1 Leꞌa pla bexa fariseo no bexa saduceo ulen wats Jesús, nlad bexa gun bexa preb Jesús, ndab bexa ndoꞌ Jesús:

—Leꞌa besa nlad gun ga dub ta uluu leꞌa ga Dioska mtuꞌub.

2 Leꞌa Jesús cha ukaꞌab ndab:

—Leꞌa ncho uzhe leꞌa gibeꞌa baꞌ nane naꞌ, cha ndab bego leꞌa geꞌa naꞌanpa ilaꞌ gi. 3 No ncho tempran leꞌa gibeꞌa baꞌ nane naꞌ no nde xkaw, cha ndab bega nat ilaꞌ gi. ¡Bego nluu cuentta xa wen ná bega ugap nak! Nyakbeꞌena bega xteꞌe nak be ta naꞌ bega gibeꞌa baꞌ, ná ni lá nyakbeꞌena bega ta ndun Dios tiemp nat. 4 Leꞌa be men ncho nat uzhebpa be men ugap no nkwaꞌan bexa be ta naꞌanpa ta ugeapa nak Dios. Ndab bega gun naꞌ dub ta uluu na ton nak naꞌ, parea leꞌa naꞌ lá gun ta ndab bega. Ndi iniꞌítsa bega leꞌa naꞌ itiꞌid ltsaꞌa ta utid Jonás, xa mbidiꞌizh sakndoꞌ Dios tiemp polta.

Cha mlaꞌa Jesús bexa, cha nchaꞌa xa.

5 Weꞌe leꞌa Jesús nsea be xmen xa utakea stub toꞌo nits, parea myalad bexa ngoꞌo bexa pan gaw bexa. 6 Leꞌa Jesús cha ndab ndoꞌ bexa:

—Blaꞌach bego, uzhebpa gop bega cuent nsea levadur ten bexa fariseo no levadur ten bexa saduceo.

7 Leꞌa bexa cha ndabbe ndoꞌ ltsaꞌa na:

—Li ndab xa baꞌ geal leꞌa beuna lá ngoꞌo pan.

8 Leꞌa Jesús cha mgenna ta li ndanbeꞌe bexa wa, cha ndab xa:

—¿Xtaꞌan lbaꞌa nyuꞌ ladna bega leꞌa bega lá noꞌo pan zha? ¡Ndidotsa ngeꞌ ladna bega naꞌ! 9 ¿Bi lá nyakbeꞌena bega be ta uniꞌí bega uyoꞌo wa zha? ¿Ni lá ntseꞌa ladna bega xteꞌe msa naꞌ gaꞌay pan udaw gaꞌay mil xabgiꞌi wa, no plo zhum ta myaꞌan sobr mteleꞌe bega zha weꞌe zha? 10 ¿No ni lá ntseꞌa ladna bega xteꞌe msa naꞌ dub gaꞌad pan udaw dub dap mil xabgiꞌi zha, no plo zhum ta myaꞌan sobr mteleꞌe bega zha? 11 ¿Xtaꞌan lá nyakbeꞌena bega leꞌa naꞌ naꞌanpa ndadiꞌizh cuent ten pan gor ndáp naꞌ gop bega cuent nsea levadur ten bexa fariseo no levadur ten bexa saduceo zha?

12 Leꞌa bexa wa cha myakbeꞌena leꞌa Jesús naꞌanpa ngab gap bexa cuent nsea levadur ten pan. Leꞌa xa ndi ndab gap bexa cuent nsea ta nluu bexa fariseo nsea bexa saduceo.

13 Leꞌa gor na ulayaꞌ bexa gax dub gezh nsaleaꞌ Cesarea Filipo, leꞌa Jesús cha unabdiꞌizh ndoꞌ be xmen na, ndab xa:

—¿Xteꞌe ndab be men ton nak Xa Myak Men Ndoꞌ Gizhliyo zha?

14 Leꞌa bexa cha ukaꞌab ndab:

—Leꞌa ncho be men ndab leꞌa go nak Juan xa ulaleaꞌ be men. No ncho bexa ndab leꞌa go nak Elí. No nchoga bexa ndab leꞌa go Jeremías, natal stubga xa mbidiꞌizh sakndoꞌ Dios tiemp polta.

15 Leꞌa Jesús cha ndab:

—¿Leꞌa bego zha xteꞌe gab ton nak naꞌ?

16 Leꞌa Simón Pedr cha ukaꞌab ndab:

—Leꞌa go nak Cristo Xin Dios nban.

17 Weꞌe leꞌa Jesús cha ndab ndoꞌ xa wa:

—Simón xin Jonás, uzhebpa wen yoo ladna lu, leꞌa ta ndab lu naꞌanpa men mluu ndoꞌ lu, ndi Xus naꞌ xa ncho gibeꞌa mluu‑yá ndoꞌ lu. 18 Leꞌa lu nsaleaꞌ Pedr. Leꞌa ndoꞌ geꞌdaꞌa ndee kwe dub xkwaꞌa men gungea ladna naꞌ. Leꞌa juers ten gealgut naꞌanpa gun gan ndoꞌ bexa wa. 19 Leꞌa naꞌ leꞌa usoꞌ lu gak lu xa yansu bexa leꞌa Dios nibeꞌe. Leꞌa itea be ta inibeꞌe lu ta lá gun bexa, leꞌa ta wa nokaga Dios lá ulaꞌa. No liga itea be ta inibeꞌe lu gun bexa, leꞌa ta wa ta na nokaga Dios inibeꞌe li gak.

20 Leꞌa Jesús cha unibeꞌe ndoꞌ be xmen na naꞌanpa gab bexa ndoꞌ ni dub men leꞌa Jesús nak Cristo xa mtuꞌub Dios.

21 Leꞌa zha weꞌe usaxan Jesús ndadiꞌizh ndoꞌ be xmen na leꞌa xa juerska yaꞌ Jerusalén, ndab xa:

—Leꞌa Jerusalén wa leꞌa bexa gox nsak nsea be uleꞌay nibeꞌe nsea be mech ten ley ugap gunno naꞌ. No gut bexa naꞌ, parea leꞌa wizh yon leꞌa naꞌ iban ndoꞌ gealgut.

22 Weꞌe leꞌa Pedr cha mbiꞌi Jesús dub lad, cha uteyo Pedr xa, ndab Pedr:

—¡Naꞌanpa li gak‑a, Señor! ¡Leꞌa Dios lá ulaꞌa li yasea ga!

23 Ná leꞌa Jesús cha myach mwiꞌi ndoꞌ Pedr, ndab xa:

—Utatsoꞌ wats naꞌ, leꞌa lu ndadiꞌizh cuent maxuꞌu, lá nlad lu gun naꞌ ta nlad Dios. Leꞌa lu lá ndanbeꞌe lak ndanbeꞌe Dios, leꞌa lu ndi ndanbeꞌe lak ndanbeꞌe be mentsa.

24 Cha ndab Jesús ndoꞌ be xmen na:

—Tal ton nlad isankea tsoꞌo naꞌ, nsabndoꞌ ulaꞌa xa iteanak ta nlad xa, cha goꞌo xa cruz ten xa, cha isankea xa tsoꞌo naꞌ. 25 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná leꞌa tal ton gat geal ndangea ladna xa naꞌ, leꞌa xa wa gap gealnaban ndoꞌ Dios. 26 Tal leꞌa dub men ndap iteanak be ta ncho ndoꞌ gizhliyo ndee, cha gak perdid gealnaban ten xa ndoꞌ Dios, ¿xtiꞌin iteanak be ta ndap xa wa zha? Leꞌa be ta wa naꞌanpa ugal isiꞌi xa gealnaban ten xa. 27 Leꞌa naꞌ, Xa Myak Men Ndoꞌ Gizhliyo, ilenno xeꞌa siꞌil ten Dios Xus naꞌ no be angel. Cha kixga naꞌ ikaꞌa kad dub men be ta mbin xa. 28 Leꞌa naꞌ gáp ndoꞌ bego leꞌa ncho bega nde ndee naꞌanpa gat gast iniꞌí bega leꞌa naꞌ, Xa Myak Men Ndoꞌ Gizhliyo, ilen inibeꞌegal.