1 Leꞌa gor mtayadiꞌizh Jesús itea be ta wa, cha ndab xa ndoꞌ be xmen xa:

2 —Leꞌa bego uniꞌíka leꞌa stop wizh ndun jwalt yoo ujest Pascua, zha na leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men, cha ukeꞌa bexa naꞌ ndoꞌ cruz.

3 Weꞌe leꞌa be uleꞌay nibeꞌe no be mech ten ley no bexa gox nsak ten bexa judio mzhealbe tale ten niꞌi ten Caifás, xa nak uleꞌay ndon leꞌa nsak. 4 Cha dubtsa mbidiꞌizh bexa isen bexa Jesús dub mod na lá iniꞌí be men‑a, cha gut bexa Jesús. 5 Parea ndab bexa:

—Naꞌanpa isen beuna xa len ujest, ndontsa lá ixaꞌach be men gakloo ndoꞌ beuna.

6 Leꞌa dub wizh nsob Jesús ta lid Simón xa Betania, xa na polta usak gealgizh lepra. 7 Weꞌe ulen dub xagots sa nsob Jesús ndoꞌ mes, nsea dub bot tuzh nakchaꞌaw geꞌ alabastro ncho ta uxeꞌe len‑a, dub ta uyappa nsak. Cha ulo xa ta uxeꞌe wa gek Jesús. 8 Leꞌa gor uniꞌí be xmen Jesús ta wa cha ngokloo bexa, ndab bexa ndoꞌ ltsaꞌa xa:

—¿Xtaꞌan ngi mbizhaꞌa xagots ndee ta baꞌ zha? 9 Tal leꞌa xa ndi udoꞌo‑yá, leꞌa xa yoꞌo gan utseꞌa med wa ndoꞌ bexa uban nak, leꞌa‑yá uzhebpa dub ta nsak.

10 Leꞌa gor na mbiꞌín Jesús ta wa, cha ndab xa ndoꞌ bexa:

—¿Xtaꞌan ngi li nisi bega xagots ndee zha? Leꞌa xa dub ta wen mbinno naꞌ. 11 Leꞌa bexa uban nak wa guniꞌi polga nchoka lat bega, parea leꞌa naꞌ ndee naꞌanpa kwenta nchoꞌono bega. 12 Leꞌa ta na li mbin xagots ndee ulo xa ta uxeꞌe gek naꞌ, leꞌa ta wa li mbin xa ndontsa listla nak naꞌ zha igaꞌach naꞌ. 13 Leꞌa naꞌ gáp ndoꞌ bega guniꞌi pa ndoꞌ gizhliyo gudiꞌizh be men diꞌizh wen ten Dios, no ta li mbin xagots ndee gudiꞌizh bexa, ndontsa iniꞌí be men ta wen mbin xa.

14 Leꞌa Judas Iscariot, dub xa nak isatibtop xmen Jesús, cha ngwaꞌ ndoꞌ be uleꞌay nibeꞌe, 15 cha unabdiꞌizh xa ndab xa:

—¿Plo med usaꞌa bego ika naꞌ yun naꞌ cuent Jesús ndoꞌ bega?

Cha msaꞌa bexa galntiꞌi med plata ndoꞌ xa. 16 Zha weꞌe leꞌa Judas cha usaxan nkwaꞌan ná xteꞌe yun xa cuent Jesús ndoꞌ yaꞌa bexa.

17 Leꞌa ngol wizh ned ten ujest zha ndaw bexa judio pan naꞌan levadur, leꞌa be xmen Jesús ulen wats Jesús, cha ndab bexa:

—¿Pa nlad go yaꞌyundeꞌe besa ta gaw beuna ujest Pascua?

18 Leꞌa Jesús cha ndab:

—Waꞌ bega gezh Jerusalén baꞌ ta lid xa na lika ndáp naꞌ ndoꞌ bega wa, cha gud bega ndoꞌ xa leꞌa Mech ten bega ndab: “Leꞌa tiemp wa yá ngol. Leꞌa ta lid ga gaw naꞌ ta ten ujest Pascua no be xmen naꞌ.”

19 Weꞌe leꞌa be xmen Jesús cha mbin lak ndab Jesús, cha mbinchaꞌaw bexa ta gaw xcheꞌe bexa ujest Pascua.

20 Leꞌa ngol gor uyoꞌo teꞌal leꞌa Jesús nsea isatibtop be xmen xa mzhealbe sa wa, cha usaxan bexa gaw bexa. 21 Ndalen li ndeyaw bexa wa, leꞌa Jesús cha ndab:

—Leꞌa naꞌ gáp ndoꞌ bega leꞌa dub bega na no nsob sa ndee yun cuent naꞌ ndoꞌ be men.

22 Leꞌa bexa cha uzheꞌeb uban myoꞌo ladna, usaxan nabdiꞌizh dub gaꞌga bexa ndoꞌ Jesús:

—¿Lid naꞌ ta wa zha, Señor?

23 Leꞌa Jesús cha ukaꞌab ndab:

—Leꞌa dub bego na nsobyawno naꞌ plat ndee yun cuent naꞌ. 24 Ta ugeaka leꞌa naꞌ, Xa Myak Men Ndoꞌ Gizhliyo, itiꞌidka lak nkeaniꞌi diꞌizh ten Dios. Parea proꞌob xabgiꞌi na yun cuent naꞌ ndoꞌ bexa wa. Mas wen lá yoꞌo xabgiꞌi wa ndoꞌ gizhliyo.

25 Leꞌa Judas, xa na yun cuent Jesús, cha unabdiꞌizh ndab:

—¿Lid naꞌ ta wa zha, Mech?

Leꞌa Jesús cha ndab:

—Luka ta wa lak ndab lu.

26 Leꞌa gor na li ndeyaw bexa, leꞌa Jesús cha usen dub pan, cha msaꞌa xa xno ndoꞌ Dios. Cha uleꞌa xa‑yá, no mtseꞌa xa‑yá ndoꞌ be xmen xa, ndab xa:

—Usen bega pan ndee, cha udaw bega‑yá, leꞌa ta ndee beꞌal las naꞌ.

27 Cha liga usen Jesús dub vas ncho vin, cha msaꞌa xa xno ndoꞌ Dios. Cha msaꞌa xa‑yá ndoꞌ bexa, ndab xa:

—Iteanak bega gu ta ncho len vas ndee, 28 leꞌa ta ndee ten ten naꞌ usa naꞌ ndontsa utsuꞌu Dios ke ten be men. Leꞌa ta ndee nluu leꞌa nat leꞌa Dios mbinno be men dub trat kub ná xteꞌe wen yaꞌan bexa ndoꞌ Dios. 29 No gáp naꞌ ndoꞌ bega leꞌa naꞌ yá naꞌantapa goꞌo vin ten uv, gast gal wizh goꞌono naꞌ bega‑yá stub biaj sa nibeꞌe Dios Xus naꞌ.

30 Cha mbiltoꞌo bexa dub cant ndoꞌ Dios. Cha utoꞌo bexa nchaꞌbe bexa Bet Olivo.

31 Weꞌe leꞌa Jesús cha ndab ndoꞌ bexa:

—Leꞌa teꞌal ndee leꞌa iteanak bega ulaꞌa naꞌ, lak nkeaniꞌi diꞌizh ten Dios, ndab‑a: “Leꞌa naꞌ gut xa nlaꞌach be borreg, cha iteꞌachso bema.” 32 Ná leꞌa tsoꞌo na iban naꞌ leꞌa naꞌ ned ilayaa ndoꞌ bega Galilea.

33 Leꞌa Pedr cha ndab:

—Maska itea be men ulaꞌa ga, ná leꞌa naꞌ nunk lá ula ga.

34 Leꞌa Jesús cha ndab ndoꞌ Pedr:

—Leꞌa naꞌ gáp ndoꞌ lu leꞌa teꞌal ndee gor biseata kwezh boy, leꞌa lu ta ugeaka mkwiꞌinla chon biaj, ndab lu leꞌa lu lá nchandoꞌ naꞌ.

35 Ná leꞌa Pedr cha ndab:

—Maska gat naꞌ gor na gat go, leꞌa naꞌ nunk lá gáp leꞌa naꞌ lá nchandoꞌ ga.

Leꞌa iteata be xmen Jesús ndab lak ndab Pedr.

36 Weꞌe leꞌa Jesús cha ulayaꞌ sa nsaleaꞌ Getsemaní nsea be xmen xa. Cha ndab Jesús ndoꞌ bexa:

—Ndeꞌetsa ute bega, ndalen ndaꞌyadiꞌizhno naꞌ Dios sa baꞌ.

37 Cha mbiꞌi Jesús chon bexa stub tuzh sa, leꞌa ta wa Pedr no itop xin Zebedeo. Leꞌa Jesús cha uzhebpa uban myoꞌo ladna no kweaꞌ myoꞌo ladna xa. 38 Cha ndab Jesús ndoꞌ yon bexa wa:

—Uzhebpa uban ncho lad naꞌ gast ngi sat naꞌ. Ndeꞌetsa ute bega, cha utenaꞌno bega naꞌ.

39 Cha usea Jesús stub tuzh sa, cha usaxib xa gast ndoꞌ yo ngol xtuzh xa, cha uníꞌi xa ndoꞌ Dios, ndab xa:

—Tad, tal syoꞌo gan, lá ulaꞌa ga itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.

40 Weꞌe leꞌa gor na nseaꞌ Jesús sa na nde yon xmen xa, leꞌa bexa ndeyats. Cha ndab xa ndoꞌ Pedr:

—¿Ni dub gor lá uxik bega kwenaꞌno bega naꞌ zha? 41 Utenaꞌ bega no bidiꞌizhno bega Dios, ndontsa naꞌanpa utsabgix maxuꞌu bega. Leꞌa ladoꞌo bega nlad gun ta wen, ná leꞌa idub bega lá uxik.

42 Cha nchaꞌagal Jesús nchaꞌyadiꞌizhno xa Dios, ndab xa:

—Tad, tal naꞌ juerska itiꞌid ndoꞌ be gealkweaꞌ ndee, gak‑a lak nlad go.

43 Leꞌa gor nseaꞌgal Jesús sa nde bexa wa, leꞌa bexa ndeyatsgal, geal leꞌa bexa uzhebpa nyoꞌo xkaꞌalna. 44 Cha mlaꞌagal xa bexa, nchaꞌyadiꞌizhnogal xa Dios biaj yon, cha ndabgal xa lakka ndabla xa ndoꞌ Dios. 45 Cha nseaꞌgal xa sa nde bexa, cha ndab xa:

—¿Galka bi ndeyats bega zha, no bi ndeuneꞌe bega zha? Nat bwiꞌi bega yá ngol gor leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa bexa ugap. 46 Goste bega, nchaꞌbe beuna. Bwiꞌi bega leꞌa xa yun cuent naꞌ yá nseala baꞌa.

47 Bi li nsoꞌyadiꞌizh Jesús leꞌa Judas, xa no nak dub tibtop xmen Jesús, ulennola be men kwaꞌad noꞌo be spad nsea garrot. Leꞌa ta wa bexa mtuꞌub uleꞌay nibeꞌe no bexa gox nsak isen bexa Jesús. 48 Leꞌa Judas, xa li yun cuent Jesús, nedla ndab ndoꞌ be men wa: “Leꞌa xa na gaw naꞌ chit beꞌal ndoꞌ na wa, xa weꞌe isen bega.”

49 Leꞌa gor ulayaꞌ Judas sa wa, cha uxax ubii xa wats Jesús, cha ndab xa:

—Tiux ga, Mech.

Cha mchealtoꞌo xa ndoꞌ Jesús. 50 Leꞌa Jesús cha ndab:

—Amig, ¿xtiꞌin nsea lu?

Weꞌe leꞌa bexa kwaꞌad wa cha ubii gax, cha usen bexa Jesús.

51 Ná leꞌa dub xa nsoꞌ wats Jesús uloꞌo spad tuzh ten na, cha ulobtoꞌog xa nchaꞌ dub xmen uleꞌay ndon leꞌa nsak. 52 Leꞌa Jesús cha ndab ndoꞌ xa ten spad wa:

—Ulochaꞌaw spad ten lu len lid‑a. Leꞌa itea bexa ndantiꞌin spad, leꞌa xa wa ndoꞌ spadka gat. 53 ¿Lá iniꞌí lu leꞌa naꞌ syoꞌo gan inaꞌab ndoꞌ Xus naꞌ bi leꞌa nat, cha utuꞌub xa masla dub tibtop xkwaꞌa siꞌil be angel gakno naꞌ? 54 Parea tal naꞌ li gun, weꞌe naꞌanpa gak‑a lak nkeaniꞌi diꞌizh ten Dios be ta nsabndoꞌ itiꞌid naꞌ.

55 Cha ndab Jesús ndoꞌ be men wa:

—¿Xtaꞌan nseano bega spad nsea garrot isen bega naꞌ cuent dub waꞌan? Itea wizh nluu naꞌ be men wats niꞌi ten Dios lat bega, ná lá isen bega naꞌ sa wa. 56 Parea leꞌa iteanak be ta ndee nsatid ndontsa gak‑a lak nkeaniꞌi diꞌizh ten Dios, ta ndab bexa mbidiꞌizh sakndoꞌ Dios.

Weꞌe leꞌa itea be xmen Jesús cha mxoꞌon, mlaꞌa bexa Jesús.

57 Leꞌa bexa na li usen Jesús wa cha mbiꞌi xa ta lid Caifás uleꞌay ndon leꞌa nsak, sa mzhealbela be mech ten ley no bexa gox nsak. 58 Leꞌa Pedr sittsa nchankea tsoꞌo Jesús, gast uyoꞌo Pedr len tale ten niꞌi wa. Cha usob Pedr gax wats bexa nlaꞌach sa wa, natsa iniꞌí xa ná xtaꞌan yasea Jesús.

59 Leꞌa be uleꞌay nibeꞌe no bexa gox nsak no iteata bexa nsak wa nkwaꞌan be men ukwiꞌin gab leꞌa Jesús ndapka ke, ta nsabndoꞌ gat xa. 60 Leꞌa kwaꞌad be men mkwiꞌin nsake Jesús, ná lá izheal bexa nibeꞌe wa ni dub ke nsabndoꞌ gat Jesús. Weꞌe ulen stop bexa, 61 cha mkwiꞌin bexa ndab:

—Leꞌa xa baꞌ ndab leꞌa xa sun gan ulate niꞌi ten Dios, cha gal wizh yon leꞌa xa gundeꞌegal‑a.

62 Weꞌe leꞌa uleꞌay ndon leꞌa nsak wa ngwasoꞌ, ndab ndoꞌ Jesús:

—¿Ni lá utsakndoꞌ lu zha? ¿Ta ugeaka ta ndab bexa ndee leꞌa lu li ndab zha?

63 Ná leꞌa Jesús naꞌan xteꞌe ngab. Weꞌe leꞌa uleꞌay wa cha ndabgal ndoꞌ Jesús:

—Leꞌa Dios nban nsobwiꞌi, leꞌa naꞌ nibeꞌe ndoꞌ lu gud ndoꞌ besa naga lu nak Cristo Xin Dios zha.

64 Leꞌa Jesús cha ndab:

—Goka ndab‑a. No gáp naꞌ leꞌa nat idub nchaꞌa ndoꞌ ndee leꞌa bega iniꞌíka leꞌa naꞌ, Xa Myak Men Ndoꞌ Gizhliyo, isob wats Dios lad gaꞌal xa ndon leꞌa nibeꞌe, no ilengal naꞌ ndoꞌ xkaw.

65 Leꞌa uleꞌay ndon leꞌa nsak wa cha utsaw xab na tant ndakloo xa, cha ugeꞌ ndab xa ndoꞌ bexa nde sa wa:

—¡Leꞌa xa ndee unisi Dios! ¿Xtaꞌanta nkiꞌin beuna kwaꞌadta xa usake xa? Leꞌa bega mbiꞌín xteꞌe ugap uníꞌi xa. 66 ¿Nat zha xteꞌe gab bega, xteꞌe gunno beuna xa?

Leꞌa bexa wa cha ukaꞌab ndab:

—¡Leꞌa xa ndapka ke nsabndoꞌ gat xa!

67 Cha mchukko bexa ndoꞌ Jesús, no udin bexa Jesús. No ncho bexa utichyaꞌa ndoꞌ Jesús, 68 ndab bexa ndoꞌ Jesús:

—Tal lu ta ugeaka nak Cristo, ¡gud ná ton udin lu!

69 Ndalen wa leꞌa Pedr nsob tsoꞌo juer tale wa. Cha ubii dub xagots ndun tiꞌin sa wa wats Pedr, ndab xa:

—Go no ukeseano Jesús xa Galilea, ¿la?

70 Ná leꞌa Pedr cha mkwiꞌin ndoꞌ gaꞌal itea bexa wa ndab:

—Naꞌ lá iní xtaꞌan ndab go ndoꞌ naꞌ.

71 Cha nchaꞌa Pedr mas gax toꞌo puert. Weꞌe cha uniꞌí stubgal xagots Pedr, ndab xa ndoꞌ bexa nde sa wa:

—Leꞌa xa ndee no ukeseano Jesús xa Nazaret.

72 Ná leꞌa Pedr cha mkwiꞌingal ndab xa:

—Leꞌa Dios nsobwiꞌi leꞌa naꞌ lá nchandoꞌ xabgiꞌi baꞌ.

73 Tsoꞌoma wa leꞌa bexa nde sa wa ubii wats Pedr ndab bexa:

—Ta ugeaka leꞌa go no nak dub xmen xa baꞌ, leꞌa go ndadiꞌizh lak ndadiꞌizh bexa Galilea.

74 Leꞌa Pedr cha ngokloo ndab ndoꞌ bexa:

—¡Nsobwiꞌi Dios leꞌa naꞌ lá nchandoꞌ xa baꞌ!

Zha leꞌa dub boy utezh. 75 Weꞌe leꞌa Pedr cha mtseꞌa ladna ta ndab Jesús: “Leꞌa teꞌal ndee gor biseata kwezh boy, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.” Cha utoꞌo Pedr tsoꞌo juer, cha uzhebpa mbiꞌin xa.