1 Leꞌa Jesús uniꞌí leꞌa bexa fariseo mbiꞌínbe leꞌa Jesús mas kwaꞌad men ndap, no mas kwaꞌad bexa ngoleaꞌ Jesús ndoꞌ Juan. 2 (Parea leꞌa Jesús naꞌanpa leꞌa igoleaꞌ be men, ndi be xmen xa ulaleaꞌ be men.) 3 Cha utoꞌo Jesús distrit Judea nseaꞌ xa leꞌakagal Galilea. 4 Leꞌa nes nseaꞌ xa wa nsabndoꞌ itid xa distrit Samaria. 5 Weꞌe ulayaꞌ xa toꞌo dub gezh ten Samaria nsaleaꞌ Sicar, gax sa nax yo msaꞌa Jacob xa uyoꞌo polta ndoꞌ xin xa Kosé. 6 Leꞌa sa wa nsob so nsaleaꞌ so ten Jacob. Leꞌa Jesús mzhanna tant dub usea xa, cha uyatsob xa toꞌo so wa pa gor gawizh. 7 Weꞌe cha ulen dub xagots xa Samaria nsealoꞌo nits. Leꞌa Jesús cha ndab ndoꞌ xa wa:

—Bsaꞌa nits goꞌo naꞌ.

8 Leꞌa gor weꞌe leꞌa be xmen Jesús nchaꞌbela gezh Sicar nchaꞌisiꞌi bexa ta gaw bexa.

9 Leꞌa xagots Samaria wa cha ukaꞌab ndab ndoꞌ Jesús:

—¿Xteꞌe nab ga nits goo ga ndoꞌ naꞌ zha? Leꞌa go xa judio, ná leꞌa naꞌ ndee xagots Samaria.

Li ndab xa geal leꞌa bexa judio naꞌanpa wen nak nsea bexa Samaria.

10 Leꞌa Jesús cha ukaꞌab ndab:

—Leꞌa lu lá iniꞌí xtaꞌan nsaꞌa Dios ndoꞌ be men, ni lá iniꞌí lu ton nak naꞌ naꞌab naꞌ nits ndoꞌ lu. Tal lu uniꞌí ta wa, leꞌa lu cha inab nits ndoꞌ naꞌ, leꞌa naꞌ cha usa nits nsaꞌa gealnaban.

11 Leꞌa xagots wa cha ndab:

—Señor, leꞌa go ni lá ndap xtaꞌan koꞌo ga nits, ná leꞌa len so ndee wat. ¿Pa yaꞌloꞌo ga nits nsaꞌa gealnaban wa zha? 12 Leꞌa Jacob usan gox polta ten beuna msaꞌa so ndee ndoꞌ beuna. Leꞌa so ndee ngu xa nits no be xin xa no be xman xa. ¿Nat ndab go leꞌa go mas nsak ndoꞌ xa wa zha?

13 Leꞌa Jesús ukaꞌab ndab:

—Leꞌa tal ton ndo nits ndee gal gor leꞌa xa gakgal ladna stub biaj. 14 Parea leꞌa tal ton goo nits usa naꞌ ndee wa, leꞌa xa wa naꞌantapa gak ladna. Leꞌa nits usa naꞌ wa yak cuent dub sa nsoblen nits, ta nsaꞌa gealnaban nunk lá idub.

15 Leꞌa xagots wa cha ndab:

—Señor, bsaꞌa ga nits wa goꞌo naꞌ, ndontsa yá lá gakta lad naꞌ, no ni lá gal lota naꞌ nits sa ndee.

16 Ná leꞌa Jesús cha ndab:

—Byaꞌyoꞌo cheꞌal lu.

17 Leꞌa xagots wa ukaꞌab ndab:

—Leꞌa naꞌ lá ndap cheꞌal naꞌ.

Leꞌa Jesús cha ndab:

—Leꞌaka ndab lu lá ndap lu cheꞌal lu. 18 Leꞌa lu ngop dub gaꞌay cheꞌal la, parea leꞌa xa nchono lu nat ndee wa naꞌanpa cheꞌal la. Ta ugeaka ta ndab lu wa.

19 Weꞌe leꞌa xagots wa cha ndab:

—Señor, nsak naꞌ leꞌa go dub xa ndadiꞌizh sakndoꞌ Dios. 20 Leꞌa be usan gox ten besa ngwankea Dios geꞌe siꞌil ndee, ná leꞌa bego bexa judio ndi ndab gezh Jerusalén nsabndoꞌ yankea be men Dios.

21 Leꞌa Jesús cha ndab:

—Xagots, bingea ladna ta gáp naꞌ leꞌa gal dub wizh yankea bega Dios Xus beuna ni geꞌe ndee no ni Jerusalén wa. 22 Nat leꞌa bego xa Samaria ndankea Dios, parea leꞌa bego lá iniꞌíka xteꞌe nak xa. Leꞌa besa xa judio nchandoꞌka Dios xa na ndankea besa, leꞌa lat bexa judio itoꞌo xa koꞌo be men ndoꞌ be ke ten bexa. 23 No yoo dub wizh, leꞌa ta wa nat, leꞌa be men na ta ugeaka yankea Tad Dios wa yankea bexa xa idub ncho ladna bexa lak nak gealngea ten Dios. Leꞌa Dios nkwaꞌan be men na li yankea bexa xa. 24 Leꞌa Dios nak espíritu, ta weꞌe leꞌa be men nsabndoꞌ yankea Dios idub ncho ladna bexa lak nak gealngea ten Dios.

25 Leꞌa xagots wa cha ndab:

—Leꞌa naꞌ uní leꞌa ndoꞌ gizhliyo ilen Mesías, xa noga nsaleaꞌ Cristo. Leꞌa zha ilen xa wa cha gudiꞌizh xa itea be taꞌa ndoꞌ besa.

26 Leꞌa Jesús cha ndab:

—Leꞌa ta wa naꞌ, xa nsoꞌyadiꞌizhno lu.

27 Leꞌa gor wa leꞌa be xmen Jesús mlaꞌnchaꞌ wats xa, cha ngwanseana bexa geal leꞌa xa nsoꞌyadiꞌizhno dub xagots. Parea ni dub bexa lá inabdiꞌizh ndoꞌ xa ná xtaꞌan nabdiꞌizh xagots wa, no xtaꞌan ndadiꞌizh Jesús ndoꞌ xa. 28 Weꞌe leꞌa xagots wa cha mlausoꞌ te ten na, cha nseaꞌ xa len gezh wa, ndab xa ndoꞌ be men:

29 —Utseawiꞌi bega dub xa ndab itea be taꞌa mbin naꞌ. ¿Naꞌanpa leꞌa xa wa nak Cristo zha?

30 Weꞌe leꞌa bexa wa cha utoꞌo nchaꞌbe sa nsob Jesús. 31 Ndalen wa leꞌa be xmen Jesús ndab ndoꞌ xa:

—Mech, udaw ga.

32 Ná leꞌa Jesús cha ndab:

—Leꞌa naꞌ ndapka ta ndaw naꞌ, dub ta lá nchandoꞌ bega.

33 Weꞌe leꞌa bexa wa cha ndabbe ndoꞌ be ltsaꞌa na:

—¿Ncho ton men mbiꞌid ulaꞌa ta gaw xa baꞌ zha?

34 Leꞌa Jesús cha ndab:

—Leꞌa naꞌ ndun lak nlad Dios xa mtuꞌub naꞌ, no nsandoꞌ naꞌ tiꞌin msaꞌa xa gun naꞌ. Leꞌa be ta wa cuent ta ndaw naꞌ. 35 Ndab bega ndun jwalt sdap mbeꞌe gal zha na ibeleꞌe be taꞌa ndoꞌ yo. Parea leꞌa naꞌ gáp: Bwiꞌi bego nat, leꞌa be men nseabe baꞌ nak cuentta dub taꞌa myazh yá ngugal‑a ibeleꞌe‑yá. 36 Leꞌa bexa nteleꞌe be taꞌa wa nyax ten na. Leꞌa be ta nteleꞌe bexa wa leꞌa ta wa be men gap gealnaban kub, ta nunk lá idub. Weꞌe leꞌa bexa nteleꞌe wa no bexa ndas diꞌizh ten Dios wa junt iten ladnabe. 37 Leꞌa ta ndee nak lak ndab be men, ndab bexa leꞌa dub xa ndas‑a, cha stubga xa nteleꞌe‑yá. 38 Leꞌa naꞌ ntuꞌub bego uteleꞌe bega be men ndoꞌ Dios, bexa gol gudiꞌizh bega ndoꞌ na. Leꞌa be men xaꞌaga ned mbin tiꞌin lat bexa wa, ná nat leꞌa bego usandoꞌ tiꞌin usaxan bexa wa.

39 Leꞌa ta na li mbidiꞌizh xagots wa leꞌa Jesús ndab iteanak be ta mbin xa wa, ta weꞌe leꞌa kwaꞌad bexa Samaria ncho gezh wa mbingea ladna leꞌa Jesús nak Cristo xa mtuꞌub Dios. 40 Weꞌe leꞌa gor ulayaꞌ bexa wats Jesús, cha unab bexa ndoꞌ Jesús weꞌetsa yoo xa gezh wa. Leꞌa Jesús cha uyoꞌo sa wa top wizh. 41 No mas kwaꞌad bexa wa mbingea ladna Jesús, gor na mbiꞌín bexa ta ndadiꞌizh Jesús. 42 Ndab bexa ndoꞌ xagots wa:

—Nat ndangea ladna besa Jesús naꞌanpa nabtsa ta ndab lu wa. Leꞌa besa no mbiꞌín ta ndadiꞌizh xa, ta weꞌe uniꞌí besa leꞌa xa baꞌ ta ugeaka leꞌa nak Cristo, xa ngoꞌo be men ndoꞌ be ke ten bexa.

43 Leꞌa zha na ngok stop wizh wa leꞌa Jesús cha utoꞌo sa wa nseaꞌ xa Galilea. 44 Leꞌa Jesús leꞌaka ndab leꞌa guniꞌi ton dub profet leꞌa bexa lazh xa wa lá ndap mod ndoꞌ xa. 45 Leꞌa Galilea ncho bexa ngwaꞌbela ujest Pascua gezh Jerusalén, sa uniꞌí bexa itea be ta mbin Jesús sa wa. Ta weꞌe leꞌa gor mlaꞌnchaꞌ Jesús distrit Galilea, leꞌa bexa wa utsin ngok ndoꞌ xa.

46 Cha nchaꞌagal Jesús gezh Caná ten Galilea, sa myunno xa nits vin. Leꞌa gezh Capernaum ncho dub xa nsak ten xa nibeꞌe sa wa. Leꞌa xin xa wa kweaꞌ nsak. 47 Leꞌa gor na mbiꞌín xa nsak wa leꞌa Jesús utoꞌo Judea mlaꞌnchaꞌgal xa Galilea, cha ulen xa wats Jesús, ndab xa yaꞌ Jesús yunyakna Jesús xin xa, leꞌa xin xa yamer gat. 48 Leꞌa Jesús cha ukaꞌab ndab:

—Tal leꞌa bega lá iniꞌí be uyon ndun naꞌ, leꞌa bega naꞌanpa gungea ladna naꞌ.

49 Ná leꞌa xa nsak wa cha ndab:

—Señor, uxax nchaꞌ una ndontsa naꞌanpa gat xiꞌín naꞌ.

50 Weꞌe leꞌa Jesús cha ndab:

—Nat byaꞌ ta lid lu leꞌa xin lu myaklana.

Leꞌa xa nsak wa cha mbingea ladna ta ndab Jesús, cha nseaꞌ xa ta lid xa. 51 Leꞌa gor mtanseaꞌ xa ta lid xa, leꞌa bexa ndun tiꞌin ten xa utoꞌolabe, ndab ndoꞌ xa leꞌa xin xa myaklana. 52 Leꞌa xa cha unabdiꞌizh ndoꞌ bexa ná xá gor usaxan nseayoꞌo wen ladna meꞌed wa. Leꞌa bexa cha ndab:

—Naꞌag, gor nkea udub gor uzhe mtoꞌo xlea meꞌed.

53 Leꞌa xus meꞌed wa cha mtseꞌa ladna pa gor weꞌeka ndab Jesús leꞌa xin xa myaklana. Ta weꞌe cha mbingea ladna xa Jesús no iteata bexa ta lid xa.

54 Leꞌa ta wa biaj itop utoꞌo Jesús Judea nseaꞌ xa Galilea, cha mbin xa dub uyon sa wa.