1 Leꞌa zha na nsayal gax ujest Pascua, leꞌa Jesús uniꞌíla yamer gal gor ikaꞌan xa ndoꞌ gizhliyo, cha yaꞌ xa wats Xus xa. Lak nkweaꞌ ladna Jesús bexa nak xmen xa ndoꞌ gizhliyo ndee, bi li nkweaꞌ ladna xa bexa no gast gor ikaꞌan xa.

2 Leꞌa ngol gor na nsobyaw xcheꞌe Jesús no be xmen xa, leꞌa maxuꞌu uyoꞌola gek Judas Iscariot xin Simón yun cuent Jesús. 3 Leꞌa Jesús uniꞌíka leꞌa Dios Xus xa msaꞌa itea be taꞌa leꞌa xa inibeꞌe. No uniꞌí xa leꞌa xa watska Dios utoꞌo, no sa weꞌekaga yaꞌ xa. 4 Weꞌe ngwasoꞌ xa ndoꞌ mes sa ndeyaw bexa wa, cha ulate xa lad nbix xa. Cha mxi xa dub bleꞌa lad koꞌol len xa. 5 Cha ulo xa nits len dub cheꞌa. Cha usaxan xa nsat xa xoꞌo be xmen xa, no nkwiꞌid xa xoꞌo bexa wa no lad wa.

6 Leꞌa gor na ngol xa wats Simón Pedr, leꞌa Pedr cha ndab:

—Señor, ¿go baꞌ usat xoꞌo naꞌ zha?

7 Leꞌa Jesús cha ukaꞌab ndab:

—Leꞌa ta lndeꞌe ndun naꞌ, leꞌa lu lá yakbeꞌena‑yá nat. Parea gal zha yakbeꞌena lu‑yá.

8 Leꞌa Pedr cha ndab:

—¡Leꞌa naꞌ nunk lá usa xoꞌo naꞌ usat ga!

Leꞌa Jesús cha ndab:

—Tal leꞌa naꞌ lá usat xoꞌo lu, leꞌa lu yá lá gakta xmen naꞌ.

9 Leꞌa Simón Pedr cha ndab:

—¡Señor, naꞌanpa nabtsa xoꞌo naꞌ usat ga, ndi no yaꞌa naꞌ no gek naꞌ usat ga!

10 Leꞌa Jesús cha ukaꞌab ndab:

—Leꞌa xa na tiꞌi ngos nsabndoꞌ nabtsa xoꞌo na yat, leꞌa xa wa yá umbiꞌi nak. Leꞌa bego yá umbiꞌika nak ndoꞌ Dios, parea naꞌanpa itea bega.

11 Leꞌa Jesús yá uniꞌíla ton yun cuent xa, ta weꞌe ndab xa leꞌa dub bexa naꞌanpa umbiꞌi nak.

12 Leꞌa gor na mtaꞌusat Jesús xoꞌo bexa wa, cha ngokgal xa lad nbix xa. Cha usobgal xa ndoꞌ mes, ndab xa:

—¿Nyakbeꞌena bega xtaꞌan lbaꞌa mbinno naꞌ bega zha? 13 Leꞌa bega níꞌi ndoꞌ naꞌ Mech no Señor. Leꞌaka nak ta li níꞌi bega wa, geal leꞌa naꞌ lika nak. 14 Leꞌa naꞌ nak Señor ten bega no Mech ten bega, parea nat msat naꞌ xoꞌo bega. No liga leꞌa bego nsabndoꞌ usat xoꞌo ltsaꞌa bega. 15 Leꞌa naꞌ mluu xteꞌe nsabndoꞌ gun bega, ndontsa li gun bego lak mbinno naꞌ bega. 16 Leꞌa naꞌ gáp ndoꞌ bego leꞌa dub mos naꞌanpa mas nsak ndoꞌ xa nibeꞌe xa wa. No liga tal leꞌa dub xa mtuꞌub stubga men, leꞌa xa nchaꞌa wa naꞌanpa mas nsak ndoꞌ xa mtuꞌub xa. 17 Nat tal leꞌa bega nyakbeꞌena be ta ndee, no lika ndun bega, leꞌa Dios gun wen yoo ladna bega.

18 ’Leꞌa ta ndáp naꞌ ndee naꞌanpa ndáp naꞌ cuent ten itea bega. Leꞌa naꞌ mti bega no nchandoꞌ naꞌ bega, parea nsabndoꞌ gak cumplir lak nkeaniꞌi diꞌizh ten Dios, ndab‑a: “Leꞌa xa na ndawno naꞌ, leꞌa xa wa leꞌaka ngokloo ndoꞌ naꞌ.” 19 Nat ndáp naꞌ ta wa ndoꞌ bego gor na biseata gak‑a, ndontsa gor na gak‑a leꞌa bega gungea ladna ton nak naꞌ. 20 Leꞌa naꞌ gáp ndoꞌ bega leꞌa tal ton utsin gak ndoꞌ dub xa mtuꞌub naꞌ, leꞌa xa wa cuentkata ndoꞌ naꞌ li utsin nak. No liga tal ton utsin nak ndoꞌ naꞌ, leꞌa xa wa utsinga nak ndoꞌ Dios xa na mtuꞌub naꞌ.

21 Tsoꞌo na li ndab Jesús ta wa, cha uzheꞌeb kweaꞌ myoꞌo ladna xa. Cha gaꞌal ndab xa ndoꞌ be xmen xa:

—Leꞌa naꞌ gáp ndoꞌ bega leꞌa dub bega yun cuent naꞌ ndoꞌ bexa nlad gut naꞌ.

22 Leꞌa be xmen xa ni lá iniꞌí ton gun ta na li ndab Jesús wa, ta weꞌe usaxan nwiꞌi bexa ndoꞌ be ltsaꞌa bexa. 23 Leꞌa dub xmen Jesús, xa na leꞌa Jesús uzheꞌeb nkweaꞌ ladna, nsob wats Jesús. 24 Leꞌa Simón Pedr cha mbin sein ndoꞌ xa wa, ndontsa inabdiꞌizh xa ndoꞌ Jesús ná ton xa li gun wa. 25 Leꞌa xa wa cha mas ubisob wats Jesús, cha unabdiꞌizh xa ndab xa:

—Señor, ¿ton li yun cuent go zha?

26 Leꞌa Jesús cha ukaꞌab ndab ndoꞌ xa wa:

—Leꞌa naꞌ ugazh dub bleꞌa pan ndee. Leꞌa xa na usa naꞌ‑yá ndoꞌ na, leꞌa ta wa xa weꞌe.

Leꞌa Jesús cha mgazh dub bleꞌa pan, cha msaꞌa xa‑yá ndoꞌ Judas Iscariot xin Simón. 27 Leꞌa gor na li udaw Judas pan wa, leꞌa maxuꞌu cha uyote len ladoꞌo xa. Leꞌa Jesús cha ndab ndoꞌ Judas:

—Leꞌa ta na li gun lu wa, uxaxtsa bin ta wa.

28 Parea ni dub bexa na li nde ndoꞌ mes wa lá yakbeꞌena xtaꞌan ngi li ndab Jesús. 29 Leꞌa Judas wa xa nlaꞌach med ndantiꞌin bexa wa. Ta weꞌe ncho bexa ndanbeꞌe leꞌa Jesús nlad yaꞌisiꞌi Judas ta guntiꞌin bexa ndoꞌ ujest. No nchoga bexa ndanbeꞌe leꞌa Jesús nlad usaꞌa Judas med ndoꞌ bexa uban nak. 30 Tsoꞌo na li udaw Judas dub bleꞌa pan wa, leꞌa Judas cha utoꞌo nchaꞌa. Leꞌa ta wa gor teꞌal‑la.

31 Weꞌe leꞌa gor yá ukaꞌanla Judas, leꞌa Jesús cha ndab:

—Leꞌa nat leꞌa be men iniꞌí xteꞌe siꞌil nak naꞌ, Xa Myak Men Ndoꞌ Gizhliyo. No ta ndun naꞌ wa uluu xteꞌe siꞌil nak Dios. 32 Leꞌa ta na nluu naꞌ ndoꞌ be men xteꞌe siꞌil nak Dios, leꞌa ta ndun Dios noga uluu xteꞌe siꞌil nak naꞌ. Leꞌa ta na gun xa wa yamer gak. 33 Bego nak cuent xiꞌín naꞌ, yá naꞌantapa kwen nchoꞌo naꞌ lat bega. Leꞌa naꞌ gáp ndoꞌ bega lak ndápla naꞌ ndoꞌ bexa judio nibeꞌe wa: leꞌa bego ukwaꞌan naꞌ, ná leꞌa bega lá gun gan no yaꞌ sa gaa naꞌ. 34 Leꞌa naꞌ nibeꞌe dub ta kub ndoꞌ bega: Bkweaꞌ ladna bega be ltsaꞌa bega. Lak nkweaꞌ lad naꞌ bego, no liga bkweaꞌ ladna bega be ltsaꞌa bega. 35 Tal leꞌa bega li ikweaꞌ ladna be ltsaꞌa na, leꞌa be men igondoꞌ leꞌa bega xmenka naꞌ.

36 Leꞌa Simón Pedr cha unabdiꞌizh ndoꞌ Jesús, ndab xa:

—Señor, ¿pa yaꞌ ga zha?

Leꞌa Jesús cha ukaꞌab ndab:

—Leꞌa sa na yaa naꞌ, leꞌa lu lá yoo gan yaꞌno naꞌ nat. Parea gal zha leꞌa lu noka yaꞌ sa wa.

37 Leꞌa Pedr cha ndab:

—Señor, ¿xtaꞌan lá yoo gan gaano naꞌ go nat zhaga? Leꞌa naꞌ usa leꞌaka leꞌa naꞌ gat sakndoꞌ ga.

38 Leꞌa Jesús cha ukaꞌab ndab:

—¿Snika lu gat lu sakndoꞌ naꞌ zha? Leꞌa naꞌ gáp ndoꞌ lu leꞌa teꞌal ndee gor na biseata kwezh boy leꞌa lu mkwiꞌinla chon biaj ndab lu leꞌa lu lá nchandoꞌ naꞌ.