1 Weꞌe cha utid Pabl no Silas gezh Anfípolis no gezh Apolonia. Cha ulayaꞌ bexa gezh Tesalónica, sa nde dub niꞌi sa nzhealbe bexa judio. 2 Leꞌa Pabl cha nchaꞌa sa wa wizh neꞌe bexa, lakka ndun xa itea be gezh sa ndaꞌ xa. Weꞌe chon sman mbidiꞌizh Pabl ndoꞌ bexa sa wa. 3 Ndab xa leꞌa lak nkeaniꞌi diꞌizh ten Dios, leꞌa Cristo lika nsabndoꞌ kweaꞌ itid no gat xa, no yaste xa ndoꞌ gealgut. No ndab Pabl:

—Leꞌa Jesús xa lndeꞌe ndadiꞌizh naꞌ ndoꞌ bega, leꞌa xa wa leꞌa nak Cristo xa mtuꞌub Dios.

4 Leꞌa ncho bexa wa mbingea ladna ta wa, cha dubtsa myak bexa nsea Pabl no Silas. No kwaꞌad bexa naꞌanpa xa judio ndankea Dios cha no mbingea ladna Jesús, no kwaꞌad be xagots nsak. 5 Ná leꞌa bexa judio na naꞌanpa ngungea ladna Jesús wa cha ngokloo geal kwaꞌadpa bexa judio no mbingea ladna. Leꞌa bexa wa cha mchealte pla be xabgiꞌi ugap. Weꞌe leꞌa bexa judio wa no bexa ugap wa mbin gan ngokloo kwaꞌadpa bexa gezh wa, gast uzheꞌeb dub uyo uyoꞌo sa wa. Cha uyoꞌo juers bexa len lid dub xa nsaleaꞌ Jasón, nkwaꞌan bexa Pabl no Silas, ndontsa yak cuent bexa ndoꞌ bexa naktiꞌin. 6 Parea lá ngaizheal bexa Pabl no Silas, cha mbiꞌi juers bexa Jasón no stapla be xmen Jesús. Cha myun bexa cuent bexa ndoꞌ bexa naktiꞌin, ugeꞌ ndab bexa:

—Leꞌa bexa ngo uyo idub ndoꞌ gizhliyo wa nat nseabega sa ndee. 7 Leꞌa Jasón ndee nsaꞌa ta lid na uyoꞌo bexa. Ná leꞌa itea bexa wa lá nxobgek ndoꞌ César xa nibeꞌe Roma, ndab bexa ncho stubga xa mas nibeꞌe nsaleaꞌ Jesús.

8 Weꞌe leꞌa bexa naktiꞌin no be men gezh wa uzhebpa ngokloo bexa, gor na mbiꞌín bexa ta wa. 9 Ná leꞌa Jasón no be ltsaꞌa xa cha utixtsa dub mult ndoꞌ bexa naktiꞌin, cha myaꞌak bexa.

10 Leꞌa gor uyoꞌo teꞌal leꞌa be xmen Jesús wa cha uxax mtuꞌub Pabl no Silas gezh Berea. Cha uyote bexa len niꞌi sa nzhealbe bexa judio. 11 Leꞌa bexa ncho Berea wa mas utsin nak ndoꞌ lak nak bexa Tesalónica, leꞌa bexa Berea uzhebpa nlaꞌach xtaꞌan ndadiꞌizh Pabl no Silas. No itea wizh ntsid bexa ta nkeaniꞌi diꞌizh ten Dios, ndontsa iniꞌí bexa naga ta ugeaka ta ndadiꞌizh itop bexa wa. 12 Ta weꞌe leꞌa kwaꞌad bexa judio wa no mbingea ladna Jesús. No kwaꞌad bexa naꞌanpa xa judio, be xagots no be xabgiꞌi, mbingea ladna Jesús. 13 Ná leꞌa gor na mbiꞌín bexa judio ndencho Tesalónica, leꞌa Pabl ndadiꞌizhgal diꞌizh ten Jesús gezh Berea wa, cha utoꞌo pla bexa nchaꞌbe bexa sa wa. Cha mbin bexa gan ngokloo kwaꞌadpa be men Berea ndoꞌ Pabl. 14 Ná leꞌa be xmen Jesús uxax mbiꞌi Pabl lad toꞌo nitsdoꞌo. Leꞌa Silas no Timoteo myanyoꞌo Berea. 15 Leꞌa pla bexa cha mbiꞌi Pabl gast gezh Atenas. Cha ndab Pabl ndoꞌ bexa wa:

—Leꞌa gor na yach bega gezh Berea, cha gud bega ndoꞌ Silas no ndoꞌ Timoteo uxax giꞌid bexa gezh Atenas ndee.

16 Ndalen li nchonkea Pabl ilen Silas no Timoteo gezh Atenas wa, leꞌa Pabl kweaꞌ ncho ladna uniꞌí xa xteꞌeta uzheꞌeb ndankea be men be dios gizhliyo. 17 Weꞌe leꞌa len niꞌi sa nzhealbe bexa judio, mbidiꞌizhno Pabl bexa judio no bexa naꞌanpa xa judio, bexa ndankea Dios. No ndoꞌ bexa nzheꞌal Pabl ndoꞌ xgeꞌe wa itea wizh ndadiꞌizh Pabl. 18 No mbidiꞌizhno Pabl pla bexa epicúreo no bexa estoico, leꞌa ta wa top partid men ncho Atenas wa. Ncho bexa wa ndab:

—¿Xteꞌe nak ta ndadiꞌizh xa ndee zha?

Leꞌa ncho bexa ukaꞌab ndab:

—Nsak naꞌ cuent ten be dios xaꞌaga ndadiꞌizh xa.

Leꞌa bexa li ndab geal leꞌa Pabl ndadiꞌizh diꞌizh wen ten Jesús ná xteꞌe mban Jesús. 19 Leꞌa bexa wa cha mbiꞌi Pabl sa nsaleaꞌ Areópago, dub sa nzhealbe be men gezh wa. Cha ndab bexa ndoꞌ Pabl:

—Gud go ndoꞌ besa xtaꞌan ta ndadiꞌizh go wa. 20 Leꞌa go ndadiꞌizh dub ta nunk besa gol goꞌón. Nat nlad besa goꞌón besa ná xtaꞌan ta wa.

21 Leꞌa bexa Atenas no bexa xaꞌaga ndencho gezh wa, ndal ladna bexa ndadiꞌizh bexa no ndoꞌón bexa sbeꞌen be ta tiꞌi ulensea.

22 Weꞌe leꞌa Pabl cha ngwasoꞌ lat bexa ten Areópago wa, cha ndab xa:

—Bego xa Atenas, uní naꞌ leꞌa bega uzhebpa ndankea be dios ten bega. 23 Leꞌa sa ndaltiꞌid naꞌ len gezh ndee, uní naꞌ be sa ndankea bega be dios wa. No mzheal naꞌ dub sa nkea dub letr ndab‑a: “Dub dios naꞌan ton nchandoꞌ.” Leꞌa Dios wa xa na li ndankea bega maska naꞌanpa nchandoꞌ bega xa, leꞌa naꞌ cuent ten Dios weꞌe ndadiꞌizh.

24 ’Leꞌa Dios weꞌe mbindeꞌe gizhliyo no itea be ta nde ndoꞌ gizhliyo, no nak xa Xwan gibeꞌa no gizhliyo. Leꞌa xa wa lá nyoꞌo len be latbadoꞌo ndandeꞌe men, 25 ni lá nkiꞌin gakno be men xa. Leꞌa xa leꞌa nsaꞌa gealnaban ten iteanak be men, no nsaꞌa xa iteanak be taꞌa nkiꞌin be men.

26 ’Leꞌa Dios mbindeꞌe dubtsa xabgiꞌi, cha weꞌe ulen itea ndoꞌ be men ndoꞌ idub nax gizhliyo. No ndab xa polga ilen itea ndoꞌ be men wa no pa yoo bexa. 27 Li ndontsa ukwaꞌan be men Dios no izheal bexa Dios, leꞌa Dios naꞌanpa sit nsoꞌ wats kadga dub beuna. 28 Leꞌa juers ten Dios leꞌa beuna nban no nsea beuna no ncho beuna. Leꞌa lat bega no ncho bexa ndab: “Leꞌa beuna nak be xin Dios.” 29 Tal leꞌa beuna nak xin Dios, lá nsabndoꞌ gunbeꞌe beuna leꞌa Dios nak cuent be dios nakchaꞌaw oro no plata no geꞌ, be ta ndanchaꞌaw be men laktsa ndanbeꞌe bexa. 30 Leꞌa Dios pol‑lata mbingeꞌ ladna ndoꞌ be men, leꞌa bexa lá iniꞌí xteꞌe nsabndoꞌ gun bexa. Ná nat leꞌa Dios nibeꞌe ndoꞌ itea be men nde ndoꞌ gizhliyo ulaꞌa bexa be ta ugap nak bexa. 31 Leꞌa Dios ulo dub wizh leꞌa dub xa mti Dios gab gaꞌal ndoꞌ itea be men ná xtaꞌan mbin bexa. Leꞌa Dios leꞌa mxiste xa wa ndoꞌ gealgut, ndontsa iniꞌí itea be men leꞌa Dios leꞌaka mti xa.

32 Leꞌa gor na mbiꞌín bexa ta na mban dub xa ndoꞌ gealgut, weꞌe ncho bexa wa mxiꞌidno Pabl. Ná ncho bexa ndab ndoꞌ Pabl:

—Stub wizh goꞌónta besa ta ndab go wa.

33 Weꞌe leꞌa Pabl cha mkaꞌan lat bexa wa. 34 Ná leꞌa ncho bexa wa mbingea ladna ta mbidiꞌizh Pabl, cha dubtsa myakno bexa Pabl. Leꞌa lat bexa wa ncho dub xa nsaleaꞌ Dionisio, dub xa ten Areópago wa. No dub xagots nsaleaꞌ Dámaris no stapla bexa mbingea ladna Jesús.