන් භර්ත්සයාමි ශාස්මි ච, අතස්ත්වම් උද්‍යමං විධාය මනඃ පරිවර්ත්තය|
ⅩⅩ පශ්‍යාහං ද්වාරි තිෂ්ඨන් තද් ආහන්මි යදි කශ්චිත් මම රවං ශ්‍රුත්වා ද්වාරං මෝචයති තර්හ්‍යහං තස්‍ය සන්නිධිං ප්‍රවිශ්‍ය තේන සාර්ද්ධං භෝක්‍ෂ්‍යේ සෝ (අ)පි මයා සාර්ද්ධං භෝක්‍ෂ්‍යතේ|
ⅩⅪ අපරමහං යථා ජිතවාන් මම පිත්‍රා ච සහ තස්‍ය සිංහාසන උපවිෂ්ටශ්චාස්මි, තථා යෝ ජනෝ ජයති තමහං මයා සාර්ද්ධං මත්සිංහාසන උපවේශයිෂ්‍යාමි|
ⅩⅫ යස්‍ය ශ්‍රෝත්‍රං විද්‍යතේ ස සමිතීඃ ප්‍රත්‍යුච්‍යමානම් ආත්මනඃ කථාං ශෘණෝතු|