18
Zha initndoꞌ Babilonia
1 Tsoꞌo na uyoꞌo be ta ndee wa, leꞌa naꞌ uní stub angel uzheꞌeb juert utoꞌo gibeꞌa gast ndoꞌ gizhliyo nsu xeꞌa ten xa. 2 No ugeꞌpa uníꞌi xa ndab xa:
¡Yá ulayat, yá ulayat gezh siꞌil Babilonia!
Leꞌa sa wa myak dub sa ncho be mbi bxin,
no iteanak be bi bzhiꞌik,
nsea sa ncho be man duꞌub man bxin,
be man nxee ladna be men ndoꞌ na.
3 Leꞌa gezh wa cuent dub xagots ndun juis mgiꞌi.
Leꞌa be men ncho idub ndoꞌ gizhliyo
mbinno bexa gezh wa sian ta ugap,
ngok bexa cuent dub xa gu.
Leꞌa bexa nibeꞌe ndoꞌ gizhliyo
no mbinno bexa ta bzhiꞌik wa.
Leꞌa bexa nsiꞌi utiꞌix be taꞌa ndoꞌ gizhliyo
ngok rik no be ta ugap ndal ladna bexa gezh wa.
4 Cha weꞌe mbín naꞌ ti Dios utoꞌo gibeꞌa ugeꞌ ndab:
Bxoꞌon bego gezh Babilonia baꞌ, bego na nak xmen naꞌ,
ndontsa naꞌanpa no bega gun be ta ugap ndun bexa wa,
no ni lá iniꞌí bega be gealkweaꞌ itid bexa.
5 Leꞌa bexa wa uzhebpa sian ke ndap ndoꞌ naꞌ,
gast gibeꞌa nlayaꞌ be ta wa.
Ta weꞌe leꞌa naꞌ Dios utsaksika naꞌ bexa.
6 Binno bega bexa lak ugap mbinno bexa stubga men.
Utix bega top lak mbinno bexa be men.
Bgoch bega ta goo bexa wa top lak juert nak
ndoꞌ ta mgo bexa be men.
7 Lak uzheꞌeb mzhinnona bexa no be ta ugap mbin bexa,
no liga utsaksi bega bexa kweaꞌ itid bexa,
geal leꞌa bexa ndanbeꞌe len ladoꞌo na:
“Leꞌa besa ndee nde cuent dub xa nibeꞌe.
Naꞌanpa nak besa cuent dub xagots ngut xabgiꞌi ten na,
no nunk besa lá iniꞌí gealkweaꞌ.”
8 Ta weꞌe leꞌa nat dubtsa wizh ilanseaꞌ
sian gealkweaꞌ tsoꞌo bexa wa.
Leꞌa ta wa gealgut, no goꞌon bexa,
no yoo win, no yolꞌ bexa ndoꞌ giꞌ.
Leꞌa naꞌ ndee leꞌa Dios Xa Nibeꞌe uzhebpa xa juert,
naꞌ utsaksi bexa wa.
9 Leꞌa bexa nibeꞌe ndoꞌ gizhliyo mbin ta ugap ndun bexa gezh wa, no ngol ladna bexa be ta sian ndap bexa wa. Parea nat leꞌa bexa goꞌonno bexa gezh wa, no uzhebpa uban yoo ladna bexa, gor iniꞌí bexa zhen sa nsayolꞌ gezh wa. 10 Nsea sittsa kwe bexa tant nzheb bexa ndoꞌ be gealkweaꞌ nchaꞌtid gezh wa, ndab bexa:
¡Ay, ay! ¡Proꞌob gezh siꞌil Babilonia,
dub gezh juertpa ngok lu!
Ná uxaxtsa mnitndoꞌ Dios lu.
11 Leꞌa bexa nsiꞌi utiꞌix taꞌa ndoꞌ gizhliyo uzhebpa goꞌonno gezh wa, nsea uban yoo ladna bexa, geal yá naꞌanta ton isiꞌi be ta nadoꞌo bexa. 12 Leꞌa ta wa be ta oro, nsea ta plata, no be geꞌ chul, nsea be perla, nsea be lad chul ta lino nsea seda, no be lad konch ugats nsea be lad nane, nsea be ya uxeꞌe nlaꞌa, no be taꞌa nakndeꞌe marfil, no be taꞌa nakndeꞌe ya chul, no bronce, no giꞌib, no geꞌ mármol, 13 nsea canel, nsea isandoꞌ be ta uxeꞌe, nsea ta uxeꞌe ta nyolꞌ, nsea mirra, nsea olíbano, nsea vin, nsea aceit, nsea arin lan, nsea trig, no man yoꞌo, nsea borreg, nsea way, nsea carret, nsea bexa nchaꞌndoꞌo ndoꞌ stubga men. 14 Leꞌa bexa nsiꞌi utiꞌix be taꞌa wa cha gab:
Nat leꞌa bego yá naꞌantapa ndap
be ta nsaꞌab ladna bego wa.
Leꞌa bego mlaꞌ iteanak be ta chul no be ta uyap ndap bega,
cha yá naꞌantapa izheal bega‑yá.
15 Leꞌa bexa nsiꞌi utiꞌix be ta ndee wa, bexa na myak rik juers ten gezh wa, leꞌa bexa wa sit itate ta na nzheb bexa ndoꞌ be gealkweaꞌ nchaꞌtid gezh wa. Leꞌa bexa wa goꞌon, no uban yoo ladna bexa. 16 No gab bexa:
¡Ay, ay! ¡Proꞌob gezh siꞌil Babilonia,
Leꞌa bexa wa ngok lad lino ta chul,
ta color konch ugats no nane!
No uzhebpa usoꞌ be ta oro, no be geꞌ chul,
no perla las bexa.
17 Xlaꞌal unitndoꞌ be ta sian ten bexa.
No iteanak bexa ntseꞌa be barco, no itea bexa na nsea len barco, no bexa ndun tiꞌin len barco, nsea iteata bexa ndun tiꞌin ndoꞌ nitsdoꞌo, leꞌa bexa wa sit utate. 18 Leꞌa gor uniꞌí bexa zhen sa nsayolꞌ gezh wa, cha ugeꞌ ndab bexa:
—¡Naꞌan stub gezh nsak lak nsak gezh baꞌ!
19 No mtob bexa yo gek bexa tant uban myoꞌo ladna bexa. Cha utezhat bexa no mbiꞌin bexa, ugeꞌ ndab bexa:
¡Ay, ay! Proꞌob gezh siꞌil baꞌ,
sa na myak rik itea besa ndap barco ndoꞌ nitsdoꞌo,
leꞌa nat xlaꞌal unitndoꞌ‑yá.
20 Parea bten ladna bego ndencho gibeꞌa,
bego nak men umbiꞌi ten Dios,
no bego nak be apostol,
no bego ndadiꞌizh sakndoꞌ Dios.
Leꞌa Dios leꞌa mtsaksi bexa Babilonia ta na li mbinno bexa bega.
21 Weꞌe leꞌa stub angel juert cha usen dub geꞌ siꞌil ta nyajw taꞌa ndoꞌ na, cha mtsaꞌab xa‑yá ndoꞌ nitsdoꞌo, ndab xa:
Lbaꞌa yaꞌ Babilonia gezh siꞌil,
yá naꞌanta ton iniꞌí‑yá.
22 No lá igenta be musk len gezh wa,
bexa ndoꞌol arpa no bzhee no trompet.
No ni stub bexa ndun tiꞌin lá yoota,
ni ruid ten molin lá igenta.
23 No ni xeꞌa aceit lá isuta sa wa,
no ni lá igenta ruid ten dub gast sa nchilyaꞌa men.
Leꞌa bexa nsiꞌi utiꞌix be taꞌa,
leꞌa bexa wa leꞌa ngok bexa nsak ndoꞌ gizhliyo.
No uzheꞌeb mkedino bexa gezh wa
itea be nacion nsea be ta bruj ndun bexa.
24 Leꞌa bexa wa leꞌa ndap ke ngut bexa mbidiꞌizh sakndoꞌ Dios,
no bexa umbiꞌi nak ndoꞌ Dios.
Leꞌa bexa gezh wa no ndap ke
ngut be men idub ndoꞌ gizhliyo.