1 Cha uní naꞌ stub angel juert utoꞌo gibeꞌa, nsea xa lat dub xkaw, no dub mbeꞌalzhin nkea gek xa. Leꞌa ndoꞌ xa wa uzheꞌeb nlaꞌbealꞌ cuent ndoꞌ wizh. Leꞌa idub xoꞌo xa uzhebpa nsoꞌ bealꞌ nsayolꞌ. 2 Leꞌa yaꞌa xa nsob dub libr tuzh nsaꞌnyaꞌal ndoꞌ na. Leꞌa xoꞌo xa ná lad gaꞌal cha ulatsoꞌ ndoꞌ nitsdoꞌo, leꞌa ná raves ulatsoꞌ ndoꞌ yo. 3 Cha ugeꞌ utezhat xa cuent gor ngiꞌi dub mbiꞌizh, cha ugeꞌ uníꞌi usiꞌi dub gaꞌad biaj. 4 Leꞌa gor mtaníꞌi usiꞌi wa, leꞌa naꞌ ndiꞌizh ukeꞌa ta ndab usiꞌi wa, parea leꞌa naꞌ mbín dub diꞌizh utoꞌo gibeꞌa, ndab‑a ndoꞌ naꞌ:

—Naꞌanpa ukeꞌa lu be ta ndab isagaꞌad usiꞌi wa, ndi nabtsa lu uniꞌí xtaꞌan‑a.

5 Leꞌa angel na li uní naꞌ ulatsoꞌ ndoꞌ nitsdoꞌo no ndoꞌ yo wa, cha uxits xa dub yaꞌa xa gaꞌap. 6 Cha ndab xa:

—Lak ta ugeakapa ncho Dios nban idub tiemp, xa mtexan gibeꞌa no gizhliyo no nitsdoꞌo no iteata be ta ncho, no liga ta ugeakapa nak leꞌa tiemp gun Dios ta mbinbeꞌe xa wa yá ngol. 7 Leꞌa gor na ukweꞌezh angel isagaꞌad wa trompet wa, leꞌa Dios gun itea be ta ugaꞌach mbinbeꞌe xa gun xa, lak mbidiꞌizh bexa polta sakndoꞌ Dios, bexa mbin tiꞌin ndoꞌ xa.

8 Leꞌa ti men na li mbín naꞌ utoꞌo gibeꞌa wa uníꞌigal ndoꞌ naꞌ, ndab xa:

—Waꞌ, cha usen libr nsaꞌnyaꞌal ndoꞌ na baꞌ, ta lbaꞌa nsén angel baꞌ wa, xa nsoꞌ ndoꞌ nitsdoꞌo nsea ndoꞌ yo.

9 Cha ngwaa naꞌ ndoꞌ angel, cha ndáp naꞌ usaꞌa xa libr wa ndoꞌ naꞌ. Leꞌa xa cha ndab ndoꞌ naꞌ:

—Usen‑a, cha udaw‑a. Leꞌa gor na ncho‑yá toꞌo lu leꞌa‑yá utiꞌi cuent mzhin, ná leꞌa gor na kab lu‑yá leꞌa‑yá yak ulaꞌ len lu.

10 Cha weꞌe usen naꞌ libr tuzh nsob yaꞌa angel wa, cha udaw naꞌ‑yá. Leꞌa‑yá utiꞌika gor na ncho‑yá toꞌo naꞌ lak utiꞌi mzhin, ná leꞌa gor na udab naꞌ‑yá, leꞌa‑yá cha myak ulaꞌ len naꞌ. 11 Leꞌa angel wa cha ndab ndoꞌ naꞌ:

—Leꞌa lu nsabndoꞌ gudiꞌizh sakndoꞌ Dios stub biaj xteꞌe gunno Dios be gezh, nsea be nacion, nsea bexa ndadiꞌizh isandoꞌ diꞌizh, nsea bexa nibeꞌe ndoꞌ gizhliyo.