Be diꞌizh ten Jesús mkeꞌa Marc
Leꞌa libr Marc nseꞌat sian be ta wen mbin Jesús ndoꞌ be men. Leꞌa xa myunyakna kwaꞌad bexa ngwaꞌad no mud no xa lá naꞌbe. No mxiste xa dub meꞌed gots tuzh ndoꞌ gealgut. No msaꞌa xa ta gaw uzheꞌeb kwaꞌad men pa dub gaꞌay mil xa. No utsin ngok xa ndoꞌ be meꞌed byux. Leꞌa Marc mgondoꞌ leꞌa Jesús naꞌanpa dub xa wentsa, ndi leꞌa xa nak Xin Dios. Leꞌa Marc mkeꞌa ta ndee ndoꞌ be xmen Cristo, bexa naꞌanpa xa judio, bexa nit ndencho gezh Roma.
1
Juan mbidiꞌizh ndoꞌ be men
(Mt. 3:1-12; Lc. 3:1-9,15-17; Jn. 1:19-28)
1 Lndeꞌe usaxan diꞌizh wen ten Jesucristo, Xin Dios, 2 lak mkeꞌa profet Isaías sakndoꞌ Dios ndab xa:
Unaꞌ, leꞌa naꞌ utuꞌub dub xa yaꞌ ned ndoꞌ lu gudiꞌizh diꞌizh ten naꞌ,
ndontsa listla kwe be men gal zha ilen lu.
3 Leꞌa xa wa ikeseyadiꞌizh geꞌe sa bid, ugeꞌ gab xa:
“Bin parej bega nes ilen Xa Nibeꞌe.
Bkeasoꞌ bega nes ten xa.”
4 Leꞌa xa wa Juan, xa uyoꞌo geꞌe sa bid. Ulaleaꞌ xa be men len nits, no ndab xa ulaꞌa bexa be ta ugap nak bexa, no italeaꞌ bexa, ndontsa utsuꞌu Dios be ke ten bexa.
5 Leꞌa kwaꞌad bexa Jerusalén no bexa idub distrit Judea utoꞌo nchaꞌyoꞌón diꞌizh ten Juan. Leꞌa gor na mgondoꞌ bexa be ke ten bexa, leꞌa Juan cha ulaleaꞌ bexa len nits yowbeꞌe Jordán.
6 Leꞌa xab Juan nakndeꞌe gich las came, nsea dub sinch gid nde len xa. Leꞌa xa ndaw mbit, nsea mzhin ser ndo xa. 7 Ndadiꞌizh Juan, ndab xa ndoꞌ be men:
—Leꞌa tsoꞌo naꞌ ndee ilen stub xa mas nsak ndoꞌ naꞌ. Leꞌa naꞌ ni lá isayaꞌ kote ndab xa wa. 8 Leꞌa naꞌ nits‑tsa ngoleaꞌ bega, ná leꞌa xa ilen tsoꞌo naꞌ ndee koleaꞌ be men no Espíritu ten Dios.
Juan ulaleaꞌ Jesús
(Mt. 3:13-17; Lc. 3:21-22)
9 Ngol dub wizh leꞌa Jesús utoꞌo gezh Nazaret ten distrit Galilea. Nchaꞌa Jesús sa nsoꞌ Juan, cha ulaleaꞌ Juan Jesús len nits yowbeꞌe Jordán. 10 Leꞌa gor na utoꞌo Jesús len nits wa, leꞌa Jesús uniꞌí myaꞌal gibeꞌa. Leꞌa Espíritu ten Dios cuent dub palom nchaꞌlaꞌ sa nsoꞌ Jesús. 11 No ulen ti Dios gibeꞌa ndab ndoꞌ Jesús:
—Lu nak Xiꞌín naꞌ. Leꞌa naꞌ nkweaꞌ ladna lu, no ntenno lad naꞌ lu.
Lá ngun maxuꞌu gan utsabgix Jesús
(Mt. 4:1-11; Lc. 4:1-13)
12 Leꞌa Espíritu ten Dios cha mbiꞌi Jesús geꞌe bid sa naꞌan men. 13 Leꞌa sa wa uyoꞌo Jesús dub top gaꞌal wizh lat be man geꞌe wa. Weꞌe ulen maxuꞌu uzheꞌeb mbin preb Jesús nlad maxuꞌu utsabgix Jesús. Tsoꞌo wa cha ulen be angel ten Dios mlaꞌach bexa Jesús.
Jesús usaxan ndun tiꞌin ndab Dios gun xa
(Mt. 4:12-17; Lc. 4:14-15)
14 Tsoꞌo na mkeꞌa be men Juan litgiꞌib, leꞌa Jesús cha nseaꞌ leꞌaka Galilea, ukesea uluu xa be men diꞌizh wen ten Dios ná xteꞌe nibeꞌe Dios be men. 15 Ndab xa:
—Leꞌa tiemp yá ngol. Leꞌa zha inibeꞌe Dios ladoꞌo be men yá gax nak. Blaꞌa bego be ta ugap nak bega, no bingea ladna bega diꞌizh wen ten Dios.
Jesús mti dap xa nsen mbeal gak xmen xa
(Mt. 4:18-22; Lc. 5:1-11)
16 Leꞌa dub gor nchasea Jesús toꞌo lagun siꞌil nsaleaꞌ Galilea, cha uniꞌí xa Simón nsea Ndres wit Simón, ndeutsaꞌab red ten na len nits, leꞌa bexa wa xa nsen mbeal. 17 Cha ndab Jesús:
—Usankea bega tsoꞌo naꞌ, leꞌa naꞌ uluu xteꞌe yunjunt bega be men ndoꞌ Dios.
18 Bi leꞌa gor wa cha mlaꞌa bexa be red ten bexa, cha nchaꞌano bexa Jesús.
19 Weꞌe cha usea bexa stub tuzh sa. Cha uniꞌí Jesús dub xa nsaleaꞌ Jacob nsea stub xa nsaleaꞌ Juan wit Jacob. Leꞌa bexa wa ndiꞌib ndoꞌ dub barco ndego ramient be red ten na. 20 Cha utezh Jesús itop wit bexa. Leꞌa bexa wa cha mchansoꞌ xus na Zebedeo ndoꞌ barco wa no be mos ten bexa. Leꞌa Jacob no Juan cha nchaꞌano Jesús.
Dub xabgiꞌi nsak gizh tont, ncho mbi bxin len ladoꞌo na
(Lc. 4:31-37)
21 Cha uyote bexa len gezh Capernaum. Leꞌa ngol wizh neꞌe be men, leꞌa Jesús cha nchaꞌuluu be men len niꞌi sa nzhealbe bexa judio gezh wa. 22 Leꞌa be men wa ndanseana xteꞌe ndadiꞌizh xa, leꞌa ta ndadiꞌizh xa wa nluu leꞌa xa uzheꞌeb ndap juers, naꞌanpa lak nluu be mech ten ley. 23 Leꞌa len niꞌi wa nsob dub xabgiꞌi nsak gizh tont ncho mbi bxin len ladoꞌo na. Leꞌa ta wa ugeꞌ ndab ndoꞌ Jesús:
24 —¿Xtaꞌan nsea ugal lu besa, Jesús xa Nazaret? ¿Nati nsea unitndoꞌ lu besa zha? Naꞌ uní ton nak lu, leꞌa lu xa umbiꞌi mtuꞌub Dios.
25 Leꞌa Jesús uteyo mbi bxin wa, ndab xa:
—¡Kexga lu! ¡Utoꞌo len ladoꞌo xa baꞌ!
26 Weꞌe leꞌa mbi bxin wa udabi xabgiꞌi wa, cha utezhat xa, cha utoꞌo mbi bxin wa len ladoꞌo xa. 27 Weꞌe leꞌa itea be men wa ngwanseana, nabdiꞌizh bexa ndoꞌ be ltsaꞌa xa, ndab bexa:
—¿Xteꞌe nak ta ndee zha? Leꞌa xa nluu dub taꞌa ni gol goꞌón beuna, no uzheꞌeb ndap xa juers, gast be mbi bxin nxobgek ndoꞌ ta ndab xa.
28 Leꞌa ta li mbin Jesús wa cha uxax mgen idub Galilea.
Jesús myunyakna xnazhaꞌap Simón
(Mt. 8:14-15; Lc. 4:38-39)
29 Leꞌa gor na utoꞌo bexa len niꞌi wa, leꞌa Jesús nchaꞌano Jacob nsea Juan ta lid Simón nsea Ndres. 30 Leꞌa xnazhaꞌap Simón nax ncho xlea. Leꞌa gor na ndab bexa‑yá ndoꞌ Jesús, 31 leꞌa Jesús cha ubii sa nax xa wa, usen xa yaꞌa xa, cha uxiste Jesús xa. Cha bi leꞌa gor wa mtoꞌo xlea xa, cha msaꞌa xa ta gaw bexa wa.
Jesús myunyakna kwaꞌad xa gizh
(Mt. 8:16-17; Lc. 4:40-41)
32 Leꞌa gor na ngwaꞌasla wizh cha nsea teꞌal, leꞌa be men ulenno kwaꞌadpa bexa gizh nsea bexa nsak gizh tont ncho mbi bxin len ladoꞌo na. 33 Leꞌa idub gezh men myakjunt toꞌo niꞌi wa. 34 Leꞌa Jesús myunyakna kwaꞌadpa be men nsén isandoꞌ gealgizh, nsea ulantuꞌub Jesús be mbi bxin ncho len ladoꞌo be men wa. Lá ulaꞌa xa ngudiꞌizh be mbi bxin, geal leꞌa be ta wa uniꞌí ton nak Jesús.
Jesús mluu be men Galilea
(Lc. 4:42-44)
35 Ngol gor bi teꞌalta leꞌa Jesús ngwaste, cha nchaꞌa xa dub sa naꞌan men, sa na ngwaꞌyadiꞌizhno xa Dios. 36 Leꞌa Simón no stapla bexa utoꞌo nchaꞌkwaꞌan Jesús. 37 Ná gor na mzheal bexa Jesús, cha ndab bexa ndoꞌ xa:
—Leꞌa be men weꞌe itea nkwaꞌan ga.
38 Leꞌa Jesús cha ndab:
—Nchaꞌbe beuna be gezh gax ndee. Uluꞌu naꞌ be men, leꞌa naꞌ tiꞌin weꞌe ndal ndoꞌ gizhliyo.
39 Weꞌe leꞌa Jesús cha nchasea be gezh idub distrit Galilea, nluu xa be men len be niꞌi sa nzhealbe bexa judio, nsea ulantuꞌub Jesús be mbi bxin ncho len ladoꞌo be men.
Jesús myunyakna dub xa nsén gealgizh lepra
(Mt. 8:1-4; Lc. 5:12-16)
40 Leꞌa dub wizh ulen dub xabgiꞌi wats Jesús, dub xa nsaꞌgea las na, leꞌa ta wa dub gealgizh nsaleaꞌ lepra. Cha msaxib xa ndoꞌ Jesús, ndab xa:
—Tal go nlad yunyakna go naꞌ, leꞌa naꞌ uní leꞌa ga sunka gan.
41 Leꞌa Jesús cha mlats ladna xa wa, cha mxoꞌob Jesús yaꞌa na tsoꞌo xa wa. Cha ndab Jesús:
—Nladka naꞌ yakna lu. Nat myakna lu.
42 Bi leꞌa gor wa leꞌa gealgizh wa cha unitndoꞌ, cha myakna las xa. 43 Weꞌe leꞌa Jesús cha unibeꞌe ndoꞌ xa, ndab Jesús:
—Nat syoꞌo gan yaꞌ lu. 44 Naꞌan ton ndoꞌ ná gudiꞌizh lu xteꞌe myakna lu. Dubgaꞌal ndoꞌ uleꞌay waꞌ uluu las lu, leꞌa lu myaklana. Nsea biꞌi be man xnab lak nibeꞌe ley mkeꞌa Moisés usaꞌa be men zha nyakna bexa, ndontsa iniꞌí be men leꞌa lu myaklana.
45 Ná leꞌa nes nseaꞌ xabgiꞌi wa, usaxan ndadiꞌizh xa ndoꞌ be men xteꞌe myunyakna Jesús xa. Ta weꞌe leꞌa Jesús lá yoota gan gaꞌal yate ni dub len gezh wa. Sbeꞌen dub lad sa naꞌan men ukesea xa, ná leꞌa be men itea lad utoꞌo nchaꞌbeka wats Jesús.